بھارت کے خلاف پاک فضائیہ کی شاندار کامیابی کے بعد مقبول ہونے والے ایئر وائس مارشل اورنگزیب احمد کون ہیں؟
تفصیلات کے مطابق بھارت کے خلاف پاک فضائیہ کی شاندار کامیابی کے بعد ایئر وائس مارشل اورنگزیب احمد سوشل میڈیا پرچھاگئے۔
تمام سوشل میڈیا پلیٹ فارم پر بس ان کی تصاویراور ویڈیوز شیئر کی جارہی ہیں، ایئروائس مارشل کی جاندار اور دبنگ پریس بریفنگ میں اعتماد سے بھرپورانداز اور بھارت پر طنز بھرے جملے نے قوم کے دل جیت لیے۔
بھارت کے خلاف چھ صفر کی برتری کے جملے نے سوشل میڈیا پرنہ صرف میمزکی بھرمار کردی ہے بلکہ انہیں سماجی رابطوں کی سائیٹ ایکس پرٹاپ ٹین ٹرینڈز میں بھی شامل کردیا اور سوشل میڈیا صارفین ان کی بہادری کی تعریف کر رہے ہیں۔
مزید پڑھیں : پاکستان کو بھارت کے مقابلے 6 صفر سے کامیابی ملی، ایئر وائس مارشل اورنگزیب احمد
ایئر وائس مارشل اورنگزیب احمد نے دسمبر 1992 میں جنرل ڈیوٹی (پائلٹ) برانچ میں کمیشن حاصل کرتے ہوئے پی اے ایف میں اپنے ممتاز کیریئر کا آغاز کیا۔
کیریئر کے دوران انھوں نے فائٹر سکواڈرن اور ایک آپریشنل ایئر بیس کی قیادت کی جبکہ اسلام آباد میں ائیر ہیڈ کوارٹرز میں اسسٹنٹ چیف آف دی ائیر سٹاف (آپریشنل ریکوائرمنٹس اینڈ ڈویلپمنٹ) کے طور پر اہم اسٹریٹجک کرداروں میں بھی خدمات انجام دیں۔
انہوں نے چین کی ایک یونیورسٹی سے ملٹری آرٹس اور اسلام آباد کی نیشنل ڈیفنس یونیورسٹی سے نیشنل سیکیورٹی اینڈ وار اسٹڈیز میں ماسٹرز کی ڈگریاں حاصل کیں۔
ایئر وائس مارشل نے نیشنل ڈیفنس یونیورسٹی میں بطور ڈائرکٹنگ اسٹاف اور فیکلٹی ممبر کی حیثیت سے مستقبل کے فوجی لیڈروں کی تعلیم میں اپنا حصہ ڈالا ہے۔
ایئر وائس مارشل احمد کا تجربہ پاکستان کی سرحدوں سے باہر تک پھیلا ہوا ہے، انہوں نے سعودی عرب میں پاکستان ایروناٹیکل کمپلیکس ٹیم کے کنٹیجنٹ کمانڈر کے طور پر خدمات انجام دیں اور بین الاقوامی حالات میں اپنی قائدانہ صلاحیتوں کا مظاہرہ کیا۔
پی اے ایف میں ان کی خدمات میں ڈائریکٹر جنرل آف پبلک ریلیشنز (ڈی جی پی آر) اور ڈائریکٹر جنرل آف وارفیئر اینڈ اسٹریٹیجی کے طور پر خدمات انجام دینا بھی شامل ہے، اس وقت وہ ائیر ہیڈ کوارٹرز میں ڈپٹی چیف آف دی ائیر سٹاف (آپریشنز) کے اہم عہدے پر فائز ہیں۔
پاکستان ایئر فورس میں غیر معمولی خدمات کے اعتراف میں انہیں ستارہ امتیاز (ملٹری) سے بھی نوازا جا چکا ہے۔
واضح رہے بھارت اور پاکستان کے مابین حالیہ کشیدگی کے دوران پاکستان نے بھارتی جارحیت کا منہ توڑ جواب دیتے ہوئے ادھم پور، آدم پور اور شیر کوٹ ایئر بیسر سمیت ایئر فیلڈ کو تباہ کیا اور ملٹری چیک پوسٹوں کو نشانہ بنایا تھا۔
