بھارتی کپتان روہت شرما نے ون ڈے کرکٹ میں اہم اعزاز حاصل کر لیا اور وہ دنیا کرکٹ کے بڑے کرکٹرز کے منفرد کلب میں شامل ہوگئے۔
روہت شرما گزشتہ روز انگلینڈ کے خلاف ون ڈے سیریز کے دوسرے میچ میں جب میدان میں اترے تو وہ بطور بھارتی قائد ان کا 50 واں میچ تھا۔
یہ میچ کھیل کر وہ دھونی، اظہر الدین، گنگولی اور ٹنڈولکر جیسے عظیم کھلاڑیوں کی فہرست میں شامل ہوگئے جنہوں نے 50 سے زائد میچوں میں اپنی ٹیم کی قیادت کی ہے۔ وہ یہ سنگ میل عبور کرنے والے آٹھویں بھارتی قائد ہیں۔
بھارت کی تاریخ کے سب سے کامیاب کپتان ایم ایس دھونی سب سے زیادہ میچوں میں قیادت کرنے کا بھی اعزاز رکھتے ہیں۔ انہوں نے بطور قائد ون ڈے میچوں کی ڈبل سنچری مکمل کی۔ محمد اظہر الدین 174 میچوں میں قیادت کر کے اس فہرست میں دوسرے نمبر پر ہیں۔
سارو گنگولی نے 146، ویرات کوہلی نے 95، راہول ڈریوڈ نے 79، کپل دیو نے 74 اور سچن ٹنڈولکر نے 73 ون ڈے میچوں میں بلیو شرٹس کی قیادت کی ہے۔
روہت شرما نے 50 ون ڈے میچوں میں بھارتی ٹیم کی قیادت کرتے ہوئے 36 میچوں میں فتح حاصل کی اور ان کی جیت کا تناسب 72 فیصد ہے۔
واضح رہے کہ بھارتی ٹیم روہت شرما کی قیادت میں آئی سی سی چیمپئنز ٹرافی ہائبرڈ ماڈل کے تحت کھیلنے کے لیے 15 فروری کو دبئی روانہ ہوگی۔ میگا ایونٹ میں وہ اپنے سفر کا آغاز بنگلہ دیش کے خلاف میچ سے 20 فروری کو کرے گی۔
https://urdu.arynews.tv/saeed-anwar-on-success-of-hashim-amla-inzimam-and-muhammad-yousuf/
