دوحہ : جنگ بندی کے اعلان کے بعد قطرنے اپنی فضائی حدود دوبارہ کھول دی ، جس کے بعد قطر ایئرویز نے فضائی آپریشن دوبارہ شرو ع کردیا۔
تفصیلات کے مطابق اسرائیل اور ایران کے درمیان جنگ بندی کے اعلان کے بعد قطر، متحدہ عرب امارات، کویت اور بحرین فضائی حدود کھول دی۔
غیرملکی میڈیا کی جانب سے بتایا گیا کہ قطرائیرویز نے فضائی آپریشن دوبارہ شروع کردیا ہے، جو قطر میں امریکی اڈے پر ایرانی بیلسٹک میزائل حملوں کے بعد عارضی طور پر معطل کر دیا گیا تھا۔
کویت اوربحرین کے ایوی ایشن حکام اور ایئرلائنزکا کہنا ہے صورت حال پر مسلسل نظر رکھے ہوئے ہیں، مسافروں کو سفر سے قبل ایئرلائنز سے معلومات حاصل کرنے کی ہدایت کی گئی ہے۔
واضح رہے کہ گذشتہ روز قطر نے خطے میں ہونے والی پیش رفت کے درمیان اقدامات کے طور پر فضائی حدود کو عارضی طور پر بند کر دیا تھا۔
مزید پڑھیں: خلیجی ملک نے فضائی حدود کو بند کر دیا
قطری وزارت خارجہ کی جانب سے بیان میں کہا گیا تھا کہ قطربین الاقوامی قوانین کےتحت جواب کاحق محفوظ رکھتا ہے، جلد ہی اپنی فضائی حدود دوبارہ کھولنے کا اعلان کریں گے۔
قطری وزارت خارجہ کا کہنا تھا کہ تمام احتیاطی تدابیر اختیارکیں جس کی وجہ سے ایرانی حملہ ناکام ہوا، خطے میں کشیدگی بڑھ رہی ہے، جس کے خاتمے کیلئے کام جاری رکھیں گے، خطے میں مسلسل کشیدگی دنیا بھرمیں سلامتی اوراستحکام کونقصان پہنچائے گی۔
خیال رہے ایران نے قطر اور عراق میں قائم امریکی فوجی اڈوں پر بیلسٹک میزائلوں سے حملے کیے تھے، ایران کی جانب سے قطر کی فضا میں 6 بیلسٹک میزائل داغے گئے جن کا ہدف العدید ایئر بیس تھا، جو خطے میں امریکی فوج کی سب سے بڑی تنصیب ہے۔
