ریاض: سعودی عرب کی وزارت صحت کے ترجمان ڈاکٹر محمد العبد العالی کا کہنا ہے کہ معمولات زندگی بحال ہونے کی ضرورت میں احتیاطی تدابیر کی پابندی کرنا ضروری ہوگی۔
سعودی ویب سائٹ کے مطابق سعودی وزارت صحت کے ترجمان ڈاکٹر محمد العبد العالی کا کہنا ہے کہ معمولات زندگی بحال ہونے کی صورت میں کرونا وائرس سے محفوظ رہنے کے لیے لوگوں کو مقررہ ایس او پیز پر عمل کرنا انتہائی ضروری ہوگا۔
ترجمان کا کہنا تھا کہ یہ درست ہے کہ کرونا وائرس کے مریضوں کی تعداد میں اضافہ ریکارڈ کیا جا رہا ہے تاہم مرحلہ وار معمولات زندگی بحال ہونے کی صورت میں یہ لازمی ہوگا کہ مقررہ ایس او پیز پر ہر ایک سختی سے عمل کرے۔
ڈاکٹر العالی کا مزید کہنا تھا کہ جب بھی معمولات زندگی بحال ہوں خواہ دفتری امور کی انجام دہی ہو یا شاپنگ، یا دیگر امور، ان کے دوران سماجی فاصلے کے اصول، ماسک اور سینی ٹائزر کا استعمال لازمی کیا جائے اسی طرح ہم اپنے معمولات کی ادائیگی کے دوران کرونا وائرس سے محفوظ رہ سکتے ہیں۔
واضح رہے کہ سعودی عرب میں گھر سے باہر نکلتے ہوئے ماسک کا استعمال لازمی قرار دیا جاچکا ہے اور شہریوں پر اس کی پابندی ضروری ہے۔
