Tag: اگست وفیات

4 اگست 1999ء کو پاکستان کے نام وَر گلوکار اخلاق احمد نے ہمیشہ کے لیے اپنی آنکھیں موند لی تھیں۔ آج ان کی برسی منائی جارہی ہے۔ اخلاق احمد کی آواز میں کئی فلمی گیت مقبول ہوئے اور آج بھی بڑے ذوق و شوق سے سنے جاتے ہیں۔

اخلاق احمد 1952ء کو کراچی میں پیدا ہوئے تھے۔ میٹرک کا امتحان پاس کرنے کے بعد وہ اسٹیج پروگراموں میں شوقیہ گلوکاری کرنے لگے۔ 1971ء میں انھوں نے کراچی میں بننے والی فلم ’’تم سا نہیں دیکھا‘‘ کے لیے ایک گانا ریکارڈ کروایا تھا اور یہیں سے ان کے فلمی کیریئر کا آغاز ہوا۔ اس کے بعد فلم ’’بادل اور بجلی‘‘ اور ’’پازیب‘‘ میں بھی اخلاق احمد کے گیت شامل ہوئے، لیکن ان کے ذریعے وہ مقبولیت انھیں نہیں ملی جو بعد میں ان کے حصّے میں آئی۔

1974ء میں اداکار ندیم نے اپنی فلم ’’مٹی کے پتلے‘‘ میں اخلاق احمد کے آواز میں ایک نغمہ شامل کیا اور موسیقار روبن گھوش نے لاہور میں اخلاق احمد کی آواز میں اپنی فلم ’’چاہت‘‘ کا ایک نغمہ ’’ساون آئے، ساون جائے‘‘ ریکارڈ کروایا۔ یہ نغمہ اخلاق احمد کے فلمی سفر کا مقبول ترین نغمہ ثابت ہوا۔ اس گیت پر انھیں خصوصی نگار ایوارڈ بھی عطا ہوا۔

اسی عرصے میں اخلاق احمد نے پاکستان ٹیلی وژن کے پروگراموں میں گلوکاری کا آغاز کیا اور ملک گیر شہرت اور مقبولیت حاصل کی۔ فلم نگری میں انھوں نے شرافت، دو ساتھی، پہچان، دلربا، امنگ، زبیدہ، انسان اور فرشتہ، انسانیت، مسافر، دوریاں، بسیرا جیسی کام یاب ترین فلموں کے لیے گیت گائے جو بہت پسند کیے گئے۔ اخلاق احمد کا شمار پاکستان میں مقبولیت کے اعتبار سے صفِ اوّل کے گلوکاروں میں ہوتا ہے۔

خلاق احمد نے آٹھ نگار ایوارڈ اپنے نام کیے تھے۔ 1985ء میں انھیں خون کا سرطان تشخیص ہوا تھا اور وفات کے وقت علاج کی غرض سے لندن میں مقیم تھے۔ انھیں کراچی کے ایک قبرستان میں سپردِ خاک کیا گیا۔

ماہرِ لسانیات، نام وَر محقّق، نقاد اور مشہور ادبی جریدے نگار کے مدیر ڈاکٹر فرمان فتح پوری 3 اگست 2013ء کو وفات پاگئے تھے۔ وہ کئی کتابوں کے مصنّف تھے جو اردو زبان و ادب کا سرمایہ ہیں۔

وہ 26 جنوری 1926ء کو ہندوستان کے شہر فتح پور میں پیدا ہوئے اور اسی شہر کی نسبت ان کے نام سے جڑی رہی۔

ڈاکٹر فرمان فتح پوری نے ابتدائی تعلیم فتح پور، الہ آباد اور آگرہ سے حاصل کی اور تقسیمِ ہند کے بعد ہجرت کر کے پاکستان آگئے اور کراچی میں سکونت اختیار کی، انھوں نے یہاں جامعہ کراچی سے اردو ادب میں ایم اے اور پی ایچ ڈی کی ڈگری حاصل کی۔ بعدازاں جامعہ کراچی ہی میں اردو ادب کی تدریس سے منسلک ہو گئے۔

تنقید اور تحقیق کے میدان میں ڈاکٹر فتح پوری انتہائی قدآور شخیصت تھے اور ندرتِ خیال اور نکتہ رسی کے لحاظ سے انھیں‌ اردو زبان کا پائے کا نقّاد مانا جاتا ہے۔

انھوں نے پچاس سے زائد کتابیں تصنیف کیں، جن میں تحقیق و تنقید، اردو رباعی کا فنی و تاریخی ارتقا، ہندی اردو تنازع، غالب: شاعرِ امروز و فردا، زبان اور اردو زبان، دریائے عشق اور بحرالمحبّت کا تقابلی مطالعہ اور اردو املا اور رسم الخط شامل ہیں جو اردو زبان و ادب کا نہایت معتبر اور مستند حوالہ ہیں۔

ڈاکٹر فرمان فتح پوری تقریباً تین دہائیاں اردو لغت بورڈ سے وابستہ رہے اور 2001ء سے 2008ء تک اس ادارے کے صدر کی حیثیت سے کام کیا۔ ان کی کتاب ’اردو ہندی تنازع‘ اس موضوع پر مستند حوالہ ہے۔ اردو ڈکشنری بورڈ کی لغت میں سے کئی جلدیں ڈاکٹر فرمان فتح پوری کی نگرانی میں مکمل کی گئی تھیں۔

مشہور ہے کہ ان کا حافظہ نہایت قوی تھا۔ رفتگانِ علم و ادب کے نام اور ان کے کام کی تفصیل انھیں ازبر تھی۔ جامعہ کراچی نے فرمان فتح پوری کو پروفیسر ایمیریٹس بنایا تھا۔ ان کے تحریر کردہ مضامین دستاویز کی حیثیت رکھتے ہیں۔

کراچی میں وفات پانے والے ڈاکٹر فرمان فتح پوری کو حکومتِ پاکستان نے ستارہ امتیاز سے نوازا تھا۔

1922ء میں آج ہی کے دن الیگزینڈر گراہم بیل نے دنیا ہمیشہ کے لیے چھوڑ دی تھی۔ ان کی ایک ایجاد کی بدولت انسان فاصلے سے براہِ راست آواز کے ذریعے ایک دوسرے سے رابطہ کرنے کے قابل ہوا تھا۔ ان کی اس ایجاد کو ہم ٹیلی فون کہتے ہیں۔

اسکاٹ لینڈ ان کا وطن تھا جو بعد میں امریکا منتقل ہوگئے، وہ ایک انجینئر اور اختراع ساز تھے جنھوں نے 2 جون 1875ء کو ٹیلی فون ایجاد کیا جو دنیا بھر میں انسانوں کے درمیان رابطے اور بات چیت کا وسیلہ بنا۔ آج ہم وائر لیس ٹیکنالوجی اور اسمارٹ فونز کے دور میں زندہ ہیں، لیکن 1885ء میں جب گراہم بیل نے ٹیلی فون کمپنی کی بنیاد رکھی تو مواصلات کی دنیا میں انقلاب برپا ہوگیا۔

الیگزینڈر گراہم بیل نے اسکاٹ لینڈ کے شہر ایڈن برگ میں 3 مارچ 1847ء کو ایک پروفیسر اور ماہرِ لسانیات کے گھر میں آنکھ کھولی۔ ان کی والدہ قوّتِ سماعت سے محروم تھیں۔ کہتے ہیں گراہم بیل کو ان کی والدہ کی اسی محرومی نے سائنس اور نشریاتی رابطوں کے تجربات پر آمادہ کیا تھا۔ گراہم بیل شاعری، آرٹ اور موسیقی کا شوق رکھتے تھے اور پیانو بھی بجانا جانتے تھے۔

انھوں نے 14 برس کی عمر میں گندم صاف کرنے والی ایک مشین بنائی تھی جو ان کی پہلی ایجاد تھی۔ تعلیم کا سلسلہ ایڈن برگ کے رائل ہائی اسکول اور ایڈن برگ یونیورسٹی اور یونیورسٹی کالج آف لندن سے مکمل کیا۔

گراہم بیل 23 برس کی عمر میں تپِ دق کے عارضے میں مبتلا ہوئے تو والدین انھیں کینیڈا کے ایک صحت افزا مقام پر لے گئے جہاں بیل ایسے ٹیلی گراف کے تصور کو عملی شکل دینے کے لیے کام کرتے رہے، جو ایک ساتھ کئی پیغامات وصول کر سکے۔ اس ضمن میں مزید کام اور عملی تجربات نے انھیں کام یابی دی اور انھوں نے فلاڈیلفیا میں ٹیلی فون کی نمائش اور اس کے کام کا عملی مظاہرہ کیا۔

الیگزینڈر گراہم بیل کو حکومت کی جانب سے انعام و میڈلز کے علاوہ کئی کالجوں اور یونیورسٹیوں نے اعزازی ڈگریاں دیں۔

75 برس کی عمر میں ذیابیطس کے مرض سے پیدا ہونے والی پیچیدگیوں اور طبّی مسائل نے انھیں علیل کردیا تھا اور اسی باعث ان کا انتقال ہوگیا۔

شہزاد احمد کا شمار پاکستان کے ان تخلیق کاروں میں‌ ہوتا ہے جنھوں نے جدید طرزِ احساس کو اپنی شاعری کی بنیاد بنایا۔ 60ء کی دہائی میں پہچان بنانے والے اس شاعر کی زندگی کا سفر یکم اگست 2012ء کو تمام ہوگیا آج شہزاد احمد کی برسی منائی جارہی ہے۔

شہزاد احمد 16 اپریل 1932ء کو امرتسر میں پیدا ہوئے۔ تقسیمِ ہند کے بعد پاکستان آ گئے۔ گورنمنٹ کالج لاہور سے نفسیات اور فلسفے میں ایم اے کیا۔ انھوں نے شاعری کے علاوہ نفسیات کے موضوع پر بھی کئی کتابیں تصنیف کیں۔ 90ء کی دہائی میں شہزاد احمد کو تمغہ حسنِ کارکردگی سے نوازا گیا تھا۔

ان کے شعری مجموعے ’’صدف، جلتی بجھتی آنکھیں، ٹوٹا ہوا پَل، اترے مری خاک پہ ستارے، بچھڑ جانے کی رُت‘‘ کو بہت پذیرائی ملی۔

شہزاد احمد کالج کے زمانے ہی سے مشاعروں میں اپنا کلام سنانے لگے تھے۔ انھیں غزل میں اپنی انفرادیت اور طرزِ احساس کے باعث بڑی توجہ ملی۔ شہزاد احمد کی غزل کا رومانوی لہجہ متاثر کن اور نکتہ آفریں ہے۔ ان کا کلام سادہ اور ندرتِ خیال کے اعتبار سے بلند ہے۔ وہ شعریت اور ابلاغ کے قائل تھے اور یہی وجہ ہے مشکل تراکیب اور پیچیدہ یا غیرعام فہم مضامین کو اپنے شعروں میں جگہ نہ دی۔ ان کا ایک شعر ملاحظہ کیجیے:

یار ہوتے تو مجھے منہ پہ برا کہہ دیتے
بزم میں میرا گِلہ سب نے کیا میرے بعد

انھوں نے کئی کتابوں کے اردو زبان میں ترجمے بھی کیے جن میں سے کچھ شاعری پر مشتمل ہیں۔ شہزاد احمد کئی بڑے عہدوں پر فائز رہے۔ وہ مجلس ترقی ادب کے ڈائریکٹر کی حیثیت سے بھی کام کرتے رہے۔ انھوں نے 80 سال کی عمر میں وفات پائی۔

جمشید نسروانجی جنھیں بابائے کراچی کہا جاتا تھا، 1952ء میں آج ہی کے دن دنیا سے رخصت ہوئے تھے۔ پارسی برادری کے نسروانجی اپنی جرات، راست گوئی اور عوام کی فلاح و بہبود کے کاموں کے لیے مشہور تھے۔

وہ ایک ایسے درد مند اور باشعور شخص تھے جنھوں نے انسانوں ہی نہیں‌ جانوروں کے حقوق کے لیے بھی کام کیا اور اپنے خلوص اور پیار و محبت سے لوگوں کے دل جیتے اور ان کے لیے مثال بنے۔

انھوں نے 1886ء میں کراچی میں آنکھ کھولی۔ ان کا پورا نام جمشید نسروانجی رستم جی مہتا تھا۔ انھوں نے اپنی عوامی خدمات کا آغاز 1915ء سے کیا۔ ان کے سماجی کاموں کا سلسلہ گلی محلّے سے شروع ہوا اور پھروہ شہر بھر کے عوام کے مسائل، تکالیف اور ان کے حقوق کے لیے آواز بلند کرنے والی شخصیت بن گئے۔ انھوں نے اپنے دور میں سیاست میں بھی حصّہ لیا۔

گل حسن کلمتی اپنی کتاب "سندھ جا لافانی کردار” میں لکھتے ہیں کہ 1919ء میں جب انفلوائنزا کی بیماری نے کراچی میں وبائی شکل اختیار کی تو جمشید نسروانجی نے دن رات عوام کی خدمت کی اور بے حد مقبول ہوئے۔ انھیں 1922ء میں کراچی میونسپلٹی کا صدر منتخب کرلیا گیا۔ وہ 1932 تک اس عہدے پر کام کرتے رہے۔ سندھ کے مشہور سیاست داں جی ایم سید نے اپنی کتاب میں جمشید نسروانجی کے حوالے سے لکھا ہے کہ سندھ کی بمبئی سے علیحدگی کی تحریک میں انھوں نے بھرپور حصہ لیا۔

جمشید نسروانجی سندھ کی بمبئی سے علیحدگی کے بعد 1937ء میں ضلع دادو سے سندھ اسمبلی کے رُکن منتخب ہوئے اور آزاد حیثیت میں رکن رہے، لیکن ایک موقع پر سیاسی دباؤ کے بعد استعفیٰ دے دیا۔ قیامِ پاکستان کے بعد جب انھوں نے محسوس کیا کہ غیر مسلم اور ایمان دار کارکنوں کے لیے ملکی سیاست میں کوئی جگہ نہیں ہے تو وہ سیاست سے کنارہ کش ہوگئے۔

جمشید نسروانجی صحت عامّہ کے حوالے سے خاص طور پر متحرک رہے اور عوام میں حفظانِ صحّت کے اصولوں اور امراض سے متعلق شعور و بیداری کے لیے کام کیا۔ انھوں نے اپنی والدہ کے نام سے صدر میں ایک میٹرنیٹی ہوم بھی قائم کیا تھا۔

کراچی شہر میں بسنے والے لوگوں کے لیے ان کی خدمات کا کوئی شمار نہیں۔ وہ نہ صرف انسانوں سے پیار کرتے تھے بلکہ کسی جانور کو بھی دکھ یا تکلیف میں نہیں دیکھ سکتے تھے۔

معروف ادیب، محقق اور تذکرہ نگار علی محمد راشدی نے اس حوالے سے ایک واقعہ اپنی کتاب میں رقم کیا جو جمشید نسروانجی کے بیدار مغز اور مثالی شخصیت ہونے کا ثبوت ہے۔ وہ لکھتے ہیں:

1930 کے آس پاس مَیں بندر روڈ سے گزر رہا تھا۔ دیکھا کہ جمشید مہتا پیدل ایک زخمی گدھے کو لے کر اسپتال کی طرف جا رہے ہیں۔ ان کی موٹر، ان کا ڈرائیور پیچھے پیچھے چلاتا آ رہا تھا۔ تماشا دیکھنے کے لیے میں بھی اسپتال کے برآمدے میں جا کھڑا ہوا۔

جمشید نے اپنے سامنے گدھے کی مرہم پٹّی کرائی اور ڈاکٹر سے بار بار کہتے رہے کہ زخم کو آہستہ صاف کرے تاکہ بے زبان کو ایذا نہ پہنچے۔ مرہم پٹی ختم ہوئی تو ڈاکٹر کو ہدایت کی کہ گدھے کو ان کے ذاتی خرچ پر اسپتال میں رکھا جائے، اور دانے گھاس کے لیے کچھ رقم بھی اسپتال میں جمع کرا دی۔

دوسری طرف گدھے کے مالک سے بھی کہا کہ جب تک گدھے کا علاج پورا نہ ہو جائے اور وہ کام کرنے کے قابل نہ ہو جائے، تب تک وہ اپنی مزدوری کا حساب اُن سے لے لیا کرے، اور یہ کہتے ہوے کچھ نوٹ پیشگی ہی اسے دے دیے۔

یہ واقعہ ثابت کرتا ہے کہ ان کی نظر میں انسان ہی نہیں جانور بھی جو ہمارے کام آتے ہیں اور بہت مددگار ہیں، ان کے بھی کچھ حقوق ہیں اور ان کے ساتھ ہم دردی اور انصاف سے پیش آنا چاہیے۔

جمشید نسروانجی نے اپنے دور میں شہر کے لیے صاف پانی کی فراہمی کا منصوبہ بنا کر اس پرعمل درآمد کروایا، کشادہ سڑکیں تعمیر کراوائیں اور مختلف شفا خانے، راستوں اور حقوق و سہولیات کے حوالے سے متحرک اور فعال کردار ادا کیا۔

آج شہرِ قائد کی جو حالت ہے، وہ کسی سے ڈھکی چھپی نہیں۔ سڑکیں، بجلی و پانی کی فراہمی کا نظام، برساتی نالے، صفائی ستھرائی، تجاوزات غرض عوام کو سہولیات تو کیا بنیادی ضروریات بھی میسر نہیں یا برائے نام ہیں۔ شہرِ قائد کو آج پھر کسی بے غرض، پُرخلوص اور درد مند کی تلاش ہے جو جمشید نسروانجی کے نقشِ قدم پر چلتے ہوئے شہر اور اس کے باسیوں کو ان کا حق دلوا سکے اور اسے صاف ستھرا اور مثالی شہر بنا سکے۔