نیویارک: اقوام متحدہ اور کمیٹی ٹو پروٹیکٹ جرنلسٹ کی جانب سے ایرانی ٹی وی پر اسرائیلی حملے کی مذمت کی گئی ہے۔
تفصیلات کے مطابق یو این سیکریٹری جنرل نے ایرانی ٹی وی چینل پر حملے کی مذمت کرتے ہوئے کہا کہ صحافیوں اور میڈیکل عملے کو عالمی قانون کے تحت تحفظ حاصل ہے۔
کمیٹی ٹو پروٹیکٹ جرنلسٹ نے بھی ایرانی سرکاری ٹی وی پر اسرائیلی حملے کی مذمت کرتے ہوئے کہا ہے کہ لائیو نشریات کے دوران چینل پر بمباری قابل مذمت ہے، اسرائیل نے غزہ میں 200 صحافیوں کو بے دریغ قتل کیا، خطے میں میڈیا پر حملے اسرائیل کی دیدہ دلیری ظاہر کرتے ہیں، خطے میں خونریزی بند کی جائے، قتل عام روکا جائے۔
تہران اسرائیل جنگ سے متعلق تازہ ترین خبریں یہاں پڑھیں
ادھر ایرانی ہلال احمر نے ایک بیان میں کہا ہے کہ تہران میں اسرائیلی حملے میں 3 ایرانی ہلال احمر کے اہلکار بھی شہید ہو گئے ہیں، تینوں شہید اہلکار تہران میں ریسکیو آپریشن میں مصروف تھے، ہلال احمر نے کہا ریسکیو ورکرز کو نشانہ بنانا انسانی حقوق کی خلاف ورزی ہے۔
اسرائیل کے وزیرِ دفاع نے تصدیق کی ہے کہ انھوں نے تہران میں ایران کے سرکاری ٹی وی چینل کو نشانہ بنایا ہے۔ جب میزائل عمارت پر گرا تو خاتون اینکر سحر امامی لائیو نشریات کے دوران اپنی پیشہ ورانہ ذمہ داری نبھا رہی تھیں۔ پوری دنیا نے ایک ویڈیو میں دیکھا کہ ایران کی بہادر خاتون اینکر اسرائیلی حملے کے فوراً بعد دوبارہ لائیو نشریات کرنے اسٹوڈیو میں واپس آ گئی۔
اسرائیل کی جانب سے ایران کے سرکاری ٹی وی چینل پر حملے کے جواب میں ایران نے بھی اسرائیلی ٹی وی چینلز کو فوری انخلا کا انتباہ جاری کر دیا ہے۔
