Tag: اگلے ماہ

اسلام آباد :  پاکستان کے مشیرتجارت نے ایرانی وفد سے ملاقات میں کہا دوطرفہ تجارت کو بڑھانے کے لئے نان ٹیرف بیرئیرز کو ہٹانا ہوگا جبکہ احمد امیر عبادی کا کہنا تھا ایرانی وزیر تجارت آئندہ ماہ پاکستان کا دورہ کریں گے، ہم پاکستان کے ساتھ بھی مشترکہ مارکیٹ کا قیام چاہتے ہیں۔

تفصیلات کے مطابق ایران کے پارلیمانی دوستانہ گروپ کے وفد نے وزارت تجارت کادورہ کیا، احمد امیر عبادی کی زیر قیادت وفد نے مشیر تجارت عبدالرزاق داود سے ملاقات کی، اس موقع پردوطرفہ تجارت کے فروغ پر بات چیت کی گئی۔

مشیرتجارت رزاق دائود نے ایرانی وفد کوبتایا کہ دوطرفہ تجارت بڑھانے کے لئے نان ٹیرف بیرئیرز کو ہٹانا ہوگا، 2006 میں ہونے والے ترجیحاتی تجارتی معاہدے سے زیادہ فائدہ نہیں اٹھایا، ترجیحاتی تجارتی معاہدے سے دونوں ممالک کو فائدہ اٹھانا چاہیے۔

رزاق داﺅد نے کہاکہ حالیہ دورہ ایران اچھا رہا ،ایرانی وزیر تجارت معاشی تعاون کو فروغ دینے پر اچھی بات چیت ہوئی۔

احمد امیر عبادی کاکہناتھا کہ خطے میں معاشی استحکام کیلئے پاکستان ایران کو مل کر کام کرنا چاہے، وزیراعظم عمران خان کا دورہ ایران اور سپریم لیڈر سے ملاقات بہت بڑی اہمیت کی حامل رہی۔

انھوں نے کہا کہ جلد از جلد باہمی رضامندی سے بارٹر ٹریڈ کے لئے لائے عمل طے کرنا چاہئے، عراق کے ساتھ بارٹر پرمشترکہ مارکیٹ کا اچھا تجربہ رہا ہے، ہم پاکستان کے ساتھ بھی مشترکہ مارکیٹ کا قیام چاہتے ہیں۔

ایرانی حکام کا کہنا تھا اگلے ماہ ایران کے وزیر تجارت پاکستان کا دورہ کریں گے۔