اسلام آباد : فیڈرل بورڈ آف ریونیو (ایف بی آر) کے 117افسران نےتنخواہیں کم ہونے پر جون تک چھٹیوں کی درخواست دے دی۔
تفصیلات کے مطابق فیڈرل بورڈ آف ریونیو (ایف بی آر) کے افسران نے تنخواہیں کم ہونے پراحتجاج کا انوکھاطریقہ نکال لیا، ذرائع نے بتایا ہے کہ انکم ٹیکس کے 117افسران نے جون تک چھٹیوں کی درخواست دے دی۔
انکم ٹیکس گریڈ 17 سے 19 کےافسران نے چیئرمین ایف بی آر کوخط لکھا ، جس میں کہا ہے کہ مہنگائی کی وجہ سے تنخواہ کم ہے اور ڈیوٹی پر آنے کے اخراجات نہیں، موجودہ تنخواہ میں گھریلو اخراجات پورے نہیں کیے جاسکتے۔
افسران کا کہنا تھا کہ 150 فیصد ایگزیکٹو الاؤنس اور تنخواہیں نہ بڑھائیں تو مزید سخت ردعمل ہوگا، وزیراعظم آفس، سپریم کورٹ اور کئی اداروں میں تنخواہیں 100 گنا زیادہ ہیں۔
بجٹ سازی کے اہم عمل کے دوران ایف بی آر افسران کی ممکنہ غیر موجودگی ملکی معیشت پر سنگین اثرات مرتب کر سکتی ہے۔ ایف بی آر حکومت کے لیے ٹیکس اور ریونیو اکٹھا کرنے کا ذمہ دار ہے۔
چیئرمین ایف بی آرعاصم نے کہا ہے کہ ٹیکس حکام کےتنخواہ کے معاملے پروزیر اعظم سےبات کروں گا، ٹیکس حکام کے پرفارمنس الاؤنس 2015 سے فریز ہیں۔
یاد رہے اس سے قبل ایک عجیب و غریب درخواست میں فیڈرل بیورو آف ریونیو کے افسر نے بڑھتی ہوئی مہنگائی کے درمیان گھریلو اخراجات کو پورا کرنے کے لئے وزیر اعظم شہباز شریف کو لکھے گئے خط میں کرپشن کی اجازت مانگی تھی۔
