ARYNews.tv | Urdu – Har Lamha Bakhabar

Tag: اہم ملاقات

  • بھارتی جارحانہ رویہ، صدر آصف زرداری اور وزیراعظم شہباز شریف کی اہم ملاقات

    بھارتی جارحانہ رویہ، صدر آصف زرداری اور وزیراعظم شہباز شریف کی اہم ملاقات

    پاک بھارت موجودہ کشیدہ صورتحال کے درمیان صدر مملکت آصف علی زرداری اور وزیراعظم شہباز شریف کی اہم ملاقات ہوئی ہے۔

    اے آر وائی نیوز کے مطابق صدر مملکت اور وزیراعظم کی ملاقات ایوان صدر میں ہوئی، اس موقع پر نائب وزیراعظم اسحاق ڈار، وزیرقانون اعظم نذیرتارڑ بھی موجود تھے، ملاقات میں پہلگام واقعے کے تناظر میں سیکیورٹی صورتحال پر تبادلہ خیال کیا گیا۔

    بھارتی جارحانہ رویے اور اشتعال انگیز بیانات پرگہری تشویش کا اظہار کیا گیا، دنوں رہنمائوں نے ملکی علاقائی سالمیت اور خودمختاری کو ہر قیمت پر یقینی بنانے کا عزم ظاہر کیا۔

    پاک بھارت کشیدگی: پاک فوج کی جدید ہتھیاروں کیساتھ جنگی مشقیں جاری

    جاری اعلامیہ میں کہا گیا کہ افواج پاکستان کسی بھی جارحیت کا منہ توڑ جواب دینے کی صلاحیت رکھتی ہیں، پاکستانی قوم متحد ہے، اپنی مسلح افواج کے ساتھ کھڑی ہے۔

    اعلامیہ میں کہا گیا کہ بھارتی رویے سے علاقائی امن و استحکام کو خطرہ ہے، پاکستان علاقائی سالمیت اور خودمختاری پر کبھی سمجھوتا نہیں کریگا۔

    جاری اعلامیہ میں مزید کہا گیا کہ پاکستان کسی بھی قسم کی جارحیت کا منہ توڑ جواب دےگا، ملاقات میں ممکنہ بھارتی جارحیت پر پاکستان کے ردعمل کا بھی جائزہ لیا گیا۔

    https://urdu.arynews.tv/army-chief-response-to-india-immediate-forceful-talah-firing-ranges/

  • برطانوی وزیراعظم اور امریکی صدر کے درمیان اہم ملاقات آج ہوگی

    برطانوی وزیراعظم اور امریکی صدر کے درمیان اہم ملاقات آج ہوگی

    واشنگٹن : برطانوی وزیراعظم کیئر اسٹارمر آج وائٹ ہاؤس میں امریکی صدر ڈونلڈ ٹرمپ سے خصوصی ملاقات کریں گے۔

    نمائندہ اے آ روائی نیوز کے مطابق یورپی یونین سے کشیدگی پر ٹرمپ کی برطانوی وزیر اعظم سے ہونے والی ملاقات انتہائی اہمیت کی حامل ہے۔

    یورپی یونین کے المونیم اور اسٹیل پر پہلے ہی صدر ٹرمپ 25 فیصد ٹیرف عائد کرچکے ہیں جبکہ صدر ٹرمپ یورپ پر مزید ٹیرف عائد کرنے کا عندیہ بھی دے چکے ہیں۔

    صدر ٹرمپ کا کہنا ہے کہ یورپی یونین نے ہمیشہ سے امریکا کے ساتھ غیر منصفانہ رویہ رکھا۔

    یورپ کو امریکا کے روس کے ساتھ جنگ کے معاملے پر براہ راست بات چیت پر اعتراضات ہیں روس کے ساتھ مذاکرات میں بھی امریکا نے نہ تو یورپ کو اور نہ ہی یوکرین کو شامل کیا۔

    برطانوی وزیراعظم صدر ٹرمپ سے غزہ کی تازہ صورتحال پر بھی بات چیت کریں گے، برطانوی وزیراعظم دو ریاستی حل اور تعمیر نو کے بعد غزہ میں فلسطینیوں کی واپسی کے حامی ہیں۔

    یاد رہے کہ کیئر اسٹارمر نے 2016 میں کہا تھا کہ وہ کبھی ٹرمپ کے ساتھ کھانا بھی نہیں کھائیں گے جبکہ برطانوی وزیراعظم نے گزشتہ ستمبر میں ٹرمپ کے ساتھ کھانے پر 2 گھنٹے گزارے۔

    مزید پڑھیں : ’سب حیران ہو جائیں گے‘ امریکا نے یہودیوں کو غزہ کا منصوبہ بتا دیا

    برطانوی وزیر اعظم کیئر اسٹارمر 2029 تک اقتدار میں رہیں گے، ان کا طویل اقتدار ٹرمپ کے 4سال بھی دیکھے گا، برطانوی وزیراعظم اس ملاقات میں امریکا برطانیہ تعلقات کو مضبوط کرنے پربات کریں گے۔

  • صدر مملکت عارف علوی سے وزیر خزانہ اسحاق ڈار کی ملاقات

    صدر مملکت عارف علوی سے وزیر خزانہ اسحاق ڈار کی ملاقات

    اسلام آباد: صدر مملکت عارف علوی سے وزیر خزانہ اسحاق ڈار نے اہم ملاقات کی ہے۔

    ایوانِ صدر کے اعلامیے کے مطابق یہ ملاقات ایوان صدر میں ہوئی، جہاں ملکی معاملات پر دونوں نے بات چیت کی،  وزیر خزانہ نے صدر مملکت کو ملکی معاشی اور مالی صورتحال پر بریفنگ دی۔

    اعلامیے میں بتایا گیا ہے کہ صدر مملکت کو سیلاب متاثرہ علاقوں اور متاثرین کی بحالی سے متعلق بھی بریفنگ دی گئی۔

    اعلامیے میں بتایا گیا ہے کہ وزیر خزانہ اسحاق ڈار نے آئندہ ہونے والے اہم فیصلوں پر  صدر مملکت کو اعتماد میں لیا۔

    جبکہ ذرائع کا کہنا ہے کہ ملاقات میں اقتصادی مسائل کیساتھ اہم تعیناتی کے معاملے پر بھی گفتگو ہوئی جبکہ پی ٹی آئی اور حکومت کے درمیان کشیدگی کم کرنے پر بھی صدر مملکت اور وزیر خزانہ کے درمیان تبادلہ خیال کیا۔

    واضح رہے کہ اسحاق ڈار  نواز شریف کی ہدایت پر سیاسی رہنماؤں سے ملاقات کریں گے۔

  • آرمی چیف سے اہم ملاقات، سعودی نائب وزیردفاع پاک فوج کے معترف

    آرمی چیف سے اہم ملاقات، سعودی نائب وزیردفاع پاک فوج کے معترف

    راولپنڈی: پاک فوج کے شعبہ تعلقات عامہ (آئی ایس پی آر) نے کہا ہے کہ سعودی عرب کے نائب وزیر دفاع شہزادہ خالد بن سلمان نے جنرل ہیڈ کوارٹر (جی ایچ کیو) کا دورہ کیا اور آرمی چیف جنرل قمر جاوید باجوہ سے خصوصی ملاقات کی۔

    اے آر وائی نیوز کے مطابق آئی ایس پی آر کا کہنا ہے کہ آرمی چیف جنرل قمر جاوید باجوہ اور سعودی عرب کے نائب وزیر دفاع کے درمیان ہونے والی ملاقات میں باہمی دلچسپی، دفاع اور سیکیورٹی تعاون پر تبادلہ خیال کیا گیا۔

    اس دوران سعودی نائب وزیر دفاع نے پاک فوج کی پیشہ ورانہ مہارتوں کی تعریف کی اور خطے میں امن کے لیے پاکستان کی کوششوں کی مکمل حمایت کا اعلان بھی کیا۔

    آرمی چیف سے مصر کے وزیردفاع کی ملاقات، اہم امور پر تبادلہ خیال

    آئی ایس پی آر نے بتایا کہ ملاقات میں مقبوضہ کشمیر کی صورت حال پر بھی تبادلہ خیال کیا گیا، دریں اثنا تربیتی پروگرام اور علاقائی سیکیورٹی کی صورت حال زیر غور آئی۔ شہزادہ خالد بن سلمان نے خطے میں امن واستحکام اور انسداد دہشت گردی کے لیے پاکستان کی کوششوں کی تعریف کی۔

    پاک فوج کا کہنا ہے کہ سعودی نائب وزیردفاع کی جی ایچ کیو آمد پر گارڈ آف آنر پیش کیا گیا۔

    خیال رہے کہ 26 فروری کو آرمی چیف جنرل قمر جاوید باجوہ سے مصر کے وزیردفاع جنرل محمد احمد ذکی نے ملاقات کی تھی، اس دوران اہم امور پر تبادلہ خیال کیا گیا تھا۔

  • وزیر اعظم عمران خان اور آرمی چیف جنرل قمر جاوید باجوہ کی ملاقات

    وزیر اعظم عمران خان اور آرمی چیف جنرل قمر جاوید باجوہ کی ملاقات

    اسلام آباد: وزیر اعظم عمران خان سے آرمی چیف جنرل قمر جاوید باجوہ کی ملاقات ہوئی۔ ملاقات میں مقبوضہ کشمیر سمیت خطے کی تازہ صورتحال پر غور کیا گیا۔

    تفصیلات کے مطابق وزیر اعظم عمران خان سے آرمی چیف جنرل قمر جاوید باجوہ کی ملاقات ہوئی۔ ملاقات میں وزیر اعظم کے دورہ سعودی عرب اور امریکا میں جنرل اسمبلی اجلاس کے امور پر تبادلہ خیال ہوا۔

    سیاسی و عسکری قیادت کے درمیان ہونے والی ملاقات میں مقبوضہ کشمیر سمیت خطے کی تازہ صورتحال پر بھی گفتگو ہوئی۔

    یاد رہے کہ چند دن قبل وزیر اعظم عمران خان نے الجزیرہ کو انٹرویو دیتے ہوئے کہا تھا کہ پاکستان اور بھارت میں روایتی جنگ ہوئی تو اختتام ایٹی جنگ ہوگا۔ ہتھیار ڈالنے اور آزادی میں انتخاب کرنا ہوا تو پاکستانی آخری دم تک لڑیں گے۔

    وزیر اعظم کا کہنا تھا کہ ایٹمی جنگ کے نتائج بھیانک ہوں گے۔ ایٹمی جنگ سے بچنے کے لیے عالمی برادری کو کردار ادا کرنا ہوگا۔ ہم نے اقوام متحدہ میں معاملہ اٹھایا۔

    انہوں نے کہا تھا کہ جب 2 ایٹمی طاقتیں لڑیں گی تو اختتام بھیانک ہوگا۔ ایٹمی جنگ کے نتائج پوری دنیا میں پھیلیں گے۔ عالمی سطح پر مسئلے کو اسی لیے اٹھایا کہ جنگ سے بچا جائے۔

  • عالمی ایلچی کی یمنی نائب صدر سے اہم ملاقات، مذاکرات کی ضرورت پر زور

    عالمی ایلچی کی یمنی نائب صدر سے اہم ملاقات، مذاکرات کی ضرورت پر زور

    صنعاء : یمنی حکومت کے نائب صدر علی محسن الاحمر نے اقوام متحدہ کے خصوصی ایلچی سے ملاقات کے دوران کہا کہ ’حوثیوں کو جنگ بندی معاہدے کے تحت الحدیدہ اوردیگربندرگاہوں سے نکلنے پرمجبورکیاجائے‘۔

    تفصیلات کے مطابق یمن کی آئینی حکومت کے نائب صدر علی محسن الاحمر نے سعودی عرب کے شہر جدہ میں اقوام متحدہ کے یمن کےلیے خصوصی ایلچی مارٹن گریفیتھس کے ساتھ اہم ملاقات کی ہے ۔ یمنی حکومت اور یو این مندوب کے درمیان دو ماہ کے بعد یہ پہلی ملاقات ہے۔

    غیر ملکی خبر رساں ادارے کا کہنا تھا کہ یمن کی آئینی حکومت نے اقوام متحدہ کے ایلچی پر عدم تعاون اور حوثی باغیوں کے جرائم پر نرم رویہ برتنے کے الزامات عاید کرنے کے بعد ان کا بائیکاٹ کردیا تھا۔

    عرب ٹی وی کے مطابق یمن کے نائب صدر علی محسن الاحمر نے سویڈن میں طے پائے جنگ بندی معاہدے کے تحت حوثیوں کو الحدیدہ اور دوسری بندرگاہوں سے اپنے جنگجو نکالنے اور معاہدے کی پاسدارای پر زور دیا۔

    غیر ملکی خبر رساں ادارے کا کہنا تھا کہ حوثیوں کی طرف سے یک طرفہ طور پرالحدیدہ سے انخلاءکو آئینی حکومت کی طرف سے ایک ڈرامہ قرار دیا، اس کے ساتھ ساتھ آئینی حکومت نے یو این ایلچی پر حوثیوںکی طرف داری کا بھی الزام عاید کیا تھا۔

    یمنی حکومت نے اقوام متحدہ کے سیکرٹری جنرل کی طرف سے عالمی ادارے کی جانب سے سویڈن معاہدے پر عمل درآمد کرانےاور آئینی حکومت کی تجاویز پرعمل درآمد پر زور دینے کا خیر مقدم کیا۔

    یمن کی سرکاری نیوز ایجنسی کے مطابق یواین ایلچی کو بتایا گیا کہ آئینی حکومت ہی ملک کی حقیقی نمائندہ ہے، اقوام متحدہ اور یمن کی آئینی حکومت کے درمیان روابط امن عمل آگے بڑھانے کےلیے کلید ثابت ہوسکتے ہیں۔

    مقامی میڈیا کا کہنا تھا کہ ملاقات میں یمن کے نائب صدر نے کہا کہ ان کی حکومت اقوام متحدہ کے ساتھ مل کر امن عمل کو صحیح ٹریک پر لانے اور تین بنیادی مطالبات اور سویڈن معاہدے پرعمل درآمد کے لیے ہرممکن تعاون جاری رکھے گی۔

    یو این مندوب سے ملاقات کے دوران نائب صدر نے حوثیوں کی جانب سے ملک میں جاری انسانی حقوق کی سنگین پامالیوں پر روشنی ڈالی۔

    ان کا کہنا تھا کہ ایرانی حمایت یافتہ حوثی ملیشیا پڑوسی برادر ملک سعودی عرب پر بیلسٹک میزائلوں اور ڈرون طیاروں کے ذریعے حملوں کے ساتھ عالمی بحری جہاز رانی کے لیے خطرہ ثابت ہو رہے ہیں۔

    سعودی عرب کے شہر جدہ میں ہونےوالی ملاقات میں اقوام متحدہ کے ایلچی نے خلیجی امن فارمولے اور اس کے انتظامی میکنزم پرعمل درآمد یقینی بنانے، نیشنل ڈائیلاگ کانفرنس کے فیصلوں پرعمل کرنے اور سلامتی کونسل کی قرارداد 2216 پرعمل درآمد کرتے ہوئے یمن کے متحارب فریقین کے درمیان تعطل کا شکار بات چیت کی بحالی کی کوششیں تیز کرنے کی یقین دہانی کرائی۔

  • یورپی حکام کی بریگزٹ معاہدے کو حتمی شکل دینے کے لیے اہم ملاقات

    یورپی حکام کی بریگزٹ معاہدے کو حتمی شکل دینے کے لیے اہم ملاقات

    لندن : بریگزٹ معاہدے کو حتمی شکل دینے اور اسپین کے مطالبے پر جبل الطارق کے مستقبل کے حوالے سے گفتگو کرنے کے لیے یورپی یونین کے سربراہ ملاقات کررہے ہیں۔

    برطانوی خبر رساں ادارے کا کہنا ہے کہ اسپین کے وزیر اعظم پیڈرو سینچیز بریگزٹ معاہدے کے حوالے سے اپنی پوزیشن کو مزید واضح طور پر پیش کریں گے، ممکن ہے کہ اتوار کو ریاست کے رکن ہونے کی حیثیت سے معاہدے پر دستخط کر دیں۔

    برطانوی میڈیا کا کہنا ہے کہ کوئی ملک اس معاہدے کو ویٹو نہیں کرے گا تاہم یورپی یونین اس معاہدے کی متفقہ طور پر منظوری دی ہے۔

    برطانوی وزیر اعظم تھریسامے کا کہنا ہے کہ بریگزٹ کے متعلق معاہدہ پوری طرح ہمارے ہاتھ میں ہے لیکن برطانیہ کے ساتھ بریگزٹ سیکریٹری ڈومینک راب نے کہا ہے کہ مذکورہ پیش کش یورپی یونین کی رکنیت سے کمتر ہے۔

    برطانوی میڈیا کا کہنا ہے کہ یورپی سربراہوں کی جانب سے اتوار کو منعقد ہونے والے اجلاس میں قانونی پابندی کے ساتھ ساتھ برطانیہ کے یورپ سے خارج ہونے کی شرائط اور مستقبل میں یورپ اور برطانیہ کے تعلقات کے حوالے سے بحث ہوگی۔

    مقامی میڈیا کے مطابق برطانوی ایم پیز کی جانب سے بریگزٹ سے متعلق معاہدے کو شدید تنقید کا نشانہ بنایا جارہا ہے کیوں کہ ان کے مطابق اس معاہدے میں بہت کمیاں اور خامیاں ہیں۔

    مزید پڑھیں : برطانیہ اور یورپی یونین کے درمیان مستقبل کے تعلقات پر اتفاق

    خیال رہے کہ کچھ دیر قبل برطانوی وزیر اعظم نے مشترکا اعلامیے پر اتفاق رائے ہونے کے بعد کہا ہے کہ اب یورپی یونین کی ہفتے کے اختتام پر اجلاس کی راہ ہموار ہوگئی ہے اور اتوار کے روز ہونے والے اسی اجلاس میں معاہدے کی تصدیق کی جائے۔

    برطانوی میڈیا کا کہنا ہے کہ تھریسا مے نے بریگزٹ سے متعلق معاہدے کو برطانیہ کے مفاد میں بہترین قرار دیا ہے۔

    برطانوی وزیر اعظم تھریسا مے کا کہنا ہے کہ بریگزٹ ڈیل شہریوں کے مفاد میں بھی اچھی ثابت ہوگی جبکہ اس معاہدے کے نتیجے میں ان کا مستقبل بھی بہترین ہوگا۔

  • تاریخی ملاقات کے بعد جنوبی اور شمالی کوریا کے درمیان تعلقات میں بہتری آنے لگی

    تاریخی ملاقات کے بعد جنوبی اور شمالی کوریا کے درمیان تعلقات میں بہتری آنے لگی

    سیئول: شمالی کوریا کے رہنما کم جونگ ان اور جنوبی کوریا کے سربراہ مون جے ان کے درمیان ہونے والی تاریخی ملاقات کے بعد دونوں ملکوں کے تعلقات میں بہتری آنے لگی۔

    تفصیلات کے مطابق شمالی اور جنوبی کوریائی ممالک گذشتہ کئی سالوں سے ایک دوسرے کے حریف رہے ہیں، ماضی میں ایک دوسرے کے ملکوں کو تباہ کرنے جیسی سنگین دھمکیاں بھی دے چکے تھے۔

    غیر ملکی خبر رساں ادارے کے مطابق جنوبی کوریائی صدر کے خصوصی مندوب آج شمالی کوریا کے سربراہ کم جونگ ان سے ملاقات کریں گے اور جنوبی کوریا کے صدر کا خط انہیں پیش کریں گے۔

    مذکوہ خط سے متعلق حکام نے کوئی تفصیلات فراہم نہیں کیں، جبکہ بین الاقوامی تعلقات کے ماہرین کا کہنا ہے کہ مون جے ان شمالی کوریا کے جوہری ہتھیاروں کے حوالے سے اپنا پیغام دیں گے۔

    خیال رہے کہ مون جے ان اور کم جونگ ان نے تاریخی ملاقات رواں سال اپریل میں کی تھی، صدر شمالی کوریا خصوصی ملاقات کے لیے جنوبی کوریا پہنچے تھے۔

    کم جونگ ان کی جنوبی کوریا آمد، پرتباک استقبال، تاریخی ملاقات

    بعد ازاں دونوں رہنماؤں نے مشترکہ پریس کانفرنس کرتے ہوئے باہمی جنگ کے خاتمے کے اعلان کے ساتھ ساتھ جوہری ہتھیاروں کے عدم پھیلاؤ پر بھی اتفاق کیا تھا۔

    واضح رہے کہ سرحدی علاقوں میں لوگوں کی جانب سے دونوں رہنماؤں کی ملاقات کے حق اور مخالفت میں مظاہرے بھی کیے گئے تھے، جبکہ عالمی ماہرین نے موقف اختیار کیا تھا کہ دونوں رہنماؤں کی ملاقات خطے کے لیے موثر ثابت ہوگی اور جنگی صورت حال کے خاتمے کا پہلا قدم ہوگا۔

  • عمران خان کی طاہرالقادری سے آج اہم ملاقات

    عمران خان کی طاہرالقادری سے آج اہم ملاقات

    لاہور : پاکستان عوامی تحریک کے سربراہ ڈاکٹرطاہرالقادری اورعمران خان کے درمیان ملاقات آج ہوگی، جس میں تیس دسمبر کو ہونے والی اے پی سی میں کپتان کی شرکت پر مشاورت کی جائے گی۔

    تفصیلات کے مطابق سانحہ ماڈل ٹاؤن کے خلاف احتجاج کے فیصلہ کن موڑ پر ڈاکٹرطاہرالقادری اورعمران خان کے درمیان آج اہم ملاقات کل ہوگی، ملاقات ساڑھےتین بجےعوامی تحریک کےسیکریٹریٹ میں ہوگی، جس میں تیس دسمبر کو ہونے والی اے پی سی میں کپتان کی شرکت پر مشاورت کی جائے گی۔

    ڈاکٹرطاہرالقادری کپتان کو 30 دسمبر کو ہونے والی اے پی سی میں شرکت پرراضی کرنےکی سرتوڑ کوشش کریں گے اور اے پی سی کے اہم نکات پراعتمادمیں لیں گے جبکہ پیپلزپارٹی کانفرنس میں شرکت کاعندیہ پہلے ہی دے چکی ہے۔

    اے پی سی میں پی پی،پی ٹی آئی سمیت 35جماعتوں کی قیادت شریک ہوگی، طاہرالقادری تمام جماعتوں کواعتمادمیں لیکرآئندہ کےلائحہ عمل کا اعلان کرینگے۔

    پارٹی ذرائع کے مطابق طاہرالقادری ازخود کوئی فیصلہ نہیں کرناچاہتے، جوبھی فیصلہ ہوگا تمام جماعتوں کامتفقہ فیصلہ ہوگا، سانحہ ماڈل ٹاؤن کے شہدا کو انصاف کیلئے احتجاج ہر صورت ہوگا۔

    ذرائع کا کہنا ہے کہ سانحہ ماڈل ٹاؤن کے متاثرین کو انصاف دلانے کے لیے احتجاجی تحریک کا مرکز لاہور کو بنائے جانے کا امکان ہے ، احتجاج کی صورت اورطریقہ کار اے پی سی میں طے کیا جائے گا، اےپی سی میں آصف زرداری اوربلاول بھٹوشریک ہوں گے جبکہ عمران خان سمیت دیگر جماعتوں کے مرکزی رہنما بھی شریک ہونگے۔

    مزید پڑھیں : طاہر القادری نے 28 دسمبر کو کُل جماعتی کانفرنس طلب کرلی

    دوسری جانب ڈاکٹرطاہرالقادری کے کنٹینرکی صفائی کرالی گئی جبکہ کنٹینر پر رنگ و روغن کا کام بھی جاری ہے۔

    یاد رہے کہ سربراہ پاکستان عوامی تحریک ڈاکٹر طاہر القادری نے پریس کانفرنس میں کہا تھا کہ 28 دسمبر کو کُل جماعتی کانفرنس کا انعقاد کر رہے ہیں جہاں اپنا لائحہ عمل پیش کرکے دیگر سیاسی جماعتوں سے رائے لیں گے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • وزیراعظم نواز شریف کی بحرین کے وزیر اعظم سے ون ٹو ون ملاقات

    وزیراعظم نواز شریف کی بحرین کے وزیر اعظم سے ون ٹو ون ملاقات

    مناما: وزیراعظم نواز شریف نے بحرین کے وزیراعظم شیخ خلیفہ بن سلمان الخلیفہ سے ملاقات کی۔

    وزیر اعظم نواز شریف نے قضیبیہ پیلس میں بحرین کے وزیراعظم شیخ خلیفہ بن سلمان الخلیفہ کے ساتھ ون ٹو ون ملاقات کی، جس میں نواز شریف کا کہنا تھا کہ پاکستان بحرین کے ساتھ اقتصادی تعلقات مزید بہتر بنانے کاخواہاں ہے اور پاکستان بالخصوص توانائی کے شعبے میں بحرین کی سرمایہ کاری کا خیر مقدم کرتا ہے۔

    وزیراعظم نے کہا کہ پاکستان اور بحرین متعدد علاقائی اور بین الاقوامی امور پر یکساں موقف رکھتے ہیں،اس موقع پر بحرین کے وزیراعظم نے بحرین کے استحکام اور سماجی و اقتصادی بہتری کے حوالے سے پاکستانی برادری کی خدمات کو سراہا۔