کراچی : شہر قائد میں رینجرز اور سی ٹی ڈی نے بڑی کارروائی کرتے ہوئے جنداللہ گروپ کا اہم دہشت گرد خان بادشاہ عرف عمرفاروق عرف خان گرفتار کرلیا، ملزم سی ٹی ڈی کی جاری کردہ ریڈ بک میں مطلوب دہشت گرد ہے اور دہشت گردی کی متعددکارروائیوں میں ملوث بھی ہے۔
تفصیلات کےمطابق رینجرز اور سی ٹی ڈی نے کراچی کے علاقے شیرشاہ پراچہ چوک پر مشترکہ کارروائی کی ، کارروائی کے دوران جنداللہ گروپ کااہم دہشت گرد خان بادشاہ عرف عمرفاروق عرف خان گرفتار کرلیا گیا ہے۔
ترجمان رینجرز نے بتایا ملزم سی ٹی ڈی کی جاری کردہ ریڈ بک میں مطلوب دہشتگرد ہے، اس کاتعلق جنداللہ حاجی ممتازعرف حمزہ عرف جونی گروپ سے ہے اور ملزم نے دہشت گردی کی متعددکارروائیوں میں ملوث ہونے کا اعتراف بھی کیا ہے۔
ترجمان کے مطابق ملزم2007میں اسلحہ وزیرستان سےکراچی اسمگلنگ کرنےمیں ملوث ہے، اسلحہ شاہ لطیف ٹاؤن میں سی ٹی ڈی کےساتھ مقابلے میں استعمال کیاگیا۔
رینجرز کے ترجمان کا کہنا تھا ملزم راشدمہناس روڈپربینک سے17 لاکھ روپےلوٹنے، مسلم کمرشل بینک داؤدچورنگی برانچ میں30 لاکھ کی ڈکیتی اور کمرشل بینک ملیرہالٹ برانچ میں30 لاکھ کی ڈکیتی میں ملوث ہے جبکہ ملزم ڈکیتی کےدوران مزاحمت پرسیکیورٹی گارڈکوزخمی کرنےمیں بھی ملوث ہے۔
ترجمان نے بتایا ملزم کاشاہ لطیف میں پولیس سےمقابلہ ہواجس میں فرار ہوگیاتھا، اکتوبر 2013 میں ملزم اتحادٹاؤن میں ٹارگٹ کلنگ کی وارداتوں میں ملوث ہے، ملزم نےالحبیب بینک لیاقت مارکیٹ برانچ میں30 لاکھ کی ڈکیتی کی تھی اور ڈکیتی کےدوران مزاحمت پرپولیس اہلکاراور2سیکیورٹی گارڈز کو قتل کیا، ملزم نے دھماکا خیز مواد بنانے کی بھی تربیت حاصل کررکھی ہے۔
یاد رہے چند روز قبل بھی کاؤنٹر ٹیرر ازم ڈیپارٹمنٹ نے کراچی میں کارروائی کرتے ہوئے کالعدم تنظیم جنداللہ کے مطلوب دہشت گرد کو گرفتار کیا تھا ، راجا عمر خطاب نے کہا تھا محمد اسحاق عرف گل کانام ریڈبک میں شامل ہے۔
راجا عمرخطاب کے مطابق اسحاق کالعدم لشکر جھنگوی کے عطاالرحمان عرف نعیم بخاری کا پڑوسی تھا، ملزم دوہزار چھ میں کالعدم تنظیم جند اللہ میں شامل ہوا، افغانستان سے تربیت لی، گرفتارملزم کیخلاف متعدد مقدمات درج ہیں۔
