کراچی: پوسٹ کلیرنس آڈٹ کسٹمز میں ایس آر او کے غلط استعمال کے ذریعے بڑے پیمانے پر ٹیکس چوری کا انکشاف ہوا ہے۔
تفصیلات کے مطابق پی سی اے کسٹمز سائوتھ نے ایس آر او 492کے غلط استعمال سے کروڑوں روپے ٹیکس چوری پر انصاری ٹیکسٹائلز اور اقراء انٹر پرائزز کے خلاف مقدمہ درج کرلیا ہے۔
ڈائریکٹوریٹ آف پوسٹ کلیئرنس آڈٹ ساﺅتھ نے ایس آراو 492 کے تحت درآمدہ فیبرک کنسائنمنٹ کی جانچ پر ٹیکس چوری کا انکشاف کیا۔
ڈائریکٹر پی سی اے ساؤتھ شیراز احمد نے کہا کہ اقراء انٹر پرائزز اور میسز انصاری ٹیکسٹائلز نے درآمدی اسکیم کا غلط استعمال کر کے کروڑوں روپے مالیت کی ڈیوٹی و ٹیکسز کی چوری کی۔
انصاری ٹیکسٹائلز نے اگست 2019 میں دو جی ڈیز پر فیبرک درآمدی اسکیم کے تحت کنسائمنٹس کی کلیئرنس کروائی انہوں نے درآمد کنندہ ملز سے درآمد کیے گے فیبرک برآمد نہیں کیا اور 11 کروڑ 48 لاکھ مالیت کے ڈیوٹی و ٹیکسز کی چوری کی۔
اقرا انٹرپٹائزز نے اگست 2020 اور جنوری 2022 کے درمیان 13 کنسائمنٹس میں فیبرک اور چمڑے کی درآمد کی، اقرا انٹرپرائز بھی درآمد شدہ فیبرک اسکیم کے تحت برآمد کرنے میں ناکام رہا۔
اقراء انٹر پرائز نے ایس آر او 492 کا غلط استعمال اور سیلز ٹیکس ایکٹ کی خلاف ورزی کر کے 10 کروڑ 57 لاکھ روپے مالیت کے ڈیوٹی و ٹیکسز کی چوری کی دونوں ٹیکس چور مجرموں نے مجموعی طور پر 22 کروڑ 5 لاکھ روپے کی چوری کی۔
ڈائریکٹر پی سی اے نے بتایا کہ دونوں درآمد کنندگان کے رجسٹرڈ پتہ جعلی نکلے اور آڈٹ کے دوران انکشاف ہوا کہ درآمد کئے جانے والے فیبرک کے کنسائمنٹس پر ڈیوٹی وٹیکسز کی چوری کر کے برآمد کرنے کے بجائے مقامی مارکیٹ میں فروخت کر دیا۔
انصاری ٹیکسٹائل پر 2021 میں کسٹمز ایکسپورٹ پورٹ قاسم کلکٹریٹ میں منشیات کی اسمگلنگ میں ملوث ہونے الزام بھی ہے جبکہ اقراء انٹرپرائزز نے جعلی یونٹ قائم کر کے ایس آراو 492 کے تحت کنسائمنٹس کی کلیئرنس کرائی۔
ڈائریکٹرجنرل پی سی اے ذوالفقار علی نے کہا کہ پوسٹ کلیئرنس آڈٹ ساؤتھ نے دونوں کمپنیوں کے خلاف مقدمہ درج کرلیا ہے اور پی سی اے کی ٹیم دونون کمپنیوں کے خلاف دھوکہ دہی سے محصولات کی چوری کی وصولی کےلئے کارروائی کر رہی ہے۔
