ARYNews.tv | Urdu – Har Lamha Bakhabar

Tag: ایف آئی اے

  • طیارہ حادثہ کی تحقیقات ، ایف آئی اے کی جے آئی ٹی تشکیل

    طیارہ حادثہ کی تحقیقات ، ایف آئی اے کی جے آئی ٹی تشکیل

    اسلام آباد: پی آئی اے طیارہ حادثے کی تحقیقات کے لئے ایف آئی اے کی جے آئی ٹی تشکیل دے دی گئی، ٹیم لاہور ائیر پورٹ سے پی آئی اے اور سی اے اے ملازمین سے تحقیقات شروع کرے گی۔

    تفصیلات کے مطابق سینیٹ سیکریٹریٹ کی ہدایت پر پی آئی اے طیارہ حادثے کی تحقیقات کے لئے ایف آئی اے کی جے آئی ٹی تشکیل دے دی گئی ،ڈائریکٹر ایف آئی اے امیگریشن ٹیم کی سربراہی کریں گے جبکہ اسسٹنٹ ڈائریکٹر نیئرترمزی،اسسٹنٹ ڈائریکٹر ساجد امین ٹیم میں شامل ہیں۔

    ایف آئی اے کی ٹیم پی آئی اے کے طیاروں کی مین ٹیننس کے حوالے سے تحقیقات کرے گی اور کراچی جانیوالے طیارے پرواز8303پہلے سے خرابی کی جانچ پڑتال ہوگی۔

    ذرائع کے مطابق ٹیم لاہورائیر پورٹ سےپی آئی اے اور سی اےاے ملازمین سےتحقیقات شروع کرے گی، جہاں پی آئی اے انجینئرنگ، سیفٹی سمیت دیگر اداروں کے افسران سے پوچھ گچھ ہوگی۔

    یاد رہے پاکستانی ٹیم کے سربراہ فرانسیسی تحقیقاتی ٹیم کی جانب سے ڈی کوڈ کیے گئے بلیک باکس سمیت تمام اہم ریکارڈ لے کر اسلام آباد پہنچ چکی ہے ، ایئر کموڈور عثمان غنی اہم شواہد سے متعلق ابتدائی تحقیقاتی رپورٹ آئندہ چند روز میں ایوی ایشن ڈویژن میں جمع کرائیں گے۔

    ایئرکموڈور 22 جون کو وزیر اعظم عمران خان سے ملاقات کریں گے اور طیارہ حادثے کے اہم شواہد پر مبنی رپورٹ وزیر اعظم کو پیش کریں گے۔

    خیال رہے کہ 22 مئی جمعۃ الوداع کو لاہور سے کراچی آنے والا پی آئی اے کا طیارہ ایئرپورٹ کے قریب واقع ماڈل کالونی جناح گارڈن کی رہائشی آبادی پر گر کر تباہ ہوگیا تھا جس کے نتیجے میں 97 مسافر ہلاک جبکہ 2 مسافر معجزانہ طور پر بچ گئے تھے۔ حادثے میں مقامی لوگوں کی ہلاکتیں بھی ہوئیں جبکہ پانچ گھر مکمل تباہ ہوگئے۔

  • پیٹرولیم مصنوعات کی قلت، ایف آئی اے کی تحقیقات کا پہلا مرحلہ مکمل

    پیٹرولیم مصنوعات کی قلت، ایف آئی اے کی تحقیقات کا پہلا مرحلہ مکمل

    کراچی: ملک میں پیٹرولیم مصنوعات کی مصنوعی قلت کے سلسلے میں ایف آئی اے نے تحقیقات کا پہلا مرحلہ مکمل کر لیا ہے۔

    اے آر وائی نیوز کے مطابق ایف آئی اے نے پیٹرولیم مصنوعات کی قلت کے ضمن میں تحقیقات کا پہلا مرحلہ مکمل کر لیا، ایف آئی اے کو ملک کی 2 بڑی نجی پٹرولیم کمپنیوں نے تحریری حلف نامہ جمع کرا دیا۔

    ذرایع کا کہنا ہے کہ گزشتہ روز شیل کے پاکستان میں ہیڈ آف لیگل اور حیسکول کے ریجنل منیجر ایف آئی اے ٹیم کے سامنے پیش ہوئے، ایف آئی اے حکام نے 4 گھنٹے تک دونوں افسران سے پوچھ گچھ کی۔

    کمپنیوں کے نمائندوں نے ٹیم کو قانون کے مطابق پیٹرولیم مصنوعات ذخیرہ رکھنے اور سپلائی کرنے کی یقین دہانی کرائی، پیٹرولیم مصنوعات کی بروقت درآمد کی بھی یقین دہانی کرائی گئی، ذرایع کا کہنا ہے کہ نمائندوں نے آئندہ سپلائی میں کمی نہ آنے کی باقاعدہ تحریری یقین دہانی کرائی ہے۔

    ’ذخیرہ اندوزوں کی کمر توڑیں گے‘ : وفاقی وزیر کا 72 گھنٹوں میں پیٹرول کی قلت ختم کرنے کا اعلان

    خیال رہے کہ ایف آئی اے نے تین کمپنیوں کے سی ای اوز کو طلب کیا تھا تاہم تینوں پیش نہیں ہوئے، کمپنیوں کے نمائندوں نے ایف آئی اے دفتر پیش ہو کر بیان ریکارڈ کرایا ہے، تاہم نمائندوں کے بیان سے مطمئن نہ ہونے پر تینوں کمپنیوں کے سی ای اوز کو آج پھر طلب کیا گیا ہے۔

    شیل کے ہارون رشید، حیسکول کے عقیل احمد، اور آئل اینڈ گیس کمپنی کے خالد ریاض کو نوٹسز جاری کر دیے گئے ہیں، جس میں تینوں افسران کو لازمی پیش ہونے اور ریکارڈز ہمراہ لانے کی ہدایت کی گئی ہے۔

    ذرایع نے بتایا کہ مذکورہ نوٹس ایف آئی اے کے سامنے پیش ہونے والے کمپنیوں کے نمائندوں کے ذریعے بھجوایا گیا ہے۔

  • ایف آئی اے سائبر کرائم ونگ کی کارروائی،خاتون کو بلیک میل کرنے والا ملزم گرفتار

    ایف آئی اے سائبر کرائم ونگ کی کارروائی،خاتون کو بلیک میل کرنے والا ملزم گرفتار

    اسلام آباد: وفاقی تحقیقاتی ادارے (ایف آئی اے) کے سائبر کرائم ونگ نے خاتون کو بلیک میل، ہراساں کرنے اور دھمکیاں دینے کے الزام میں ایک ملزم کو گرفتار کر لیا۔

    تفصیلات کے مطابق ایف آئی اے سائبر کرائم ونگ گوجرانوالہ نے کارروائی کرتے ہوئے ایک ملزم کو گرفتار کر لیا۔ملزم پر غیر اخلاقی ویڈیو شیئر کرنے،بلیک میل کرنے کا الزام ہے۔

    ایف آئی اے حکام نے بتایا کہ ملزم نے لڑکی کو ریسٹورنٹ ملنے کے لیے بلایا جہاں ٹیم پہلے سے ہی موجود تھی۔ملزم لڑکی کو نہ ملنے پر غیر اخلاقی ویڈیو شیئر کرنے کی دھمکی دے رہا تھا۔

    اس سے قبل رواں سال 25 اپریل کو ایف آئی اے سائبر کرائم ونگ ملتان نے کارروائی کرتے ہوئے خاتون کو بلیک میل کرنے والے امتیاز حسین نامی ملزم کو گرفتار کیا تھا۔ایف آئی اے حکام کا کہنا تھا کہ ملزم نے خاتون کا واٹس ایپ اکاؤنٹ ہیک کر لیا تھا۔

    یاد رہے کہ رواں برس یکم مارچ کو ایف آئی اے نے گلبہار کراچی کی رہائشی خاتون کو بلیک میل کرنے کے الزام میں ملزم محمد اطہر خان کو گرفتار کر کے شواہد حاصل کر لیے تھے۔

  • شوگر ملز ایسوسی ایشن نے انکوائری افسران کی اہلیت پر سوال اٹھا دیا

    شوگر ملز ایسوسی ایشن نے انکوائری افسران کی اہلیت پر سوال اٹھا دیا

    اسلام آباد: شوگر ملز کی نمائندہ تنظیم نے ایف آئی اے کو ایک خط میں انکوائری افسران کو انڈسٹری معاملات سے نابلد قرار دیتے ہوئے کہا ہے کہ چینی بحران پر وزیر اعظم کی انکوائری کمیٹی کی تحقیقات کے مندرجات سے سخت دھچکا لگا ہے۔

    اے آر وائی نیوز کے مطابق پاکستان شوگر ملز ایسوسی ایشن نے ایف آئی اے کو تفصیلی جواب جمع کرا دیا، تنظیم نے ڈی جی ایف آئی اے واجد ضیا کو خط میں 3 اپریل کو جاری کی گئی تحقیقاتی رپورٹ پر رد عمل دیتے ہوئے کہا ہے کہ تحقیقاتی کمیٹی معاملے کے بنیادی پہلوؤں کا جائزہ لے کر درست حقائق سامنے لانے میں ناکام ہو گئی۔

    اس خط کی کاپی وزیر اعظم عمران خان اور وزیر داخلہ کو بھی بھجوائی گئی ہے، پنجاب، سندھ، پختونخوا کے وزرائے اعلیٰ کو بھی رد عمل سے آگاہ کیا گیا، خط میں کہا گیا ہے کہ تحقیقاتی رپورٹ میں تضادات موجود ہیں، یہ قیاس آرائیوں اور گمراہ کن معلومات پر مبنی ہے، جن 3 افسران کو تحقیقات کی ذمہ داری دی گئی وہ کرمنل تحقیقات کا تجربہ رکھتے ہیں، تاہم ان کے پاس کمرشل یا بزنس سے متعلق معاملات کا تجربہ نہیں تھا۔

    آٹا چینی بحران : وزیراعظم عمران خان نے ایک اور وعدہ پورا کردیا

    ملز ایسوسی ایشن نے خط میں مؤقف اختیار کیا ہے کہ مذکورہ افسران کے پاس چینی سبسڈی، ایکسپورٹ سمیت قیمتوں کے اتار چڑھاؤ کا زیادہ علم نہ تھا، اس لیے تحقیقاتی کمیٹی ایکس مل پرائس اور سپلائی اینڈ ڈیمانڈ کا طریقہ کار سمجھنے میں ناکام رہی، رپورٹ میں ملز مالکان پر خود ساختہ، گمراہ کن اور غلط الزامات لگائے گئے، انکوائری کمیٹی نے چینی کی قیمتوں، طلب اور رسد کے غلط تخمینے لگائے۔

    آٹا، چینی بحران کی تحقیقاتی رپورٹ، وفاقی کابینہ میں رد و بدل

    خط میں پاکستان شوگر ملز ایسوسی ایشن نے شوگر ملز کے فرانزک آڈٹ پر بھی اعتراض اٹھا دیا، کہا گیا کہ ملوں کے آڈٹ کا فیصلہ بظاہر امتیازی سلوک کے طور پر کیا گیا ہے، کمیٹی شوگر ایڈوائزری بورڈ کے فیصلوں کا جائزہ لینے میں بھی ناکام رہی، اقتصادی رابطہ کمیٹی اور وفاقی کابینہ کے فیصلوں کو بھی نظر انداز کیا گیا۔

    خط میں کہا گیا کہ چینی بحران کی انکوائری رپورٹ میں تضادات کی نشان دہی کی جا رہی ہے، انکوائری رپورٹ کے میزانیے نمبر 5 اور میزانیے نمبر 8 میں واضح تضادات ہیں، چینی پیداواری نرخ کا تعین وفاقی حکومت کرتی ہے، انکوائری کمیٹی اس حقیقت سے ناواقف نکلی، وفاقی حکومت گنے کی سپورٹ پرائس سے پیداواری قیمت کنٹرول کرتی ہے۔

  • بے نظیرانکم سپورٹ پروگرام سے فائدہ اٹھانے والے افسران کے لیے بری خبر

    بے نظیرانکم سپورٹ پروگرام سے فائدہ اٹھانے والے افسران کے لیے بری خبر

    کراچی: بے نظیرانکم سپورٹ پروگرام سے فائدہ اٹھانے والے افسران کو ایف آئی اے نے نوٹس جاری کرنا شروع کر دیے۔

    تفصیلات کے مطابق بے نظیرانکم سپورٹ پروگرام سے فائدہ اٹھانے والے تمام افسران کو ایف آئی اے نے طلبی کے نوٹس جاری کر دیے۔ افسران کو ایف آئی اے کارپوریٹ کرائم سرکل طلب کیا جا رہا ہے۔

    افسران کو ایف آئی اے کارپوریٹ کرائم سرکل طلب کیا جا رہا ہے۔ تمام افسران کوبی آئی ایس پی کی سلپ،دیگر دستاویز لانے کی ہدایت کر دی گئی ہے۔

    یاد رہے کہ گزشتہ ماہ بے نظیر انکم سپورٹ پروگرام سے فائدہ اٹھانے والوں میں اعلیٰ سرکاری افسران کے شامل ہونے کا انکشاف ہوا تھا، رپورٹ کے مطابق گریڈ 17 سے 21 کے 2 ہزار 543 سرکاری افسران میں سے متعدد نے بیویوں کے نام پر پیسے وصول کیے، بلوچستان میں سب سے زیادہ سرکاری افسران پروگرام سے مستفید ہوئے۔

    سندھ میں گریڈ 18 کے 342 افسران نے پروگرام سے فائدہ اٹھایا جبکہ سندھ سے گریڈ 21 کے 3 افسران بھی شامل تھے۔

    ینظیرانکم سپورٹ پروگرام سے رقم بٹورنے والے چار افسران برطرف

    بعدازاں بے نظیر انکم سپورٹ پروگرام سے رقم بٹورنے والے چارافسران کو برطرف کر کے افسران سے 4 لاکھ 40 ہزار روپے بھی وصول کر لیے گئے ہیں۔

  • ایف آئی اے میں بھرتیوں کی اجازت دیدی گئی

    ایف آئی اے میں بھرتیوں کی اجازت دیدی گئی

    اسلام آباد: وفاقی تحقیقاتی ادارے ایف آئی اے میں کام کی رفتار کو بڑھانے کے لیے آسامیوں پر بھرتی کی اجازت دے دی گئی۔

    تفصیلات کے مطابق حکومت نے پابندی نرم کرتے ہوئے ڈی جی ایف آئی اے واجد ضیا کو نئی بھرتیوں کے لیے گرین سگنل دے دیا۔

    حکومت نے2013 میں بھرتیوں پرپابندی عائدکی تھی، ڈی جی ایف آئی اے بننے کے بعد 22 جنوری کو واجد ضیا نے بھرتیوں پر پابندی کےحکم میں نرمی کیلئےخط لکھا جس پر حکومت نے 1257 آسامیوں پر بھرتی کی اجازت دے دی۔

    یہ بھی پڑھیں: واجد ضیا ڈی جی ایف آئی اے مقرر

    اجازت ملنے کے بعد ایف آئی اے میں ایک ایڈیشنل ڈی جی اور 7 ڈائریکٹر بھرتے کیے جائیں گے، 97انسپکٹر، 121سب انسپکٹر، 252 اےایس آئی بھرتی ہوں گے۔

    اسی طرح 159ہیڈ کانسٹیبل اور 373 کانسٹیبل بھی بھرتی کیےجائیں گے، وزارت خزانہ نے بھرتیوں کی اجازت کانوٹیفکیشن جاری کر دیا ہے۔

    ذرائع کا کہنا ہے کہ بھرتیوں کا تمام عمل بجٹ سے پہلے کیا جائےگا اور آئندہ مالی سال کےبجٹ میں آسامیوں کےلیے فنڈز فراہم کیے جائیں گے۔

  • اسلام آباد: جعلی ویزے پر بیرون ملک سفر کرنے کی کوشش ناکام

    اسلام آباد: جعلی ویزے پر بیرون ملک سفر کرنے کی کوشش ناکام

    اسلام آباد: اسلام آباد ایئرپورٹ پر جعلی ویزا ہونے کی بنیاد پر 5 مسافروں کو گرفتار کرلیا گیا۔

    اے آر وائی نیوز کے مطابق ترجمان سول ایوی ایشن اتھارٹی (سی اے اے) کا کہنا ہے کہ جعلی ویزا ہونے پر گرفتار پانچوں مسافر ملائیشیا جانے کی کوشش کررہے تھے۔

    مسافروں کو ایف آئی اے کے حوالےکر دیا گیا ہے، جہاں دیگر تفتیشی کارروائیاں جاری ہیں۔

    جعلی اقامے اور ویزے کی بنیاد پر دنیا بھر میں جعل سازوں کی گرفتاریاں عام ہوچکی ہیں۔ اس سے قبل سعودی عرب میں ایک اتھوپین شخص گرفتار ہوا تھا جو لوگوں کو جعلی اقامے بنا کر دیتا تھا۔

    اسلام آباد ایئرپورٹ پر ایف آئی اے کی کارروائی، مطلوب ملزم گرفتار

    خیال رہے کہ 9 جنوری کو وفاقی تحقیقاتی ایجنسی (ایف آئی اے) نے اسلام آباد ایئرپورٹ پر کارروائی کرتے ہوئے انسانی اسمگلنگ میں مطلوب ملزم کو گرفتار کیا تھا۔

    یاد رہے کہ گزشتہ سال نومبر میں ایف آئی اے کی ٹیم کی اسلام آباد ایئرپورٹ پر بڑی کارروائی کے نتیجے میں انسانی اسمگلنگ میں ملوث نیٹ ورک کے دو ایجنٹ سمیت 6 افراد کو گرفتار کی عملی میں آئی تھی۔

  • ایئرپورٹ پر مسافر سے بدتمیزی، عمرہ زائر کو روانگی سے روک دیا

    ایئرپورٹ پر مسافر سے بدتمیزی، عمرہ زائر کو روانگی سے روک دیا

    پشاور: خیبرپختونخوا میں ایئرپورٹ پر مسافر سے بدتمیزی اور ہراساں کرنے کا دوسرا واقعہ سامنے آگیا، باچاخان ایئرپورٹ پر عمرے پر جانے والے مسافر کو امیگریشن عملے نے روک دیا۔

    تفصیلات کے مطابق مسافر غیرملکی ائیرلائن کی پرواز سے دبئی سے براستہ جدہ جارہا تھا۔ ایف آئی اے عملے نے مسافر کو پاسپورٹ پر عمر غلط لکھنے پر آف لوڈ کیا بعد ازاں حقیقت سامنے آگئی۔

    مسافر اور ایف آئی اے اہلکار میں تکرار پر سی اے اے نے واقعہ کا نوٹس لیا، سی اے اے عملے نے مسافر کی دستاویزات چیک کیں تو درست نکلیں۔ ایف آئی اے حکام نے مسافر کو آف لوڈ کرنے والے اہلکار کے خلاف کارروائی کی ہدایت کردی۔

    سٹیزن پوررٹل پر پی آئی اے عملے کی 2 مسافر خواتین سے بدتمیزی کی شکایت

    ذرائع کا کہنا ہے کہ مسافر کو دوسری پرواز سے سعودی عرب روانہ کیا جائے گا۔

    خیال رہے کہ رواں سال 4 جنوری کو پشاور ایئرپورٹ پر برطانیہ سے آنے والے دو سینئر ڈاکٹرز میاں بیوی سے ایف آئی اے امیگریشن کے عملے کی جانب سے نامناسب رویہ پر وزارت ہوا بازی نے نوٹس لیا تھا۔

    اے آر وائی نے ایف آئی اے ایمیگریشن عملے سے متعلق خبر نشر کی تھی، وفاقی وزیر ہوابازی غلام سرور خان نے پشاور ائیرپورٹ پر پاکستانی ڈاکٹروں کی تضحیک کا نوٹس لیتے ہوئے سول ایوی ایشن اتھارٹی کے چیف آپریٹنگ آفیسر کو تحقیقات کا حکم دیتے ہوئے24 گھنٹے کے اندر تحقیقات مکمل کر نے کی ہدایت کی تھی۔

  • اسلام آباد ایئرپورٹ پر ایف آئی اے کی کارروائی، مطلوب ملزم گرفتار

    اسلام آباد ایئرپورٹ پر ایف آئی اے کی کارروائی، مطلوب ملزم گرفتار

    اسلام آباد: وفاقی تحقیقاتی ایجنسی (ایف آئی اے) نے اسلام آباد ایئرپورٹ پر کارروائی کرتے ہوئے انسانی اسمگلنگ میں مطلوب ملزم کو گرفتار کر لیا۔

    تفصیلات کے مطابق ایف آئی اے نے اسلام آباد ایئرپورٹ پر کارروائی کے دوران سی ٹی ڈی اور ایف آئی اے کو مطلوب خطرناک ملزم کو گرفتار کر لیا۔

    ایف آئی اے کے مطابق ظفر اقبال پرواز ٹی کے 710 سے استنبول سے اسلام آباد پہنچا تھا، دوران ایمیگریشن ملزم ظفر اقبال کو نام بلیک لسٹ میں ہونے پر گرفتار کیا گیا۔

    ذرائع کا کہنا ہے کہ ملزم کا نام 2015 میں ریڈ بک میں شامل کیا گیا تھا، صوبہ پنجاب کے شہر گجرات کا رہائشی ظفر اقبال انسانی اسمگلنگ میں بھی ملوث ہے۔

    انسانی اسمگلنگ میں ملوث دو ایجنٹ سمیت 6 ملزمان اسلام آباد ایئر پورٹ سے گرفتار

    یاد رہے کہ گزشتہ سال نومبر میں ایف آئی اے کی ٹیم نے اسلام آباد ایئرپورٹ پر بڑی کارروائی کرتے ہوئے انسانی اسمگلنگ میں ملوث نیٹ ورک کے دو ایجنٹ سمیت 6 افراد کو گرفتار کیا تھا۔

    ایف آئی اے کے مطابق مذکورہ ملزمان نے حریم ٹریولز کے نام سے جعلی دستاویزات بنا رکھی تھیں، ملزمان نے سرفراز، ذیشان، نعمان اور حامد کو اپنا ملازم ظاہر کیا تھا۔

  • سی اے اے نے پاکستانی سائنس دان کا پاسپورٹ پھاڑے جانے کا نوٹس لے لیا

    سی اے اے نے پاکستانی سائنس دان کا پاسپورٹ پھاڑے جانے کا نوٹس لے لیا

    کراچی: سول ایوی ایشن اتھارٹی نے پاکستانی سائنس دان ڈاکٹر فیصل کا پاسپورٹ ملتان ایئرپورٹ پر پھاڑے جانے کا نوٹس لے لیا ہے۔

    تفصیلات کے مطابق ایف آئی اے عملے کی جانب سے پاکستانی سائنس دان کے کھانسنے پر پاسپورٹ پھاڑنے کے معاملے کا سی اے اے نے نوٹس لے لیا، ایف آئی اے نے تحقیقات بھی شروع کر دی اور اے ایس ایف سے تفصیلات اور فوٹیج طلب کر لی۔

    اے آر وائی نیوز کے مطابق یہ واقعہ 19 دسمبر کو ملتان ائیرپورٹ پر پیش آیا تھا، ڈاکٹر فیصل اپنی فیملی کے ہم راہ عمرے سے واپس پاکستان پہنچے تھے، نوجوان سائنس دان کی کھانسی کو ایف آئی اے عملے نے اپنی شان میں گستاخی سمجھا، اور تلخ کلامی پر امیگریشن عملے نے ان کے پاسپورٹ سے ویزے والا صفحہ پھاڑ کر پاسپورٹ منہ پر مارا جس سے ان کی آنکھ کے اوپر نشان بھی بنا۔

    ایف آئی اے عملے نے کھانسنے پر پاکستانی سائنس دان کا پاسپورٹ پھاڑ دیا

    ڈاکٹر فیصل کا مؤقف تھا کہ کھانستے وقت منہ پر ہاتھ نہ رکھنا عملے کو اتنا ناگوار گزرا کہ ان کے ساتھ تضحیک آمیز رویہ اختیار کیا گیا، وہ بخار کی حالت میں تھے اس لیے کھانسی آئی تومنہ پر ہاتھ نہ رکھ سکے تھے۔

    بعد ازاں، ڈاکٹر فیصل نے ایئر پورٹ پر پیش آنے والے واقعے کو سوشل میڈیا پر وائرل کر دیا، وہ حال ہی میں جرمنی سے پی ایچ ڈی مکمل کر کے وطن لوٹے تھے، فیملی کے ہم راہ عمرہ بھی ادا کیا، جس سے واپسی پر ناخوش گوار واقعہ پیش آیا۔