Tag: ایئرلیگ آف پی آئی اے

کراچی : ایئرلیگ آف پی آئی اے ایمپلائز سی بی اے کے مرکزی صدر شمیم اکمل نے انکشاف کیا ہے کہ پی آئی اے کی نیو یارک روٹ کی بندش کے بعد انتظامیہ یورپی روٹس بھی بند کرنے کا ارادہ رکھتی ہے۔

تفصیلات کے مطابق ایئرلیگ آف پی آئی اے ایمپلائز سی بی اے کا ہنگامی اجلاس مرکزی صدر شمیم اکمل کی صدارت میں کراچی میں ہوا، اجلاس میں نیو یارک روٹ کی بندش پر شدید تحفظات کا اظہار کیا گیا۔

شمیم اکمل کا کہنا تھا کہ نیو یارک روٹ کی بندش غیر جانبدارانہ فیصلہ ہے، نیو یارک کے بعد پی آئی اے انتظامیہ کا اگلا ہدف یورپی روٹس کی بندش ہے۔

اجلاس سے خطاب کرتے ہوئے شمیم اکمل کا مزید کہنا تھا کہ پی آئی اے کو ایک سازش کے تحت علاقائی ایئرلائن بنانے کی کوششں کی جارہی ہے۔

انہوں نے سوال کیا کہ پی آئی اے انتظامیہ کس کے ایجنڈے پر کام کر رہی ہے؟ ہم انہیں کسی بھی صورت کامیاب نہیں ہونے دیں گے۔

انہوں نے مطالبہ کیا کہ نیو یارک روٹس کی بندش کا فیصلہ فی الفور واپس لیا جائے، ایئرلیگ پی آئی اے اور ملازمین کے روزگار کے تحفظ کا بھرپور دفاع کریگی۔

انہوں نے کہا کہ اگر محکمہ ریلوے بحال ہوکر منافع بخش ادارہ بن سکتا ہے تو پی آئی اے کیوں منافع بخش کیوں نہیں بن سکتا؟ پی آئی اے کی ناتجربہ کار انتظامیہ ادارے کو تباہ کرنے پر تلی ہوئی ہے۔

مزید پڑھیں: پی آئی اے نے ’نیویارک آپریشن‘ قبل از وقت ختم کردیا

واضح رہے کہ قومی ایئر لائن کی انتظامیہ نے نیویارک اسٹیشن کی بندش کے معاملے سے بورڈ آف ڈائریکٹرز کو بھی آگاہ نہیں کیا تھا اور قبل از وقت ہی آپریشن ختم کردیا گیا۔27 اکتوبر کو منعقدہ اجلاس میں بورڈ آف ڈائریکٹرز نے پروازوں کی بندش کے معاملے پر آگاہ نہ کرنے سے متعلق اپنے تحفظات کا اظہار بھی کیا تھا۔