Tag: ایس ایچ او گرفتار

کراچی: شہر قائد میں پولیس نے کارروائی کرتے ہوئے ڈاکوؤں کو پیسے لے کر چھوڑنے والے ایس ایچ او کو گرفتار کرلیا۔

تفصیلات کے مطابق کراچی پولیس نے کامیاب کارروائی کرتے ہوئے ڈاکوؤں کو پیسے لے کر چھوڑنے والے ایس ایچ او کو گرفتار کرلیا، خفیہ اطلاع پر کارروائی کی گئی جس میں سابق ایچ او راؤ عمیر اور اس کا ساتھی بھی گرفتار ہوا۔

گرفتار ایس ایچ او نے ایک کروڑ 39 لاکھ کی ڈکیتی میں گرفتار ملزمان کو پیسے لے کر چھوڑ دیا تھا، پولیس کے مطابق سابق ایس ایچ او شاہراہ نور جہاں راؤ عمیر اور ریاض کے خلاف مقدمہ درج کرلیا گیا ہے۔

پولیس کے مطابق نیا ناظم آباد میں ملزمان نے تجوری توڑ کر ایک کروڑ 39 لاکھ روپے لوٹے تھے، راؤ عمیر اور ہیڈ کانسٹیبل نے ملزم سے لاکھوں روپے لے کر انہیں رہا کردیا تھا۔

شاہراہ نور جہاں تھانے کا اہلکار ریاض ملزم کا رشتہ دار بتایا جاتا ہے جبکہ سابق ایس ایچ او راؤ عمیر اور ساتھی سے رشوت کے لیے طلب کیے گئے 2 لاکھ روپے برآمد کرلیے گئے ہیں۔

نمائندہ اے آر وائی نیوز کے مطابق ملزم کو جب گرفتار کیا گیا تو اس نے انکشاف کیا کہ اس کو اس سے قبل بھی گرفتار کیا جاچکا ہے اور ایس ایچ او راؤ عمیر اور اس کے ساتھی نے اس سے دو، دو لاکھ روپے لے کر اسے چھوڑا تھا۔

پولیس نے چھاپہ مار کر ایس ایچ او اور ہیڈ کانسٹیبل کو حراست میں لیا اور ان کی خفیہ الماری سے رقم بھی برآمد کی، ایس ایچ او اور اہلکار کو معطل کرکے ان کے خلاف باقاعدہ تحقیقات کا آغاز کردیا گیا ہے۔