ایشیا کا ایک ایئرپورٹ ایسا بھی ہے جو نہ صرف بہترین ہے بلکہ کئی گھنٹے گزار کر بھی لوگوں کا دل نہیں بھرتا اور مزید قیام کے متمنی ہوتے ہیں۔
ایئرلائن کنسلٹنگ گروپ اسکائی ٹریکس نے 2025 کے لیے دنیا کے بہترین ایئرپورٹس کی فہرست جاری کی ہے، جس میں ایشیائی ملکوں نے پہلا اور دوسرا نمبر حاصل کیا ہے، سنگاپور کے چانگی ایئرپورٹ کو اس فہرست میں دنیا کے بہترین ہوائی اڈے کے اعزاز سے نوازا گیا ہے۔
قطر کا ایئرپورٹ دوسرے نمبر پر رہا، گزشتہ چند برسوں سے دنیا کے بہترین ائیر پورٹ کی دوڑ قطر اور سنگا پور کے درمیان ہی جاری ہے۔
پچھلے سال قطر کے حماد انٹرنیشنل ائیرپورٹ نے دنیا کے بہترین ائیر پورٹ کا اعزاز اپنے نام کیا تھا مگر اس بار سنگاپور کا چنگی ایئرپورٹ اس بار بازی لے گیا۔
13 ویں بار سنگا پور کے اس دلکش ایئرپورٹ نے سب سے بہترین ایئرپورٹ کا اعزاز اپنے نام کیا ہے، اس سے قبل 2023 میں بھی یہ دنیا کا بہترین ائیرپورٹ قرار پایا تھا۔
یہاں آنے والے لوگوں کو آبشار اور گلاس برج کا نظارہ مسحورکردیتا ہے جبکہ سنگاپور کا یہ ائیرپورٹ برسوں سے لوگوں کی توجہ کا مرکز بنا ہوا ہے، یہاں ہوٹلز، آرٹ گیلریز، ایک میوزیم، ایک سنیما اور ڈائناسور تھیم پارک بھی موجود ہے۔
دنیا بھر کے 565 ایئرپورٹس میں دستیاب سہولیات جیسے ٹرمینل لے آؤٹ، وائی فائی کی دستیابی اور ریسٹورنٹس وغیرہ کے حوالے سے عوامی رائے کو مدنظر رکھ کر یہ فہرست مرتب کی گئی ہے اور فہرست سازی کی گئی ہے۔
دنیا کا تیسرا بہترین ایئرپورٹ جاپان کا ٹوکیو ہینیڈا ائیرپورٹ رہا، اس کے علاوہ جنوبی کوریا کے انچیون ایئرپورٹ کے حصے میں چوتھا نمبر آیا جبکہ ٹوکیو کا ناریتا ایئرپورٹ 5 ویں نمبر پر رہا۔
ہانگ کانگ انٹرنیشنل ایئرپورٹ چھٹے، پیرس کا چارلس ڈیگال ایئرپورٹ 7 ویں، روم کا فلومیسینو ائیرپورٹ 8 ویں، جرمنی کا میونخ ایئرپورٹ 9 ویں جبکہ سوئٹزرلینڈ کا زیورخ ایئرپورٹ 10 ویں نمبر پر آیا۔
