اسلام آباد: وزیر خارجہ شاہ محمود قریشی کا کہنا ہے کہ مقبوضہ کشمیر میں انسانی بحران جنم لے رہا ہے، پاکستان ہمسایہ ممالک سے دوستانہ تعلقات چاہتا ہے لیکن بھارت سے تعلقات ہمیشہ مشکلات کا شکار رہے۔
تفصیلات کے مطابق وزیر خارجہ شاہ محمود قریشی نے وفاقی دارالحکومت کی ایئر یونیورسٹی میں تقریب سے خطاب کرتے ہوئے کہا کہ ہماری ترجیح عوام کے فلاح پر مبنی ایجنڈا ہے، بھارت نے اقوام متحدہ کی قراردادوں کے خلاف اقدام کیا۔
وزیر خارجہ کا کہنا تھا کہ مقبوضہ کشمیر کی خصوصی حیثیت ختم کردی گئی، غیر قانونی اقدام سے اب تک لاکھوں کشمیریوں پر پابندیاں عائد ہیں۔ مقبوضہ کشمیر میں انسانی بحران جنم لے رہا ہے۔
انہوں نے کہا کہ پاکستان ہمسایہ ممالک سے دوستانہ تعلقات چاہتا ہے، بھارت سے تعلقات ہمیشہ مشکلات کا شکار رہے۔ پاکستان کشمیریوں کی بنیادی حقوق کے لیے کی جانے والی جدوجہد میں ان کے ساتھ ہے۔
اس سے قبل ایک موقع پر شاہ محمود قریشی کا کہنا تھا کہ مقبوضہ کشمیر میں انسانی حقوق کی خلاف ورزیاں عروج پر ہیں، بھارت نے 80 لاکھ بے گناہ کشمیریوں کو محصور کر رکھا ہے۔
انہوں نے کہا تھا کہ 5 اگست سے بھارت نے مقبوضہ کشمیر میں کرفیو لگا کر رکھا ہے، برطانیہ سمیت عالمی برادری کو مقبوضہ کشمیر سے متعلق کردار ادا کرنا ہوگا۔
