ARYNews.tv | Urdu – Har Lamha Bakhabar

Tag: ایران اسرائیل جنگ بندی

  • اسرائیل کا یمن میں بڑا فضائی حملہ، الحدیدہ پورٹ پر دھماکے

    اسرائیل کا یمن میں بڑا فضائی حملہ، الحدیدہ پورٹ پر دھماکے

    ایران اسرائیل جنگ بندی کے بعد پہلی بار صیہونی طیاروں نے یمن میں بڑا فضائی حملہ کیا۔ الحدیدہ پورٹ پر دھماکوں کی آوازیں سنی گئیں۔

    غیر ملکی ذرائع ابلاغ کے مطابق صیہونی طیاروں کے حملوں میں یمن کی بحیرہ احمر کے کنارے واقع اہم بندر گاہوں اور ایک بجلی گھر کو ہدف بنایا گیا۔

    حوثیوں کے زیر قبضہ الحدیدہ، رش عیسا، صلیف بندرگاہوں اور راس کے ناتب پاور پلانٹ کو نشانہ بنایا گیا۔ اسرائیل نے ایک کارگو جہاز پر بھی حملہ کیا، جسے حوثیوں نے نومبر دوہزار2023 میں قبضے میں لیا تھا۔

    حوثی ترجمان کا کہنا ہے انہوں نے وسطی اسرائیل کے علاقے جافا پر ایک بیلسٹک میزائل داغا، حملے میں اسرائیل کی فوجی تنصیب کو نشانہ بنایا گیا۔

    دوسری جانب قطر میں اسرائیل اور حماس کے درمیان جنگ بندی مذاکرات کا پہلا دور بے نتیجہ اختتام پذیر ہوگیا۔

    رپورٹ کے مطابق فلسطینی حکام کا اس حوالے سے کہنا ہے کہ مذاکرات کے لیے آئے اسرائیلی وفد کے پاس حتمی معاہدے تک پہنچنے کے لیے اختیارات نہیں تھے۔

    نیتن یاہو کا حماس کیساتھ جنگ بندی پر مذاکرات کیلیے وفد قطر بھیجنے کا اعلان

    رپورٹس کے مطابق اسرائیل اور حماس کے درمیان مذاکرات کا یہ سلسلہ اسرائیلی وزیراعظم کی امریکی صدر ڈونلڈ ٹرمپ سے ملاقات سے ایک روز قبل شروع ہوا ہے۔

    نیتن یاہو نے واشنگٹن روانگی سے قبل کہا تھا کہ جنگ بندی مذاکرات میں حصہ لینے والی اسرائیلی مذاکراتی ٹیم کو ہدایات دی ہیں کہ ایسی شرائط کے تحت ہی جنگ بندی کا معاہدہ کیا جائے جنہیں اسرائیل نے قبول کیا ہے۔

  • ایران اسرائیل جنگ بندی کے پیچھے بھی وردی ہے: محسن نقوی

    ایران اسرائیل جنگ بندی کے پیچھے بھی وردی ہے: محسن نقوی

    وفاقی وزیر داخلہ محسن نقوی نے کہا ہے کہ ایران اسرائیل جنگ بندی کے پیچھے بھی وردی ہے۔

    تفصیلات کے مطابق محرم الحرام کے حوالے سے تمام مکاتب فکر کے علمائے کرام اور وزیر مملکت برائے داخلہ طلال چوہدری کے ہمراہ میڈیا سے گفتگو کرتے ہوئے محسن نقوی نے کہا کہ ایران اسرائیل جنگ بندی میں وزیراعظم شہباز شریف کا بڑا کردار ہے اس کے پیچھے بھی وردی ہے۔

    وزیر داخلہ محسن نقوی کا کہنا ہے بھارت سے جنگ میں پاکستان کو غیبی مدد حاصل رہی، بھارت نے ہماری بیس پر گیارہ میزائل فائر کیے، ایک بھی اندر نہیں گرا۔

    وزیر داخلہ کا کہنا تھا کہ پاکستان نے میزائل فائر کیے تو بھارت کا بہت بڑا آئل ڈپو تباہ ہوگیا، جب فیلڈ مارشل سینہ تان کر کھڑے تھے کوئی پریشانی نہیں تھی، اب یوم آزادی چار سو فیصد زیادہ جذبے سے منائیں گے۔

     وزیر داخلہ محسن نقوی نے مزید کہا کہ اسرائیل ایران سیز فائر میں وزیراعظم کا اہم کردار ہے، اس کے پیچھے بھی وردی ہے، ایران اسرائیل سیز فائر پر پاکستان کو فخر کرنا چاہیے۔

    اس موقع پر گفتگو کرتے ہوئے وزیر مملکت برائے داخلہ طلال چوہدری کا کہنا تھا کہ دہشت گردی کے خلاف جنگ میں ہم سب کو متحد ہونا ہوگا، ہم نے نفرت اور فرقہ واریت کا شکار نہیں ہونا۔

    چیئرمین مرکزی رویت ہلال کمیٹی عبدالخبیر آزاد نے کہا کہ قیام امن سے متعلق ہم حکومت کا ہر طرح سے ساتھ دے رہے ہیں، اللہ نے چاہا تو محرم الحرام پُرامن گزرے گا، اللہ سے دعا ہے عاشور کو امن عافیت سے گزارنے کی توفیق دے، ہم  نے کوئٹہ، خیبرپختونخوا میں جرگے شروع کیے ہیں، ہم نے کہا اس ملک میں دہشت گردی نہیں چلنے دیں گے۔

  • ایران اسرائیل جنگ بندی، فرانسیسی صدر کا نیتن یاہو کو اہم پیغام

    ایران اسرائیل جنگ بندی، فرانسیسی صدر کا نیتن یاہو کو اہم پیغام

    فرانسیسی صدر ایمانویل میکرون نے اسرائیلی وزیر اعظم نیتن یاہو سے گفتگو کرتے ہوئے اس بات پر زور دیا کہ اسرائیل اور ایران دونوں کو حالیہ فائر بندی کے معاہدے کا احترام کرنا چاہیے۔

    غیر ملکی میڈیا کے مطابق فرانسیسی صدر ایمانویل میکرون کا کہنا تھا کہ انہوں نے اسرائیلی وزیر اعظم نیتن یاہو پر واضح کیا کہ غزہ میں بھی جنگ بندی کے کسی معاہدے تک پہنچنا ضروری ہے۔

    دوسری جانب اسرائیلی وزیر اعظم نیتن یاہو اور وزیر دفاع اسرائیل کاٹز نے غزہ میں فلسطینی مزاحمتی تنظیم حماس کو امداد سے دور رکھنے کیلیے فوج سے پلان طلب کر لیا۔

    قطری نشریاتی ادارے الجزیرہ کی رپورٹ کے مطابق نیتن یاہو اور اسرائیل کاٹز نے ایک مشترکہ بیان کہا کہ انہوں نے اسرائیلی فوج کو ہدایت کی ہے کہ وہ غزہ میں حماس کی امداد تک رسائی روکنے کا منصوبہ پیش کرے۔

    مشترکہ بیان میں کہا گیا کہ آج موصول ہونے والی اطلاعات کے بعد کہ حماس ایک بار پھر شمالی غزہ میں داخل ہونے والی انسانی امداد کا کنٹرول سنبھال رہی ہے اور شہریوں سے چھین رہی ہے، وزیر اعظم اور وزیر دفاع نے اسرائیلی فوج کو ہدایت کی کہ وہ 48 گھنٹے کے اندر حماس کو امداد پر قبضے سے روکنے کیلیے ایکشن پلان پیش کریں۔

    نامعلوم حکام کا حوالہ دیتے ہوئے اسرائیلی چینل 12 نیوز نے بتایا کہ حکومت نے پہلے ہی غزہ کیلیے امداد کی ترسیل روک دی ہے، جب تک اسرائیلی فوج اپنا منصوبہ پیش نہیں کرتی اُس وقت تک یہ بندش برقرار رہے گی۔

    ایران اسرائیل کشیدگی سے متعلق تمام خبریں

    ٹائمز آف اسرائیل اور دی یروشلم پوسٹ کے مطابق غیر مصدقہ رپورٹ اسرائیل کے انتہائی دائیں بازو کے وزیر خزانہ بیزلیل سموٹریچ کی مبینہ طور پر حکومت چھوڑنے کی دھمکی کے بعد سامنے آئی ہے کہ اگر حماس کو امداد پہنچنے سے روکنے کیلیے فوری کارروائی نہ کی گئی تو وہ حکومت چھوڑ دیں گے۔

    غزہ میں اسرائیلی فوج کی خون کی ہولی، مزید 78 فلسطینی شہید

    واضح رہے کہ اسرائیل اور ایران کے درمیان 13 جون سے شروع ہونے والی جھڑپوں کا سلسلہ 12 روز تک جاری رہا، اس دوران اسرائیل نے ایران کے فوجی اور جوہری مراکز، میزائل لانچنگ پلیٹ فارمز پر حملے کیے۔ ایران کی جانب سے بھی اسرائیل پر بھرپور وار کیا گیا اور متعدد عمارتوں کو ملیا میٹ کردیا گیا۔

  • جنگ بندی، ایران کے سفیر نے قطر کا شکریہ ادا کیا

    جنگ بندی، ایران کے سفیر نے قطر کا شکریہ ادا کیا

    تہران: اقوام متحدہ میں ایران کے سفیر نے اسرائیل کے ساتھ جنگ بندی میں قطر کے کردار پر شکریہ ادا کیا۔

    تفصیلات کے مطابق اقوام متحدہ میں ایران کے ایلچی امیر سعید ایرانی نے منگل کو اقوام متحدہ کی سلامتی کونسل کے اجلاس میں ایران اسرائیل جنگ بندی میں قطر کے کردار کا شکریہ ادا کیا۔

    ایرانی سفارت کار نے کونسل کو بتایا ’’میں اپنے برادر اور دوست ملک قطر کی ریاست کا تہہ دل سے شکریہ ادا کرنا چاہتا ہوں، کہ اس نے اسرائیلی جارحیت کو ختم کرنے، جنگ بندی کے قیام اور علاقائی کشیدگی کو مزید بڑھنے سے روکنے کے لیے مخلصانہ اور سفارتی کوششیں کیں جو خطے میں امن و استحکام کے لیے خطرہ ہیں۔‘‘

    خیال رہے کہ ایران کی جانب سے خلیجی ملک میں امریکی ایئربیس پر حملے کے ایک دن بعد قطر سے اظہار تشکر کیا گیا ہے۔ سی این این کے مطابق پیر کو قطری وزیر اعظم شیخ محمد بن عبدالرحمن بن جاسم آل ثانی نے ایران کے ساتھ معاہدہ کیا تو اس کے بعد امریکی صدر ڈونلڈ ٹرمپ نے سوشل میڈیا پر جنگ بندی کا اعلان کیا۔

    ایرانی حملے پر قطر کے وزیر اعظم کے مذاق کی ویڈیو وائرل

    واضح رہے کہ قطر میں امریکی اڈے پر حملے کے بعد پریس کانفرنس سے خطاب کرتے ہوئے قطری وزیر اعظم اور وزیر خارجہ شیخ محمد بن عبدالرحمٰن بن جاسم آل ثانی نے ایک دل چسپ مذاق بھی کیا، جس کی ویڈیو سوشل میڈیا پر وائرل ہو گئی ہے۔

  • جنگ بندی کے بعد اسرائیلی تباہ کن حملے میں 16 ایرانی جاں بحق

    جنگ بندی کے بعد اسرائیلی تباہ کن حملے میں 16 ایرانی جاں بحق

    تہران: ڈونلڈ ٹرمپ کے اعلانِ جنگ بندی کے بعد اسرائیل کے تباہ کن حملے میں ایران کے 16 شہری جاں بحق ہو گئے۔

    ایران کے سرکاری ذرائع ابلاغ نے ایک علاقائی اہلکار کے حوالے سے اطلاع دی ہے کہ منگل کی صبح شمال مغربی حصے میں رہائشی عمارتوں پر اسرائیلی حملوں میں مرنے والوں کی تعداد 16 ہو گئی ہے۔

    سرکاری خبر رساں ایجنسی فارس کے مطابق گیلان کے نائب گورنر نے کہا کہ صوبہ گیلان میں ہونے والے حملے میں 33 افراد زخمی اور 4 رہائشی یونٹ تباہ ہو گئے ہیں۔

    جنگ بندی کے بعد ایران میں خوشی کی لہر، لوگ جشن منانے نکل آئے

    واضح رہے کہ ایران اور اسرائیل کے درمیان جنگ بندی جاری ہے، رات میں دونوں نے کوئی حملہ نہیں کیا، صدر ٹرمپ نے سوشل میڈیا پر لکھا جنگ بندی پر عمل ہو رہا ہے۔

    جنگ بندی پر عمل درآمد کیوں نہیں کیا؟ ٹرمپ نے نیتن یاہو کو کھری کھری سنا دی

    ایران کی وزارت صحت کے مطابق 12 روز کی جنگ کے دوران اسرائیلی حملوں میں 610 افراد شہید ہوئے، جب کہ 4000 سے زیادہ افراد زخمی ہوئے، اسرائیلی حملوں میں 7 اسپتال، 9 ایمبولنسیں، 6 ایمرجنسی رسپانس بیسز اور 4 کلینک تباہ ہوئے، دوسری طرف ایران کے حملوں میں بھی اسرائیل میں بھی بڑی تباہی ہوئی جن میں درجنوں عمارتیں کھنڈر بن گئیں، اور ہزاروں افراد بے گھر ہوئے، حملوں میں 28 اسرائیلی ہلاک اور درجنوں زخمی ہوئے۔

  • جنگ بندی کے بعد ایران میں خوشی کی لہر، لوگ جشن منانے نکل آئے

    جنگ بندی کے بعد ایران میں خوشی کی لہر، لوگ جشن منانے نکل آئے

    تہران: ایران اسرائیل جنگ بندی کے بعد تہران میں لوگ سڑکوں پر نکل کر جشن منانے لگے ہیں۔

    اگر ایران اور اسرائیل کے درمیان 12 روزہ جنگ کے دوران ایرانی عوام کا جذبہ قابل دید تھا، تو جنگ بندی کے بعد بھی ان کے ملّی جوش و جذبے میں کوئی تبدیلی نظر نہیں آئی۔

    جنگ بندی کے بعد ایران میں جشن کا سماں ہے، خبر سنتے ہی تہران سمیت مختلف شہروں میں ہزاروں کی تعداد میں لوگ قومی پرچم لہراتے ہوئے سڑکوں پر نکل آئے اور صہیونی فورسز کے خلاف جنگ میں زبردست مقابلہ کرنے پر اپنی مسلح افواج کو خراج تحسین پیش کیا۔

    ایران اسرائیل جنگ کے 12 روز تک اسرائیل کی فضائی بمباری ایران کے تمام شہروں میں گونجتی رہی، اس دوران سیکڑوں افراد کی جانیں چلی گئیں اور لوگوں کی بڑی تعداد کو نقل مکانی پر مجبور ہونا پڑا۔

    جنگ بندی پر عمل درآمد کیوں نہیں کیا؟ ٹرمپ نے نیتن یاہو کو کھری کھری سنا دی

    ایسے میں جنگ بندی کے راتوں رات اچانک اعلان سے ایرانی عوام میں سکون اور طمانیت کی لہر دوڑ گئی، جنگ میں سب سے زیادہ متاثر ہونے والے ایران کے دارالحکومت تہران میں بھی معمول کی زندگی لوٹ آئی۔

    اے آر وائی نیوز کے پروگرام الیونتھ آور میں ایرانی صحافی جون حسین نے تہران کی تازہ صورت حال بیان کرتے ہوئے بتایا کہ وہ ہائی وے کے اسٹاپ پر موجود ہیں جہاں لوگوں کا رش لگا ہوا ہے۔ ایرانی صحافی کا کہنا تھا کہ بعض لوگ تنقید کرتے ہیں کہ ایران میں لوگ دباؤ میں ہوتے ہیں، خواتین پر سخت پابندیاں ہیں لیکن یہاں دیکھا جا سکتا ہے کہ یہاں خواتین سمیت سب کو مکمل آزادی حاصل ہے۔

    انھوں نے اپنے موبائل کیمرے کے ذریعے دکھایا کہ شاپنگ مالز اور ریستورانوں میں خواتین کام کاج کر رہی ہیں، سب لوگ اپنی حکومت سے خوش ہیں، رجیم چینج کے حوالے سے کہیں کوئی بات نہیں کی جا رہی۔

  • جنگ بندی پر عمل درآمد کیوں نہیں کیا؟ ٹرمپ نے نیتن یاہو کو کھری کھری سنا دی

    جنگ بندی پر عمل درآمد کیوں نہیں کیا؟ ٹرمپ نے نیتن یاہو کو کھری کھری سنا دی

    واشنگٹن: جنگ بندی پر عمل درآمد کیوں نہیں کیا؟ امریکی صدر ٹرمپ اسرائیل پر برہم ہو گئے، اور ٹیلی فون کر کے اسرائیلی وزیر اعظم نیتن یاہو کو کھری کھری سنا دی۔

    ایران اور اسرائیل کے درمیان جنگ بندی کے باوجود ایران پر حملے کے بعد امریکی صدر ٹرمپ نے اسرائیلی وزیر اعظم نیتن یاہو کو فون کیا اور اظہار برہمی کرتے ہوئے نیتن یاہو کو دو ٹوک الفاظ میں سخت مؤقف دیا۔

    سی این این کی رپورٹ کے مطابق صدر ٹرمپ نے نیتن یاہو سے تلخ لہجے میں بات کی، اور جنگ بندی کے باوجود ایران پر اسرائیلی حملے پر دوٹوک گفتگو کی۔

    امریکی حملے ایران کی جوہری تنصیبات تباہ کرنے میں ناکام رہے، امریکی انٹیلیجنس رپورٹ میں انکشاف

    رپورٹ کے مطابق ٹرمپ کے فون کے بعد نیتن یاہو کو یہ بات سمجھ آ گئی ہے کہ ایران پر مزید حملے مہنگے پڑیں گے، اسرائیل نے جنگ بندی کے بعد پہلے ہی گھنٹے میں ایران میں 3 مقامات پربمباری کی تھی۔

    امریکی صدر ڈونلڈ ٹرمپ نے اسرائیل سے ناراضی کا اظہار کیا، میڈیا سے گفتگو میں صدر ٹرمپ نے کہا کہ جنگ بندی کے بعد اسرائیل کو بمباری نہیں کرنی چاہیے تھی۔ ایران کی طرف سے غلطی سے راکٹ چل گیا جو گرا بھی نہیں، اسرائیل نے جواب میں اتنی شدید بمباری کی جو پہلے کبھی نہیں دیکھی، ایران نے بھی خلاف ورزی کی لیکن اسرائیل نے بھی کی۔

    میں نے کہا کہ ٹھیک ہے تمہارے پاس 12 گھنٹے ہیں، اس کا یہ مطلب نہیں کہ پہلے ہی گھنٹے اتنی بمباری کردو، میں اسرائیل سے خوش نہیں ہوں۔

  • ایران اسرائیل جنگ بندی : خام تیل کی قیمتوں میں حیران کن کمی

    ایران اسرائیل جنگ بندی : خام تیل کی قیمتوں میں حیران کن کمی

    ایران اسرائیل جنگ بندی کے بعد بین الاقوامی منڈی میں خام تیل کی قیمتوں میں کمی حیران کن کمی ریکارڈ کی گئی۔

    تفصیلات کے مطابق ایران اسرائیل جنگ بندی کے بعد بین الاقوامی منڈی میں خام تیل کی قیمتوں میں کمی آنے لگی۔

    خبر رساں ایجنسی رائٹرز نے بتایا کہ لندن برینٹ خام تیل کی قیمت 3.5 فیصد کم ہوئی اور تیل 2 ڈالر 48 سینٹ کم ہو کر 69 ڈالر فی بیرل پرآگیا۔

    ویسٹ ٹیکساس خام تیل کی قیمت میں بھی 3.5 فیصد کی کمی ہوئی اور 2 ڈالر 37 سینٹ کمی کے بعد ویسٹ ٹیکساس خام تیل چھیاسٹھ ڈالر چودہ سینٹ فی بیرل پر ٹریڈ کررہا ہے۔

    ماہرین کا کہنا ہےمشرق وسطیٰ میں ایران اسرائیل جنگ بندی کی وجہ سے تیل کی قیمتیں معمول پر آرہی ہیں۔

    خیال رہے مشرق وسطی میں امریکی فوجی اڈوں پر ایرانی حملوں کے بعد عالمی منڈی میں خام تیل کی قیمتیں گراوٹ کا شکار تھیں۔

    https://urdu.arynews.tv/dollar-currency-rate-pakistan-today/

    نیویارک مرکنٹائل ایکس چینج میں برینٹ کروڈ کی قیمت پانچ فیصد گرگئی تھی، ایک بیرل برینٹ کروڈ ساڑھے تین ڈالر سے زیادہ کمی کے بعد اکہترڈالر ساٹھ سینٹ پر آگیا جبکہ ویسٹ ٹیکساس کروڈ کی قیمت ساڑھے چار فیصد سے زائد کمی کے بعد ڈبلیوٹی آئی کروڈ انہتر ڈالر اٹھارہ سینٹ فی بیرل ہوگیا تھا۔

    اس سے پہلے امریکی صدر ڈونلڈ ٹرمپ نے عالمی منڈی میں تیل کی قیمتیں بڑھانے والوں کو خبردار کیا تھا۔

    سوشل میڈیا پرپیغام میں صدرٹرمپ کا کہنا تھا تمام ملک تیل کی قیمتیں نیچی رکھیں، ایسا کرنے والے دشمن کے ہاتھوں میں کھیل رہے ہیں،ایسا نہ کریں۔

  • ایران اسرائیل جنگ بندی : سونے کی قیمت تقریباً 2 ہفتے کی کم ترین سطح پر آگئی

    ایران اسرائیل جنگ بندی : سونے کی قیمت تقریباً 2 ہفتے کی کم ترین سطح پر آگئی

    عالمی مارکیٹ میں سونے کی قیمتیں تقریباً دو ہفتے کی کم ترین سطح پر آگئی اور قیمت 3,338.39 ڈالر فی اونس ہوگئی۔

    تفصیلات کے مطابق امریکی صدر ڈونلڈ ٹرمپ کے ایران اور اسرائیل کے درمیان جنگ بندی کے اعلان کے بعد عالمی مارکیٹ میں سونے کی قیمتیں تقریباً دو ہفتے کی کم ترین سطح پر پہنچ گئیں۔

    اس پیشرفت کے بعد سرمایہ کاروں میں خطرہ مول لینے کا رجحان بڑھا ہے، جس کا اثر قیمتی دھاتوں کی منڈی پر بھی پڑا۔

    بین الاقوامی مارکیٹ میں اسپاٹ گولڈ کی قیمت 0.9 فیصد کمی کے ساتھ 3,338.39 ڈالر فی اونس پر آ گئی، جو 11 جون کے بعد سے اب تک کی سب سے کم سطح ہے۔

    اسی طرح امریکی گولڈ فیوچرز میں بھی 1.2 فیصد کی کمی ریکارڈ کی گئی اور قیمت 3,352.60 ڈالر فی اونس تک پہنچ گئی۔

    امریکی فیڈرل ریزرو کی وائس چیئر برائے نگرانی مشیل بومن نے کہا تھا کہ روزگار کے شعبے کو لاحق خطرات کے پیش نظر شرح سود میں کمی کا وقت قریب آ چکا ہے۔

    ایران، اسرائیل اور امریکی تنازع سے متعلق تمام خبریں

    اس بیان کے بعد سرمایہ کاروں کی نظریں منگل کے روز ہونے والی فیڈرل ریزرو کے چیئر مین جیروم پاول کی کانگریس میں گواہی پر مرکوز ہو گئیں، جہاں وہ ہاؤس فنانشل سروسز کمیٹی کے سامنے پیش ہوں گے۔

    سپیواک نے اس حوالے سے مزید کہا، "سونے کی قیمتوں کے رجحان میں مجموعی طور پر اضافہ متوقع ہے، لیکن اگر پاول نے یہ عندیہ دیا کہ اس سال شرح سود میں دو بار سے زیادہ کمی نہیں ہو گی، تو ہم قریبی مدت میں سونے کی قیمت میں اصلاح اور امریکی ڈالر میں مضبوطی دیکھ سکتے ہیں۔”

    یاد رہے صدر ٹرمپ نے اعلان کیا کہ ایران اور اسرائیل کے درمیان مکمل جنگ بندی طے پا گئی ہے، جس سے 12 روزہ تنازعے کا خاتمہ متوقع ہے۔

    دوسری جانب ٹرمپ کے اعلان کے بعد عالمی حصص کی مارکیٹوں میں بہتری دیکھی گئی، جب کہ تیل کی قیمتیں ایک ہفتے کی کم ترین سطح پر آ گئیں۔

    توانائی کی قیمتوں میں یہ کمی، مشرقِ وسطیٰ میں کشیدگی کے کم ہونے کے باعث ممکن ہوئی کیونکہ مارکیٹوں کو خدشہ تھا کہ تنازعے کے باعث تیل کی فراہمی متاثر ہو سکتی ہے۔

    واضح رہے کہ سونا عمومی طور پر کم شرح سود والے ماحول میں بہتر کارکردگی دکھاتا ہے، کیونکہ اس پر کوئی سود نہیں ملتا، اور سرمایہ کار ایسے ماحول میں اسے بطور محفوظ سرمایہ کاری اختیار کرتے ہیں۔

    سونے کے علاوہ دیگر قیمتی دھاتوں کی قیمتوں میں بھی معمولی کمی دیکھنے میں آئی، اسپاٹ سلور 0.1 فیصد کمی کے ساتھ 36.08 ڈالر فی اونس پر آ گیا۔

    پلاٹینم 0.3 فیصد کمی کے ساتھ 1,290.67 ڈالر فی اونس پر بند ہوا جبکہ پیلیڈیم 1.3 فیصد کمی کے ساتھ 1,062.94 ڈالر فی اونس تک گر گیا۔

  • ایران اسرائیل جنگ بندی کے بعد پاسداران انقلاب کے کمانڈر انچیف کا اہم بیان سامنے آگیا

    ایران اسرائیل جنگ بندی کے بعد پاسداران انقلاب کے کمانڈر انچیف کا اہم بیان سامنے آگیا

    تہران : پاسداران انقلاب کے کمانڈر انچیف میجر جنرل پاکپور کا جنگ بندی کے بعد پہلا بیان سامنے آگیا۔

    تفصیلات کے مطابق ایران اسرائیل جنگ بندی کے بعد ایرانی پاسداران انقلاب کے کمانڈر انچیف میجر جنرل پاکپور نے بیان میں کہا ہے کہ کامیابی اور فتح پر ملت ایران اور شہداء کے اہل خانہ کو مبارکباد پیش کرتے ہیں۔

    میجرجنرل پاکپور نے امریکی صدر کو خبردار کرتے ہوئے کہا کہ دوبارہ جارحیت کی تواس بارجواب پہلےسے کہیں زیادہ سخت اورتباہ کن ہوگا۔

    ان کا کہنا تھا کہ قطرامریکا کا اسٹریٹجک اڈہ مغربی ایشیا میں امریکی سینٹرل کمانڈ کا دھڑکتا دل سمجھا جاتا ہے، اسے امریکا کے مجرمانہ اورشیطانی حملے کے ردعمل میں نشانہ بنایا گیا۔

    پاکپور نے کہا صدر ٹرمپ اسرائیلی حکومت کے تحفظ کیلئے امریکی عوام کی سلامتی اورمفادات قربان کررہے ہیں، اگردوبارہ ایران کے خلاف کسی قسم کی جارحیت کی تو ایسا سبق سکھایا جائے گا جو تاریخ میں ہمیشہ یاد رکھا جائے گا۔

    یاد رہے ایران کی مسلح افواج نے ایرانی جوہری تنصیبات پر امریکی حملوں کے جواب میں قطر میں امریکی فوجی اڈے پر میزائل داغے۔

    قطر میں امریکی فوجی اڈوں کے خلاف آپریشن ’بشارت فتح‘ میں قطر میں امریکہ کے العدید ایئربیس پر طاقتور میزائل داغے گئے۔

    ایران اسرائیل کشیدگی سے متعلق تمام خبریں

    ایران کی پاسداران انقلاب نے تصدیق کرتے ہوئے کہا تھا کہ قطر میں امریکی اڈے پر تباہ کن اور مضبوط حملہ کیا ہے، ہم ایران پر کسی بھی حملے کا جواب دینے سے باز نہیں رہیں گے۔

    آئی آر جی سی نے کہا تھا کہ وائٹ ہاؤس اور اس کے اتحادیوں کے لیے ایران کا پیغام واضح تھا: "خدا تعالی پر بھروسہ کرتے ہوئے، اور ایرانی عوام کی حمایت سے، اسلامی جمہوریہ ایران کسی بھی صورت میں اپنی علاقائی سالمیت، خودمختاری اور قومی سلامتی کی خلاف ورزی کو بے جواب نہیں چھوڑے گا۔