Tag: ایران

تہران : ایران میں تیزاب گردی کا شکار ہونے والے افراد نے اپنے جذبات، احساسات اور خیالات کو کینوس پر رنگوں اور برش کی مدد سے پیش کرنے کی کوشش کی ہے، ان پیٹنگز کو نمائش کے لیے آشیانہ گیلری تہران میں پیش کیا گیا.

چہرہ جسم کا سب خوبصورت حصہ ہوتا ہے، یہ انسان کی شناخت بھی ہے اور اسی چہرے سے اپنے قلبی تاثرات کو عیاں کرتا ہے، خوشی کے لمحات ہوں یا غم کی تصویر، چہرے سے صاف عیاں ہوتی ہے لیکن ہمارے اردگرد ایسے لوگ بھی موجود ہیں جو اپنے احساسات تو دور اپنے چہرے کوبھی چھپائے ہوئے پھرتے ہیں، یہ وہ لوگ ہوتے ہیں جنہیں اپنے ہی کسی پیارے نے تیزاب پھینک کر چہرے سے روح تک کو مسخ کردیا ہوتا ہے.

ایران میں تیزاب گردی کے شکار ایک گروپ نے اپنی تکلیف کو قسمت کا لکھا سمجھ کر زندگی بھر کا رونا رونے کے بجائے اپنے احساسات اور تکلیف کو دنیا کے سامنے لانے کا فیصلہ کیا تاکہ جھلسے ہوئے چہرے والے افراد کی کچلی ہوئی روح کا نوحہ سنا جا سکے، محسن مرتضوی اور معصومہ اتائی نے اپنی جیسے بربریت کے شکار دیگر سانجھے داروں کے ساتھ مل کر پینٹنگ نمائش کا اہتمام کیا.

اس اچھوتے خیال کے خالق محسن مرتضوی تھے جنہیں ان کے ایک حاسد کولیگ نے تیزاب گردی کا نشانہ بنایا تھا جس کے باعث ان کا پورا چہرہ جھلس گیا تھا، محسن لکڑی کو تراش کر دیدہ زیب فن پارے بنانے میں مہارت رکھتے تھے، خوش قسمتی انہیں اپنی ہم خیال معصومہ اتائی تک لے آئی، معصومہ کی ایک آنکھ تیزاب گردی کی نذر ہو گئی تھی اور اس دل دہلانے والے حادثے سے قبل وہ ایک مصورہ کے طور پر شہرت حاصل کرنا چاہتی تھیں.

معصومہ اتائی خاندانی رنجش کے باعث اپنے شوہر سے طلاق لینا چاہتی تھی جسے غیرت کا جواز بنا کر معصومہ کے سسر نے اس کے چہرے پر تیزاب پھینک دیا تاکہ وہ اور کہیں شادی کے قابل نہ رہے اور ساری عمر سسک سسک کر گزار دے، معصومہ کے سسرال نے کسی قانونی چارہ جوئی کرنے پر معصومہ کے بچے کو بھی تیزاب سے جھلسانے کی دھمکی دی جس پر معصومہ نے اپنا کیس واپس لے لیا تھا.

واضح رہے کہ دنیا بھر میں تیزاب گردی کے واقعات میں اضافہ دیکھنے کو ملا ہے جس کی بنیادی وجہ تیزاب کا بآسانی دستیاب ہونا اور اس کم قیمت ہتھیار سے مخالف کو ایسی کڑی سزا دی جاسکتی ہے جو شکار کو زندگی بھر سسکتے رہنے کے لیے کافی ہوتا ہے جب کہ قانون میں اس سفاک ظلم کی سزا کا درست تعین نہ ہونا بھی تیزاب گردی کی بڑی وجوہات میں سے ایک ہے.

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانےکے لیے سوشل میڈیا پر شیئر کریں۔

تہران: ایران کے صوبے اصفہان میں مسافر طیارہ دوران پرواز گر کر تباہ ہوگیا ہے جس کے نتیجے میں جہاز کے عملے سمیت 66 افراد ہلاک ہو گئے ہیں۔

تفصیلات کے مطابق ایران کی نجی فضائی کمپنی آسمان ایئر لائنز کا بدقسمت اے ٹی آر 72 مسافر طیارہ اصفہان کے پہاڑی علاقے میں گر کر تباہ ہو گیا جس کے نتیجے میں جہاز میں سوار تمام افراد ہلاک ہوگئے ہیں، امدادی ٹیم کو جائے وقوعہ پر بھیج دیا گیا ہے تاہم خراب موسم کے باعث تاحال امدادی کاموں کا آغاز نہیں کیا جا سکا ہے۔

بین الااقوامی خبر رساں ایجنسی کے مطابق آسمان ایئرلائنز کے طیارے اے ٹی آر 72 نے صبح 5 بجے کے قریب تہران ایئرپورٹ سے یوسج کے لیے پرواز بھری تھی لیکن محض 20 منٹ بعد ہی جہاز کا کنٹرول ٹاور سے رابطہ منقطع ہو گیا تھا، بعد ازاں طیارے کی اصفہان کے شہر سمیرم میں گر کر تباہ ہونے کی اطلاعات موصول ہوئیں۔

آسمان ایئرلائن کے مطابق طیارہ اے ٹی آر 72 کی پرواز نمبر ای پی 3704 نے تہران سے یوسج کے لیے 4 بجکر 33 منٹ پر اُڑان بھری تھی اور کنٹرول ٹاور سے اس کا آخری رابطہ 5 بجکر 55 منٹ پر ہوا تھا، اُس وقت جہاز 16 ہزار 975 فٹ کی بلندی پر تھا اور نیچے کی طرف آرہا تھا۔

موسم کی خرابی کے باعث امدادی ہیلی کاپٹر جائے حادثے پر لینڈنگ نہ کرسکا چنانچہ صوبائی حکومت ریسکیو اداروں کے ساتھ مل کر بذریعہ روڈ جائے حادثہ جانے کی راہ نکالنے میں مصروف ہیں تاہم ابھی تک خاطر خواہ کامیابی حاصل نہیں کر پائے ہیں۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہچانے کےلیے سوشل میڈیا پرشیئر کریں۔