Tag: ایف آئی اے امیگریشن

کراچی : انتہائی مطلوب انسانی اسمگلرز کی بیرون ملک فرار کی کوشش ناکام بنادی گئی اور 2 ملزمان گرفتار کرلئے۔

تفصیلات کے مطابق ایف آئی اے امیگریشن نے پشاور ایئرپورٹ پر کاروائیاں کرتے ہوئے 2 انتہائی مطلوب انسانی اسمگلرز کو بیرون ملک فرار ہوتے ہوئے گرفتار کرلیا۔

ایف آئی اے نے بتایا گرفتار ملزمان میں محمد نبی اور امین اللہ شامل ہیں، ملزم محمد نبی نے عمان فرار ہونے کی کوشش کی ملزم کے موبائل فون سے متعدد جعلی ویزے اسٹیکرز بھی برآمد کر لئے گئے۔

ترجمان کا کہنا تھا کہ ملزم انسانی سمگلنگ اور ویزا فراڈ کی گھناونے جرم میں ملوث ہے، ملزم کے خلاف ایف آئی اے کمپوزٹ سرکل مردان میں متعدد مقدمات درج ہیں۔

ترجمان کے مطابق ملزم سادہ لوح شہریوں سے بھاری رقوم بٹورنے کے بعد بیرون ملک فرار ہو رہا تھا، ملزم کو کمپوزٹ سرکل مردان منتقل کر دیا گیا جبکہ جعلی سفری دستاویزات پر بیرون ملک جانے والے مسافر کو آف لوڈ کر دیا گیا۔

ملزم امین اللہ کی جانب سے پیش کیا جانے والا اٹلی ریزیڈنٹ کارڈ جعلی نکلا، ایف آئی اے کا کہنا ہے کہ ابتدائی تفتیش کے مطابق ملزم نے منظم گینگ سے مذکورہ جعلی کارڈ بنوایا ملزم کو مزید قانونی کاروائی کے لئے اینٹی ہیومن ٹریفکنگ سرکل پشاور منتقل کر دیا گیا ، جن سے مزید تفتیش جاری ہے۔

ملتان : ایف آئی اے امیگریشن نے عمرے کی آڑ میں بھیک مانگنے کے غرض سے سعودی عرب جانے والے مسافر کو پکڑ کر آف لوڈ کر دیا۔

تفصیلات کے مطابق ایف آئی اے امیگریشن نے ملتان ایئرپورٹ پر بڑی کارروائی کرتے ہوئے سعودی عرب جانے والےمسافر کو آف لوڈ کر دیا۔

ایف آئی اے نے بتایا کہ ملزم عمرے کی آڑ میں بھیک مانگنے کے غرض سے سعودی عرب جا رہا تھا، ملزم محمد شہباز نے انکشاف کیا سعودی عرب میں تسبیح اورپرفیوم کی فروخت بھی کرنا تھی۔

حکام کا کہنا تھا کہ مسافر جعلی ہوٹل بکنگ اور ریٹرن ٹکٹ پر سعودی عرب جا رہا تھا اور ملزم نےتسبیح اور پرفیوم کی فروخت کی آڑ میں بھیک مانگنا تھی۔

ایف آئی اے کے مطابق حکام ملزم کی نشاندہی پرمحمدعلی نامی ایجنٹ کوبھی گرفتارکرلیا گیا ہے اور مقدمہ بھی درج کرلیا ہے، ایجنٹ محمد علی نے متعدد لوگوں کو بھیک کی غرض سے سعودی عرب بھیجا۔

کراچی : ایف آئی اے امیگریشن نے مطلوب انسانی اسمگلر کو یو اے ای فرار ہوتے ہوئے گرفتار کر لیا، ملزم مختلف افراد کو غیر قانونی طور سے بیرون ملک بھجوانے کے مقدمے میں مطلوب تھا۔

تفصیلات کے مطابق ایف آئی اے امیگریشن نے کراچی ائرپورٹ پر کارروائی کرتے ہوئے ایف آئی اے پشاور کو مقدمے میں مطلوب انسانی اسمگلر کو یو اے ای فرار ہوتے ہوئے گرفتار کر لیا۔

ترجمان ایف آئی اے کا کہنا تھا کہ ملزم نقاش خان مختلف افراد کو غیر قانونی طور سے بیرون ملک بھجوانے کے مقدمے میں مطلوب تھا، ملزم کا نام بلیک لسٹ میں ہونے کی بنا پر پرواز سے آف لوڈ کرکے حراست میں لیا گیا۔

ایف آئی اے امیگریشن نے ملزم کو ایف آئی اے پشاور کی ٹیم کے حوالے کردیا ہے۔

کراچی : ایف آئی اے امیگریشن نے منسوخ ویزے پر دوبارہ امریکا جانے کی کوشش کرنیوالے مسافر کو آف لوڈ کردیا، ملزم نے غلط معلومات ظاہر کرکے امریکا کا بزنس وزٹ ویزا حاصل کیا۔

تفصیلات کے مطابق ایف آئی اے امیگریشن نے کراچی ائیرپورٹ پر کارروائی کرتے ہوئے منسوخ ویزے پردوبارہ امریکاجانے کی کوشش کرنیوالے مسافر کو پکڑ کر آف لوڈ کردیا۔

ایف آئی اے امیگریشن نے بتایا کہ محمد زاہد مغل نامی مسافر غیرملکی پرواز کیلئے امریکا جا رہا تھا، دوران تفتیش انکشاف ہوا کہ ملزم پیشے کے لحاظ سے ویلڈر ہے اور ملزم نے غلط معلومات ظاہر کرکے امریکا کا بزنس وزٹ ویزا حاصل کیا۔

ترجمان نے یہ بھی انکشاف کیا ملزم نے جعلسازی سے خود کو ٹیکسٹائل فیکٹری کا مالک ظاہر کیاتھا، ملزم کی تعلیم میٹرک ہے جبکہ ویزہ فارم میں ملزم نے بیچلرزظاہرکی تھی اور تمام دستاویزات 25 لاکھ کے عوض ایجنٹ سے حاصل کیں۔

امیگریشن ریکارڈ کے مطابق ملزم 2022 میں بھی اسلام آبادایئرپورٹ سے آف لوڈ ہوچکا ہے ، 2022میں ملزم نے اسلام آباد ایئرپورٹ سے امریکہ جانے کی کوشش کی تھی۔

کراچی : ایف آئی اے امیگریشن نے بھائی کے پاسپورٹ پر سفر کرنے والے مسافر کو گرفتار کرلیا ، مسافر اپنے جڑواں بھائی کے پاسپورٹ پر برطانیہ جانے کی کوشش کررہا تھا۔

تفصیلات کے مطابق ایف آئی اے امیگریشن نے لاہور ایئرپورٹ پر کارروائی کرتے ہوئے بھائی کے پاسپورٹ پر سفر کرنے والے مسافر کو آف لوڈ کر دیا۔

ترجمان ایف آئی اے نے بتایا کہ مسافر نے اپنے جڑواں بھائی وجاہت احمد کے پاسپورٹ پر برطانیہ جانے کی کوشش کی، پاسپورٹ پر برطانیہ کا تعلیمی ویزہ لگا ہوا تھا۔

ترجمان کا کہنا تھا کہ مسافر فلائٹ نمبر وی ایس 365 کے ذریعے برطانیہ جا رہا تھا کہ مسافر کو بارڈر مینیجمنٹ سسٹم کے ریکارڈ کی مدد سے گرفتار کیا گیا۔

ابتدائی تفتیش کے مطابق ملزم کا اصلی نام مظہر احمد ہے، گرفتار ملزم کا تعلق چینیوٹ سے ہے تاہم ملزم کو قانونی کارروائی کے لئے اینٹی ہیومن ٹریفیکنگ سرکل لاہور منتقل کر دیا گیا ہے۔