تہران: ایران نے انکشاف کیا ہے کہ اس کے حملوں کے رد عمل میں اسرائیلی دفاعی نظام خود کو ٹارگٹ کر رہا ہے۔
غیر ملکی میڈیا رپورٹس کے مطابق ایران نے اسرائیل پر حملوں میں ایسا نیا طریقہ استعمال کرنے کا دعویٰ کیا ہے جس کی وجہ سے اسرائیلی دفاعی نظام خود کو ٹارگٹ کر دیتا ہے۔
روئٹرز کے مطابق ایرانی پاسداران انقلاب نے ایک بیان میں کہا اسرائیل (تل ابیب اور حیفہ) پر تازہ ترین حملے میں نیا طریقہ استعمال کیا گیا ہے، اس نئی تکنیک کی وجہ سے اسرائیل کا کثیر سطحی دفاعی نظام ایک دوسرے ہی کو ہدف بنا دیتا ہے۔
پاسداران انقلاب کے مطابق اس آپریشن میں ایسے اقدامات اٹھائے گئے، اور ایسی صلاحیتوں کا استعمال کیا گیا، کہ امریکا اور مغربی طاقتوں کی بھرپور مدد اور جدید ترین دفاعی ٹیکنالوجی کے باوجود زیادہ سے زیادہ ایرانی میزائل اسرائیل میں کامیابی سے اپنے اہداف تک پہنچے۔
ایران اسرائیل جنگ سے متعلق تازہ ترین خبریں یہاں پڑھیں
روئٹرز کا کہنا ہے کہ اسرائیلی فوج نے فوری طور پر ان حملوں پر تبصرہ کرنے کی درخواست کا جواب نہیں دیا، تاہم اسرائیلی حکام نے بارہا کہا ہے کہ ان کا دفاعی نظام 100 فی صد نہیں ہے اور آنے والے دن سخت ہو سکتے ہیں۔
اے ایف پی کے مطابق اسرائیل کی میگن ڈیوڈ ایڈوم (ایم ڈی اے) ایمرجنسی سروس نے کہا ہے کہ ایران کے تازہ ترین میزائل حملوں میں آج پیر کے روز 5 افراد ہلاک اور 92 زخمی ہوئے ہیں۔ یہ ہلاکتیں وسطی اسرائیل میں 4 مقامات پر ہونے والے حملوں سے ہوئیں، جن میں 2 خواتین بھی شامل ہیں۔ ایم ڈی اے کے مطابق چار میں سے دو مقامات پر سرچ اینڈ ریسکیو آپریشن جاری ہے۔
