کراچی : غیر قانونی تعمیرات کیس میں جسٹس اقبال کلہوڑو نے سخت ریمارکس دیتے ہوئے کہا کہ ایس بی سی اے حکومت کا سب سے بدنام ادارہ ہے، افسران کے لیے جہنم میں بھی خاص جگہ ہوگی۔
تفصیلات کے مطابق سندھ ہائیکورٹ میں گارڈن ویسٹ رمضان آباد میں غیر قانونی تعمیرات کے خلاف درخواست کی سماعت ہوئی۔
عدالتی حکم پر کے ایم سی اور ایس بی سی اے کے افسران عدالت میں پیش ہوئے ، عدالت نے استفسار کیا عمارت بنی اب تک آپ نے کیا کارروائی کی ہے؟ جس پر ڈائریکٹر ایس بی سی اے نے بتایا کہ معاملہ ابھی نوٹس میں آیا ہے، عدالتی حکم پر کارروائی کی جائے گی۔
دوران سماعت جسٹس اقبال کلہوڑو نے کے ایم سی اور ایس بی سی اے افسران کو آڑے ہاتھوں لیتے ہوئے کہا ایس بی سی اے حکومت کا سب سے بدنام ادارہ ہے، افسران کے لیے جہنم میں بھی خاص جگہ ہوگی۔
عدالت نے برہمی کا اظہار کرتے ہوئے کہا کہ آپ اپنا کام عدالتی حکم کے بغیر کیوں نہیں کرتے؟ کوئی مر جائے تو مرے، آپ حرکت میں نہیں آتے، آپ کا کام صرف ٹیبل کے نیچے سے پیسے لینا ہے۔
عدالت نے ایس بی سی اے کو غیر قانونی تعمیرات کے خلاف کارروائی کر کے رپورٹ پیش کرنے کا حکم دیا اور 16 ستمبر تک عملدرآمد رپورٹ طلب کر لی۔
درخواست گزار کے وکیل نے مؤقف اختیار کیا کہ گارڈن ویسٹ میں گراونڈ پلس ون تعمیرات کی اجازت ہے لیکن یہاں خلاف قانون گراونڈ پلس فور عمارت تعمیر کی گئ ہے، اس کے علاوہ رہائشی علاقے میں کمرشل سرگرمیاں بھی جاری ہیں۔
