کراچی: شہر قائد کے علاقے گلشن بہار میں گھر سے خاتون اور 2 بچوں کی لاشیں برآمد ہوئی ہیں، تینوں افراد کو تیز دھار آلے سے قتل کیا گیا۔
تفصیلات کے مطابق کراچی کے علاقے گلشن بہار میں گھر سے خاتون اور 2 بچوں کی لاشیں برآمد ہوئی ہیں، ریسکیو ذرائع کے مطابق تینوں افراد کو تیز دھار آلے سے قتل کیا گیا۔
جاں بحق ہونے والوں کی شناخت انیلہ، عبدالہادی اور بسیرہ فاطمہ کے ناموں سے ہوئی ہے۔
ایس ایس پی ویسٹ کا کہنا ہے کہ خاتون کا شوہر درزی کا کام کرتا ہے، وہ کسی کام سے باہر گیا تھا جب واپس آیا تو تینوں کی لاشیں موجود تھیں، جائے وقوعہ سے مزید شواہد اکٹھے کیے جارہے ہیں۔
ایس ایس پی ویسٹ کا کہنا ہے کہ خاتون کے شوہر کو حراست میں لے لیا گیا ہے۔
دوسری جانب سہراب گوٹھ گبول ٹاؤن کے قریب فائرنگ سے ایک شخص جاں بحق ہوگیا، مقتول کی شناخت نہیں ہوسکی ہے جبکہ لاش کو ضابطے کی کارروائی کے لیے اسپتال منتقل کردیا گیا ہے۔
ادھر ماڑی پور روڈ پر ٹریفک حادثے کے نتیجے میں 2 خواتین جاں بحق ہوگئیں۔
ایک اور واقعے میں ایس ایس پی ملیر نے پولیس اہلکار کی رشوت طلبی کی ویڈیو پر نوٹس لیا ہے، واقعے میں ملوث اہلکار کے خلاف محکمہ جاتی کارروائی کی ہدایت کردی۔
ڈی ایس پی کمپلین سینٹر کو متاثرہ شہری سے رابطہ کرکے داد رسی کی ہدایت کردی، پولیس اہلکار کی رشوت طلبی کی ویڈیو سوشل میڈیا پر وائرل ہوئی تھی۔
