Tag: ایئر شو

کراچی : پاکستان اور برطانیہ کے سفارتی تعلقات کی 70ویں سالگرہ کے موقع پر پاک فضائیہ نے سی ویوو کراچی پر ایک مسحور کن فضائی مظاہرے کے انعقاد کیا جہاں پاکستانی تاریخ میں پہلی مرتبہ فخر پاکستان JF-17 تھنڈر کے ساتھ رائل فضائیہ کی بین الاقوامی شہرت یافتہ ایروبیٹکس ٹیم ریڈ ایرونے ایک دلچسپ فضائی مظاہرہ پیش کیا۔

اس موقع پر سی ویو پر گورنر سندھ، وزیر اعلیٰ سندھ، برٹش ہائی کمشنر،کورکمانڈر کراچی کے علاوہ سیاسی رہنما، پارلیمنٹیرینز، اعلیٰ سول اور عسکری حکام موجود تھے جنہوں نے یہ شاندار فضائی مظاہرہ دیکھا جب کہ  ائیر وائس مارشل حسیب پراچہ، ائیر آفیسر کمانڈنگ سدرن ائیر کمانڈ نے مہمانوں کا استقبال کیا۔

شو کا آغاز پاکستان میں تیار کردہ جے ایف 17  تھنڈر کے قابل دید فضائی مظاہرے سے ہوا جسے ونگ کمانڈر یاسر مدثر اڑا رہے تھے۔

جے ایف 17 تھنڈر کے منظر سے اوجھل ہوتے ہی رائل فضائیہ کی مشہور زمانہ ایروبیٹکس ٹیم ریڈ ایرو افق پر نمودار ہوئی،  سرخ رنگ کے ہاکس طیاروں میں سوار 9 ارکان پر مشتمل ٹیم کی قیادت اسکواڈرن لیڈر ڈیوڈ مونٹی نیگرو کر رہے تھے انہوں نے وہاں موجود حاضرین کو اپنے فضائی کرتبوں سے مبہوت کر دیا۔

قبل ازیں ریڈ ایرو ٹیم کے ارکان نے پاک فضائیہ کے پائلٹس اور اسکول اور کالجز کے طلبہ و طالبات سے ملاقات کی۔

ایئر شو کی مزید معلومات: رائل ایئرفورس ایروبیٹکس ٹیم ریڈایروز آج کراچی سی ویو پر فضائی کرتب دکھائےگی

خیال رہے کہ پاک فضائیہ 1947 میں تقسیم برصغیر سے رائل فضائیہ کے ساتھ دوستانہ تعلقات رکھتی ہے، دونوں فضائی افواج کے درمیان باہمی دوستانہ تعلقات کو اور مضبوط بنانے کے لیے دونوں طرف سے اعلیٰ سطح وفود اکثر و بیشتر دورے کرتے رہتے ہیں۔

اس سال کے آغاز میں رائل فضائیہ کے سربراہ ائیر چیف مارشل سر اسٹیفن جان ہیلیئر پی ایف اکیڈمی اصغر خان میں منعقدہ گریجویشن پریڈ میں بحیثیت مہمان خصوصی پاکستان کے دورے پر آئے اس دورے کے دوران انہوں نے پاک فضائیہ کے شہرہ آفاق نمبر 9 اسکواڈرن کا دورہ کیا جہاں انہوں نے F-16 طیارے میں بیٹھ کر ایک فضائی تربیتی مشن میں حصہ لیا۔

یاد رہے کہ پاک فضائیہ کے سربراہ ائیر چیف مارشل سہیل امان بھی رائل فضائیہ کی خصوصی دعوت پر برطانیہ کا دورہ کر چکے ہیں۔