Tag: ایشین ایتھلیٹکس چیمپئن شپ

اولمپکس گولڈ میڈلسٹ ارشد ندیم ایشین ایتھلیٹکس چیمپئن شپ میں شرکت کیلئے جنوبی کوریا روانہ ہوگئے۔

تفصیلات کے مطابق اولمپکس گولڈ میڈلسٹ ارشد ندیم جنوبی کوریا روانہ ہوگئے، پاکستانی ایتھلیٹ جنوبی کوریا میں ایشین ایتھلیٹکس چیمپئن شپ میں حصہ لیں گے۔

ارشد ندیم جنوبی کوریا میں ہونے والی ایشین ایتھلیٹکس چیمپئن شپ میں پاکستان کی نمائندگی کریں گے، جہاں وہ پیرس اولمپکس کے بعد پہلی مرتبہ کسی ایونٹ میں ایکشن میں دکھائی دیں گے۔

واضح رہے کہ ارشد ندیم نے پیرس اولمپکس میں شاندار کارکردگی دکھاتے ہوئے پاکستان کے لیے گولڈ میڈل حاصل کیا تھا، جس کے بعد وہ دنیا بھر میں ایک سپر اسٹار اتھلیٹ کے طور پر ابھرے ہیں۔

گزشتہ روز لاہور میں میڈیا سے گفتگو میں پاکستانی اولمپئن نے موجودہ حالات میں بھارتی حریف نیرج چوپڑا سے متعلق بات کرنے سے انکار کردیا تھا اور کہا تھا کہ میرا مقابلہ ہمیشہ اپنے آپ سے ہوتا ہے۔

ارشد ندیم کا کہنا تھا کہ ماں باپ، قوم کی دعاؤں سے پیرس میں گولڈ میڈل جیتا اور نیا ریکارڈ بھی بنایا تھا، ان شااللّٰہ ایک دن 100 میٹر کی تھرو کرنے میں کامیاب ہوں گا۔

انھوں نے بتایا کہ عید کے بعد انگلینڈ جاؤں گا، میرے کوچ سلمان اقبال بٹ بھی میرے ساتھ جائیں گے، ورلڈ ایتھلیٹکس چیمپئن شپ کی تیاری کرنی ہے۔