ARYNews.tv | Urdu – Har Lamha Bakhabar

Tag: ایرانی سپریم لیڈر

  • ایران اور چین عالمی نظام بدلنے کی صلاحیت رکھتے ہیں، ایرانی سپریم لیڈر

    ایران اور چین عالمی نظام بدلنے کی صلاحیت رکھتے ہیں، ایرانی سپریم لیڈر

    تہران(یکم ستمبر 2025): ایرانی سپریم لیڈر آیت اللہ خامنہ ای نے کہا ہے کہ ایران اور چین عالمی نظام بدلنے کی صلاحیت رکھتے ہیں۔

    ایرانی صدر ڈاکٹر مسعود پزشکیان کے دورہ چین کے موقع پر ایرانی سپریم لیڈر آیت اللہ خامنہ ای نے چینی زبان میں سوشل میڈیا پر ایک پیغام جاری کیا ہے۔

    ایرانی سپریم لیڈر آیت اللہ خامنہ ای نے کہا کہ ایران اور چین، دونوں قدیم تہذیبی پس منظر رکھنے والے ممالک ہیں جو ایشیا کے دو سروں پر واقع ہیں، انہوں نے ایران اور چین کے درمیان اسٹریٹجک معاہدے کو عملی شکل دینے کی ضرورت پر زور دیا ہے۔

    ایران کے رہبر انقلاب نے اپنے بیان میں کہا کہ دونوں ملک خطے اور دنیا میں تبدیلی لانے کی طاقت رکھتے ہیں، ایران۔چین اسٹریٹجک معاہدے کے تمام پہلوؤں کو عملی جامہ پہنانا اس راستے کو ہموار کرے گا۔

    ایرانی وزارت امور خارجہ کا چینی میڈیا کو انٹرویو

    اس سے قبل ایرانی وزارت امور خارجہ کے ترجمان اسماعیل بقائی نے چینی خبر رساں ایجنسی شینہوا کے ساتھ گفتگو میں ایران و چین تعلقات، بیجنگ میں منعقدہ شنگھائی اجلاس اور اس بین الاقوامی تقریب میں اسلامی جمہوریہ ایران کے صدر مسعود پزشکیان کی شرکت پر روشنی ڈالی تھی۔

    ترجمان وزارت امور خارجہ نے اس انٹرویو میں شنگھائی تعاون تنظیم کو ایک ابھرتا ہوا بین الاقوامی گروہ قرار دیا اور کہا تھا کہ شنگھائی تعاون تنظیم کے رہنماؤں کے اہداف عالمی سطح پر قانون کی حاکمیت اور مشترکہ اقدار پر استوار ہیں۔

    ترجمان اسماعیل بقائی نے مزید کہا کہ ایران اور چین کے رہنماؤں کا عزم ہے کہ دوطرفہ تعلقات کو مزید تقویت دی جائے۔ دونوں ملکوں کا 25 سالہ معاہدہ نافذالعمل ہے اور ترقی کی جانب بڑھ رہا ہے۔

    انہوں نے دہشت گردی کو شنگھائی تعاون تنظیم کے تمام اراکین کے لیے ایک مشترکہ خطرہ قرار دیا اور کہا کہ شنگھائی تعاون تنظیم جنوبی ممالک کے درمیان تعاون کے لیے ایک نہایت مؤثر فریم ورک ثابت ہوسکتی ہے۔

    بقائی نے صدر مسعود پزشکیان کے بیجنگ کے دورے کو دوطرفہ تعلقات کی ترقی اور شنگھائی تعاون تنظیم میں ایران کے مقام و مؤقف کو مستحکم کرنے میں ایک سنگ میل قرار دیا تھا۔

  • اسرائیلی وزیر دفاع کی ایرانی سپریم لیڈر کو براہ راست نشانہ بنانے کی دھمکی

    اسرائیلی وزیر دفاع کی ایرانی سپریم لیڈر کو براہ راست نشانہ بنانے کی دھمکی

    تل ابیب(28 جولائی 2025): اسرائیلی وزیر دفاع کاٹز نے ایران کے سپریم لیڈر آیت اللہ علی خامنہ ای کو براہ راست شہید کرنے کی دھمکی دے دی۔

    اسرائیلی وزیر دفاع کاٹز نے اتوار کو رامون ایئر فورس بیس کا دورہ کرتے ہوئے کہا کہ اگر ایران نے اسرائیل کو دھمکیاں دیں تو اسرائیل کی فضائیہ ایک بار پھر تہران تک پہنچے گی، اور اس بار یہ حملہ شخصی طور پر خامنہ ای تک پہنچے گا۔

    اسرائیلی اخبار کو انٹرویو میں کاٹز کا کہنا تھا کہ خامنہ ای کو ایک واضح پیغام دینا چاہتا ہوں اگر ایران نے اسرائیل کو دوبارہ دھمکانے کی کوشش کی تو تہران پر دوبارہ اسرائیلی حملے ہوں گے اور اس بار نشانہ خامنہ ای خود ہوں گے۔

    میڈیا رپورٹ کے مطابق اسرائیلی دھمکی پر ایرانی حکام کی جانب سے فوری طور پر کوئی تبصرہ نہیں کیا گیا ہے۔

    یاد رہے کہ اسرائیل اور ایران کے درمیان 12 روزہ تنازعہ 13 جون کو اس وقت شروع ہوا جب اسرائیل نے ایرانی فوجی اور جوہری مقامات پر فضائی حملے کیے جس کے بعد تہران نے بھی بھر پور جوابی کارروائی کی، یہ تنازعہ 24 جون کو نافذ ہونے والی امریکی سرپرستی میں جنگ بندی کے تحت رک گیا تھا۔

  • ایرانی سپریم لیڈر کی تقریر، ٹرمپ نے ایران پر پابندیوں میں نرمی کا فیصلہ ترک کردیا

    ایرانی سپریم لیڈر کی تقریر، ٹرمپ نے ایران پر پابندیوں میں نرمی کا فیصلہ ترک کردیا

    واشنگٹن : ایرانی سپریم لیڈر کی تقریر کے بعد امریکی صدر ڈونلڈ ٹرمپ نے ایران پرپابندیوں میں نرمی کا فیصلہ ترک کردیا۔

    تفصیلات کے مطابق امریکی صدر ڈونلڈ ٹرمپ نے ایرانی سپریم لیڈرکی تقریر کے بعد ایران پرپابندیوں میں نرمی کا فیصلہ ترک کرتے ہوئے کہا کہ گزشتہ دنوں پابندیاں ہٹانے اور دیگر چیزوں پر کام کر رہا تھا، میرے اقدامات سے ایران کو مستحکم بحالی کا بہتر موقع مل سکتا تھا لیکن غصے، نفرت اور بیزاری سے بھرے بیان نے میرا یہ کام فوراً رکوا دیا۔

    امریکی صدر کا کہنا تھا کہ انہوں نے ایرانی سپریم لیڈر کو بچایا لیکن انہوں نے شکریہ تک ادا نہیں کیا، جانتا تھا کہ آیت اللہ خامنہ ای نے کہاں پناہ لی ہوئی ہے، مین نے ان کی جان بچائی ، میں نے اسرائیل اورامریکی افواج کوخامنہ ای کو ہدف بنانے سے روکا۔

    انھوں نے مزید کہا کہ جنگ جیتنے سے متعلق ایرانی سپریم لیڈر کا بیان جھوٹ ہے، ایک ایماندار شخص کےلیے جھوٹ بولنا مناسب نہیں۔

    ڈونلڈ ٹرمپ کا کہنا تھا کہ ایرانی سپریم لیڈر نے جنگ جیتنے کا جھوٹا دعویٰ کیا حالانکہ ان کے ملک کو تباہ کر دیا گیا، ایران کی 3 جوہری تنصیبات کو مکمل طور پر تباہ کر دیا گیا ہے۔

    امریکی صدر نے کہا کہ ایرانی قیادت ان سے ملاقات کرنا چاہتی ہے، اگر جوہری سرگرمیاں دوبارہ شروع کرنےکی کوشش کی تو ایران پر پھر حملے سے گریز نہیں کریں گے، ایران اگر عالمی نظام کاحصہ نہیں بنا تو اس کی حالت مزید خراب ہوگی۔
    .

  • امریکی صدر ٹرمپ کا ایرانی سپریم لیڈر کے بیان پر ردعمل

    امریکی صدر ٹرمپ کا ایرانی سپریم لیڈر کے بیان پر ردعمل

    واشنگٹن: امریکی صدر ڈونلڈ ٹرمپ نے ایرانی سپریم لیڈر آیت اللّٰہ علی خامنہ ای کے ویڈیو پیغام پر سوشل میڈیا پر ردعمل دیا ہے۔

    ایرانی سپریم لیڈر آیت اللّٰہ علی خامنہ ای کے بیان پر ردعمل میں امریکی صدر ٹرمپ نے سوشل میڈیا پر بیان میں کہا ایران امریکی حملے سے پہلے جوہری سائٹ سے کچھ بھی باہر نہیں لے جایا گیا تھا۔

    امریکی صدر نے امریکی حملے سے پہلے ایران کے جوہری سائٹ سے کچھ بھی منتقل نہیں کیا گیا، جوہری تنصیب سے کوئی بھی چیز باہر نکالنے میں بہت وقت لگتا ہے، یہ بہت خطرناک، بہت بھاری اور منتقل کرنا مشکل بھی تھا۔

    ایران اسرائیل کشیدگی سے متعلق تمام خبریں

    صدر ٹرمپ نے کہا حملے سے قبل سائٹ کے باہر بڑی تعداد میں کاروں اور ٹرکوں کی سیٹلائٹ تصاویر میں صرف یہ دکھایا گیا ہے کہ عملہ فردو کو کنکریٹ سے بچانے کی کوشش کر رہا ہے، وہ گاڑیاں مزدوروں کی تھیں جو شافٹس کو ڈھک رہے تھے۔

    دوسری جنب پینٹاگون کی بریفنگ میں بھی ایران پر حملے کو کامیاب قرار دیا گیا ہے، جبکہ امریکی وزیر دفاع نے کہا تھا کہ ایرانی تنصیبات سے افزودہ یورینیم کی منتقلی کا علم نہیں۔

    امریکی وزیر دفاع پیٹ ہیگستھ نے گزشتہ روز پریس بریفنگ میں کہا تھا کہ میں کسی ایسی انٹیلی جنس سے واقف نہیں ہوں جس کا میں نے جائزہ لیا ہو جس میں کہا گیا ہو کہ جوہری تنصیبات وہاں نہیں تھی جہاں انہیں ہونا چاہیے تھا۔

    واضح رہے کہ گزشتہ روز ایرانی سپریم لیڈر آیت اللّٰہ علی خامنہ ای نے کہا تھا کہ امریکا جوہری مقامات کو نشانہ بنا کر کچھ زیادہ حاصل نہیں کرسکا ہے۔

  • کسی بھی جارحیت کو قبول نہیں کریں گے، آیت اللہ خامنہ ای

    کسی بھی جارحیت کو قبول نہیں کریں گے، آیت اللہ خامنہ ای

    تہران : ایرانی سپریم لیڈر  آیت اللہ خامنہ ای کہا ہے کہ کسی بھی حالت میں کسی کی بھی جارحیت کو قبول نہیں کریں گے۔

    قطر میں امریکی فوجی اڈے پر میزائل حملے کے بعد سوشل میڈیا پر جاری ایک بیان میں  آیت اللہ خامنہ ای  نے کہا کہ ہم نے کسی سے زیادتی نہیں کی۔

    انہوں نے کہا کہ کسی بھی حالت میں کسی کی زیادتی کو کسی صورت قبول نہیں کرتے، کسی کی جارحیت کے سامنے سر نہیں جھکائیں گے، یہ ایرانی قوم کی منطق ہے۔

     آیت اللہ خامنہ ای کا سوشل میڈیا پر بیان 

    یاد رہے کہ ایران نے مشرق وسطیٰ میں امریکی اڈوں پر حملہ کردیا، ایران نے قطر کے العدید ایئربیس پر 10میزائل داغے۔ عراق میں بھی امریکی اڈے پر میزائل حملہ کیا گیا۔

    غیر ملکی میڈیا رپورٹس کے مطابق ایران نے اس کارروائی کو "آپریشن بشارتِ فتح” کا نام دیا ہے، بحرین اور کویت میں بھی سائرن بج اٹھے قطر نے ایرانی حملے سے پہلے فضائی حدود بند کردی گئی تھیں۔

    ایران، اسرائیل اور امریکی تنازع سے متعلق تمام خبریں جاننے کے لیے کلک کریں

    یو اے ای، بحرین اور کویت نے بھی اپنی فضائی حدود بند کردیں ایران نے حملے سے پہلے واشنگٹن اور دوحہ کو آگاہ کردیا تھا، رائٹرز کے مطابق یہ کارروائی وائٹ ہاؤس اور اتحادیوں کیلئے واضح پیغام ہے، پاسداران انقلاب حملوں کے بعد تہران میں شہریوں نے جشن منایا گیا۔

  • ایرانی سپریم لیڈر کا صہیونی دشمن کو سخت سزا دینے کا اعادہ

    ایرانی سپریم لیڈر کا صہیونی دشمن کو سخت سزا دینے کا اعادہ

    ایرانی سپریم لیڈر آیت اللّٰہ علی خامنہ ای کا ایران پر اسرائیلی حملوں میں امریکا کی شمولیت کے بعد پہلا بیان منظر عام پر آگیا ہے، صہیونی دشمن کو سخت سزا دینے کا اعادہ کرلیا۔

    غیر ملکی ذرائع ابلاغ کے مطابق سماجی رابطے کی ویب سائٹ ایکس پر ایرانی سپریم لیڈر نے اپنے فارسی زبان کے اکاؤنٹس سے پوسٹ شیئر کی جس میں انہوں نے اسرائیل کو سخت سزا دینے کے عزم کا اظہار کیا۔

    اُنہوں نے ’آپریشن مڈ نائٹ ہیمر‘ پر ردعمل دیتے ہوئے اپنے آفیشل سوشل میڈیا اکاؤنٹ سے پوسٹ شیئر کرتے ہوئے لکھا کہ سزا جاری ہے۔

    آیت اللہ خامنہ ای نے کہا کہ صہیونی دشمن نے سنگین غلطی کی ہے، ایک بڑا جرم کیا ہے۔ اسے سزا ملنی چاہیے اور اسے اب سزا دی جائے گی۔

    واضح رہے کہ گزشتہ روز اقوام متحدہ میں ایرانی مندوب امیر سعید ایروانی کا کہنا تھا کہ امریکی حملے کا مناسب جواب دیا جائے گا۔

    اقوام متحدہ کی سلامتی کونسل کے ہنگامی اجلاس سے خطاب کرتے ہوئے ان کا کہنا تھا کہ ایران پر امریکی حملہ عالمی قوانین کی سنگین خلاف ورزی ہے۔

    انہوں نے کہا کہ اپنے ملک کے خلاف جارحیت کی شدید مذمت کرتا ہوں، امریکا کی سیاسی تاریخ پر ایک بار پھر دھبہ لگ گیا، اسرائیلی وزیر اعظم نیتن یاہو امریکی خارجہ پالیسی کو ہائی جیک کرنے میں کامیاب ہوگئے۔

    ایرانی مندوب کا کہنا تھا کہ امریکا نے پھر نیتن یاہو کیلئے اپنی سیکیورٹی خطرے میں ڈال دی، ایران نے کئی بار امریکا کو اس جنگ سے دور رہنے کیلئے خبردار کیا تھا۔

    انہوں نے خبردار کیا کہ ہماری فورسز اسرائیلی اور اتحادیوں کی جارحیت کا بھرپور جواب دیں گی، پرامن ممالک تاریخ کے درست موڑ پر کھڑے ہیں، پرامن مقاصد کیلئے نیو کلیئر انرجی کے حصول سے روکا جارہا ہے۔

    امیر سعید ایروانی نے کہا کہ دنیا ایران کے خلاف طاقت استعمال دیکھ رہی ہے، اسرائیلی جارحیت سے پورا خطہ غیر محفوظ ہوچکا ہے، اسرائیل ایران کے شہریوں اور انفراسٹرکچر کو نشانہ بنارہا ہے۔

    ایرانی مندوب سعید ایراوانی کا کہنا تھا کہ ایران پر امریکا کے تمام الزامات بے بنیاد اور سیاسی محرکات ہیں، ان کی کوئی قانونی بنیاد نہیں۔ ایٹمی عدم پھیلاؤ کے معاہدے کو سیاسی ہتھیار میں تبدیل کر دیا گیا، اسے جارحیت اور غیر قانونی اقدام کے طور پر استعمال کیا گیا۔

    خلیجی ریاستیں ہائی الرٹ ہو گئیں، بحرین نے اہم قدم اٹھا لیا

    انہوں نے مزید کہا کہ امریکی اقدامات سے عالمی امن خطرے میں پڑچکا ہے، ایران کی جوہری تنصیبات پر حملوں کے ذریعے نیتن یاہو کو بچانے کی کوشش گئی۔

  • اسرائیل کی ایرانی سپریم لیڈر کو قتل کی دھمکی، روس کا موقف آ گیا

    اسرائیل کی ایرانی سپریم لیڈر کو قتل کی دھمکی، روس کا موقف آ گیا

    ایران اسرائیل جنگ میں شدت آ گئی ہے ایسے میں روس نے خبردار کیا ہے کہ ایرانی سپریم لیڈر آیت اللہ خامنہ ای کے قتل سے پنڈورا باکس کھل جائے گا۔

    ایران اور اسرائیل کے درمیان جنگ کو ایک ہفتہ مکمل ہو گیا ہے اور دونوں جانب سے ایک دوسرے ممالک پر حملے جاری ہیں۔ جس میں دو فریقین کا بھاری جانی اور مالی نقصان ہو رہا ہے۔

    ایرانی حملوں میں اسرائیل کو یومیہ کتنا معاشی نقصان ہو رہا ہے؟

    گزشتہ روز اسرائیلی وزیر دفاع کاٹز نے ایران کے سپریم لیڈر آیت اللہ خامنہ ای کو قتل کرنے کی براہ راست دھمکی دی تھی، جس پر روس کا ردعمل بھی سامنے آ گیا ہے۔

    روس کے صدارتی محل کریملن کے ترجمان دمتری پیسکوف نے کہا ہے کہ ایران کے سپریم لیڈر خامنہ ای کے قتل کی بات کرنے والے ذہن میں رکھیں کہ اس سے پنڈورا باکس کھل جائے گا۔

    دمتری بیسکوف نے کہا کہ اگر ایران کے سپریم لیڈر کو قتل کیا گیا تو انتہائی منفی ردعمل ہوگا اور ایران کے اندر سے ردعمل کو جنم دے گا۔ روس اس قتل سے متعلق کسی بھی عمل کی سختی سے مخالفت کرے گا۔

    ترجمان کریملن نے یہ بھی کہا کہ ایران میں حکومت کی تبدیلی ناقابل تصور ہے۔ ایران میں حکومت کی تبدیلی پر بات کرنا بھی ہر کسی کے لیے ناقابل قبول ہونا چاہیے۔

    اس سے قبل لبنان کی مزاحمتی تنظیم حزب اللہ بھی ایرانی سپریم لیڈر کے قتل کی اسرائیلی اور امریکی دھمکیوں پر ردعمل کا اظہار کرتے ہوئے ایران سے مکمل اظہار یکجہتی کیا تھا اور متنبہ کیا تھا کہ اس کے تباہ کن نتائج ہوں گے۔

    اسرائیلی وزیردفاع کاٹز کی خامنہ ای کے قتل کی براہ راست دھمکی

    واضح رہے کہ اسرائیل کے وزیر دفاع کاٹز نے گزشتہ روز ایران کے سپریم لیڈر خامنہ ای کو قتل کی براہ راست دھمکی دی تھی اور کہا تھا کہ وہ بیرشیبہ میں سورقہ اسپتال پر حملے کی قیمت ادا کریں گے۔

    ایران اسرائیل کشیدگی سے متعلق تمام خبریں

    اسرائیلی وزیر دفاع سے قبل ایک اعلیٰ اسرائیلی اہلکار بھی ایرانی سپریم لیڈر کے قتل کی دھمکی دے چکا ہے۔ وال اسٹریٹ جنرل کو انٹرویو دیتے ہوئے مذکورہ اہلکار نے کہا تھا کہ ایرانی سپریم لیڈر کا قتل خارج از امکان نہیں ہے اور یہ چیز ہماری حد سے باہر نہیں ہے۔

  • ایران کے میزائلوں نے دنیا کے باوقار لوگوں کو خوش کر دیا، ایرانی سپریم لیڈر

    ایران کے میزائلوں نے دنیا کے باوقار لوگوں کو خوش کر دیا، ایرانی سپریم لیڈر

    ایرانی سپریم لیڈر آیت اللہ علی خامنہ ای کے ایکس (سابقہ ٹوئٹر) اکاؤنٹ پر جاری کردہ ایک ویڈیو میں اسرائیلی فضائی حملوں اور غزہ میں کیے گئے مظالم کے مناظر کو دکھایا گیا، ساتھ ہی ایران کی جانب سے اسرائیل پر داغے گئے میزائلوں کی تباہ کاریوں اور اس پر لوگوں کے جشن منانے کی فوٹیج کو شامل کیا گیا۔

    ایرانی سپریم لیڈر آیت اللہ علی خامنہ ای کی جانب سے شیئر کی گئی ویڈیو میں دکھایا گیا ہے کہ کس طرح دنیا بھر میں لوگوں نے ایران کے ان حملوں کو سراہا، جو اسرائیل کے خلاف ردعمل کے طور پر کیے گئے۔

    شیئر کی گئی ویڈیو کے کیپشن میں تحریر تھا، ”وہ میزائل جو دنیا کے باوقار انسانوں کے لیے خوشی کا باعث بنے۔”

    ایران کے سپریم لیڈر کی جانب سے یہ بیان ایک ایسے وقت میں سامنے آیا ہے جب دوطرفہ کشیدگی میں اضافہ ہورہا ہے اور ایران و اسرائیل کے درمیان عسکری محاذ آرائی میں شدت آچکی ہے۔

    ایران کا کہنا ہے کہ اس کے حملے صرف اسرائیلی جارحیت کے خلاف دفاعی ردعمل ہیں جبکہ عالمی سطح پر ان حملوں پر ملا جلا ردعمل سامنے آ رہا ہے۔

    واضح رہے کہ اس سے قبل بھی ایران کے سپریم لیڈر آیت اللہ خامنہ ای کا ایک بیان سامنے آیا تھا، جس میں اُن کا کہنا تھا کہ اسرائیل کا امریکا کو مدد کے لیے پکارنا کمزوری کی علامت ہے۔

    سماجی رابطے کی ویب سائٹ ایکس پر جاری پیغام میں آیت اللہ خامنہ ای کا کہنا تھا کہ دشمن کو احساس ہوا ایرانی قوم ڈر رہی ہے تو وہ آپ کو نہیں چھوڑے گی۔

    انہوں نے کہا کہ دشمن سے وہی سلوک جاری رکھیں جو آج تک اس نے کیا ہے۔

    دوسری جانب اسرائیلی وزیر دفاع کاٹز نے ایرانی سپریم کمانڈر آیت اللہ خامنہ ای کو قتل کرنے کی دھمکی دیتے ہوئے کہا ہے کہ خامنہ ای بیرشیبہ میں سوروقا اسپتال پر حملے کی قیمت ادا کریں گے۔

    iran israel تمام خبریں

    کاٹز کا کہنا تھا کہ اسرائیل اب ایران میں نئے قسم کے اسٹریٹجک اہداف پر حملے شروع کرے گا تاکہ اسرائیل کی ریاست کو لاحق خطرات کو دور کیا جا سکے اور خامنہ ای کی حکومت کو ہلا دیا جا سکے۔

  • قوم کو یقین دلاتا ہوں کہ ایران کا جواب ادھورا نہیں ہوگا، آیت اللہ خامنہ ای

    قوم کو یقین دلاتا ہوں کہ ایران کا جواب ادھورا نہیں ہوگا، آیت اللہ خامنہ ای

    تہران : ایرانی سپریم لیڈر آیت اللہ خامنہ ای نے کہا ہے کہ ایرانی قوم کو یقین دلاتاہوں کہ ہمارا جواب ادھورا نہیں ہوگا۔

    ایران کی جانب سے اسرائیل پر جوابی حملے کے بعد اپنے ایک بیان میں ایرانی سپریم لیڈر کا کہنا ہے کہ اسرائیل نے جنگ شروع کی ہے اب اسے بھرپور جواب بھی ملے گا۔

    آیت اللہ خامنہ ای نے کہا کہ صہیونی حکومت اپنے سنگین جرم کے نتائج سے محفوظ نہیں رہے گی، ایرانی قوم کو یقین دلاتا ہوں کہ ہمارا جواب ادھورا نہیں ہوگا۔

    ایرانی عہدیدار کا کہنا ہے کہ اسرائیل میں اب کوئی مقام محفوظ نہیں رہے گا، ہمارا جواب تکلیف دہ ہوگا،
    اسرائیل کو ہمارے لوگوں کو شہید کرنے کی بھاری قیمت چکانا پڑے گی۔

    دوسری جانب ایرانی پاسداران انقلاب کی جانب سے جاری اعلامیے میں کہا گیا ہے کہ ایرانی ردعمل میں اسرائیلی فوجی اڈوں کو نشانہ بنایا گیا ہے۔

    پاسداران انقلاب کے مطابق سپریم لیڈرعلی خامنہ ای کے حکم پر اسرائیل کیخلاف جوابی کارروائی کی جا رہی ہے، ایرانی ردعمل میں اسرائیلی فوجی اڈوں کو نشانہ بنایا گیا، اسرائیل میں درجنوں اہداف، فوجی مراکز اور فضائی اڈوں کو نشانہ بنایا۔

    یاد رہے کہ اسرائیل نے آج صبح ایران میں درجنوں مقامات پر فضائی حملے کیے جن میں فوجی قیادت کی رہائش گاہوں اور فوجی و جوہری تنصیبات کو نشانہ بنایا گیا، اسرائیلی حملوں میں 78 افراد کے شہید ہونے کی اطلاعات ہیں۔

    مزید پڑھیں : حوثیوں نے اسرائیل پر میزائل داغ دیا

    واضح رہے کہ یمن کی حوثیوں نے اسرائیل پر میزائل داغتے ہوئے ایران کا ساتھ نہ چھوڑنے کا اعلان کیا تھا۔ یمن کے حوثی رہنما نے اسرائیل کو انتباہ کرتے ہوئے کہا ہے کہ ایران یا کسی بھی مسلم ملک کو اسرائیلی جارحیت کے سامنے تنہا نہیں چھوڑیں گے۔ حوثی رہنما نے کہا کہ فلسطین اور لبنان کی طرح ایران کا بھی بھرپور دفاع کریں گے۔

  • اسرائیل سخت سزا کا انتظار کرے، ایرانی سپریم لیڈر آیت اللہ علی خامنہ کا ردعمل

    اسرائیل سخت سزا کا انتظار کرے، ایرانی سپریم لیڈر آیت اللہ علی خامنہ کا ردعمل

    ایران کے سپریم لیڈر آیت اللہ علی خامنہ ای نے اسرائیلی حملوں پر ردعمل دیتے ہوئے کہا ہے کہ اسرائیل کو حملے کی سخت سزا ملے گی، اسرائیل سخت سزا کا انتظار کرے۔

    ایرانی سپریم لیڈر آیت اللہ خامنہ ای نے کہا اسرائیل نے راتوں رات حملہ کرکے آج اپنے لیے ایک تلخ اور تکلیف دہ تقدیر پر مہر ثبت کر دی ہے۔

    ایران کے سپریم لیڈر نے کہا کہ اسرائیلی حکومت کو اب سنگین نتائج کیلئے تیار رہنا چاہیے، جاری بیان میں انہوں نے اسرائیلی حملے میں کئی اعلی فوجی حکام اور سانسدانوں کے شہید ہونے کی تصدیق کی۔

    آیت اللہ خامنہ ای کا کہنا تھا کہ صہیونی حکومت نے اپنے شیطانی اور خونی ہاتھوں سے ہمارے ملک میں جرم کا ارتکاب کیا اور رہائشی علاقوں کو نشانہ بناکر اپنی فطرت کو مزید آشکار کیا ہے، اب اسرائیلی حکومت ہمارے سخت ردعمل کا انتظار کرنا چاہیے۔

    https://urdu.arynews.tv/iran-chief-hossein-salami-martyred-in-israeli-attack/

    اسرائیل نے ایران پر جمعہ کی علی الصبح درجنوں مقامات پر فضائی حملے کیے جس سے تہران دھماکوں سے گونج اٹھا، اسرائیل نے اس حملے میں پاسداران انقلاب کے صدر دفتر کو بھی نشانہ بنایا۔

    ایرانی میڈیا کے مطابق اسرائیلی حملوں میں پاسداران انقلاب کے کمانڈر حسین سلامی، جوہری سائنسدان فریدون عباسی اور محمد مہدی شہید ہوگئے۔