برلن : یورپی ممالک کے وزرائے خارجہ کل بروز جمعہ جنیوا میں ایران کے وزیر خارجہ کے ساتھ جوہری معاملات پر مذاکرات کریں گے۔
برطانوی نشریاتی ادارے رائٹرز نے ذرائع کے حوالے سے اپنی خصوصی رپورٹ میں جرمن ذرائع کے حوالے سے بتایا ہے کہ ان مذاکرات کا مقصد ایران کو اس بات کی واضح اور پکی ضمانت دینے پر راضی کرنا ہے کہ اس کا جوہری پروگرام صرف پرامن اور شہری مقاصد کے لیے استعمال ہوگا۔
رائٹرز کو جرمنی کے ایک سفارتی ذریعے نے بتایا ہے کہ جرمنی، فرانس اور برطانیہ کے وزرائے خارجہ جمعہ کو جنیوا میں ایران کے وزیر خارجہ کے ساتھ جوہری معاملات پر بات چیت کریں گے۔
رپورٹ کے مطابق اسرائیل کا کہنا ہے کہ وہ ایران کو اس کی جوہری ہتھیار بنانے کی صلاحیت سے مکمل طور پر محروم کرنا چاہتا ہے جبکہ ایران کا دعویٰ ہے کہ اس کا جوہری پروگرام فوجی مقاصد کے لیے نہیں ہے۔
ایران اسرائیل جنگ سے متعلق تازہ ترین خبریں یہاں پڑھیں
علاوہ ازیں اسرائیلی خبر رساں ادارے دی ٹائمز آف اسرائیل نے بھی اپنی رپورٹ میں کہا ہے کہ ایران سے مذاکرات جنیوا میں جرمن قونصلیٹ میں ہوں گے، مذاکرات میں یورپی یونین کی اعلیٰ سفارت کار کایاکالاس بھی شرکت کریں گی۔
اسرائیلی میڈیا کا یہ بھی کہنا ہے کہ مذاکرات امریکہ کی منظوری سے ہورہے ہیں، جس کا مقصد دونوں ممالک کے درمیان کشیدگی میں کمی لانا ہے۔
