اسلام آباد: ایف آئی اے نے اسلام آباد ایئرپورٹ پر کارروائی کرتے ہوئے انسانی اسمگلنگ میں ملوث نیٹ ورک کے 2 ایجنٹ سمیت 6 افراد کو گرفتار کرلیا۔
تفصیلات کے مطابق ایف آئی اے نے اسلام آباد ایئرپورٹ پر کارروائی کے دوران انسانی اسمگلنگ میں ملوث 2 ملزمان سمیت 6 افراد کو گرفتار کرلیا۔ ملزمان 4 افراد کو نجی ایئرلائنز سے کمبوڈیا براستہ قطر لے جا رہے تھے۔
ایف آئی اے حکام کے مطابق ملزمان نے حریم ٹریول کے نام سے جعلی دستاویزات بنا رکھی تھیں، ملزمان نے سرفراز، ذیشان، نعمان اور حامد کو اپنا ملازم ظاہر کیا تھا۔
ایف آئی اے حکام نے بتایا کہ ملزمان نے کمبوڈیا جانے کے لیے فی کس 4 لاکھ 20 ہزار روپے وصول کر رکھے تھے، ملزمان نے کمبوڈیا کے ویزے جعلی دستاویزات پر ویتنام سے حاصل کیے تھے۔ ملزم طلحہ شہزاد کا ایک بھائی کمبوڈیا میں انسانی اسمگلنگ میں شامل ہے۔
یاد رہے کہ گزشتہ ماہ فیصل آباد میں ایف آئی اے نے بڑی کارروائی کرتے ہوئے گجرات اور منڈی بہاؤالدین سے غیرقانونی طریقے سے ترکی اور یونان جانے والے 45 شہری گرفتار کرلیے تھے اس کے علاوہ 9 انسانی اسمگلرز اور پراپرٹی ایجنٹس کو گرفتار کرکے ان کے خلاف بھی مقدمات درج کیے گئے تھے۔
