ایرانی نائب وزیر خارجہ ماجد تخت روانچی کا کہنا ہے تہران جوہری ہتھیاروں کے عدم پھیلاؤ سے متعلق معاہدے (این پی ٹی) کا پابند رکن بنا رہے گا۔
ایران کی سرکاری خبر رساں ادارے تسنیم کے مطابق جرمنی کے اے آر ڈی براڈکاسٹر کو انٹرویو دیتے ہوئے تخت روانچی نے یورینیم کی افزودگی سمیت ایران کی جوہری سرگرمیوں کو روکنے کے خیال کی تردید کی۔
ایران کے نائب وزیر خارجہ ماجد تخت روانچی نے ایران کی جوہری تنصیبات پر امریکی حملوں کو جارحیت اور جرم قرار دیتے ہوئے اس کی مذمت کی ہے اور اس بات پر زور دیا کہ ایران کے پرامن جوہری پروگرام کو کسی صورت روکا نہیں جائے گا۔
ایرانی نائب وزیر خارجہ ماجد تخت روانچی کا کہنا ہے تہران جوہری ہتھیاروں کے عدم پھیلاؤ سے متعلق معاہدے کو برقرار رکھےگا اور این پی ٹی فریم ورک کے تحت توانائی کی ضروریات پوری کرنے اور پُرامن مقاصد کیلئے یورینیم کی افزودگی جاری رکھے گا۔
تخت روانچی نے زور دے کر کہا کہ جب تک ہم جوہری عدم پھیلاؤ کے معاہدے کے دائرہ کار میں رہتے ہیں ہمیں کوئی نہیں بتا سکتا کہ ہمیں کیا کرنا چاہیے اور کیا نہیں کرنا چاہیے۔
ماجد روانچی نے واضح کیا کہ ایرانی جوہری تنصیبات پر امریکی حملے کے بعد مذاکرات جاری رکھنے کا کوئی فائدہ نہیں ہے، ہم مذاکرات کی خاطر مذاکرات نہیں کرتے۔
ایران اسرائیل کشیدگی سے متعلق تمام خبریں
دوسری جانب اقوام متحدہ کی سلامتی کونسل کے ہنگامی اجلاس میں ایرانی مندوب امیر سعید ایروانی نے امریکی حملے کا بھرپور جواب دینے کا اعلان کرتے ہوئے کہا تھا کہ جواب کے لیے وقت اور نوعیت کا فیصلہ ایرانی افواج کریں گی۔
سلامتی کونسل کے ہنگامی اجلاس کے دوران اپنے خطاب میں ایرانی مندوب کا کہنا تھا کہ ایران پر حملہ عالمی قوانین کی خلاف ورزی ہے، اپنے ملک کے خلاف جارحیت کی مذمت کرتا ہوں۔
