کراچی : انٹرنیٹ سست ہونےکی وجہ ٹیکس گوشوارے جمع کرانے والے بھی پریشان ہیں ، ٹیکس دہندگان کا کہنا ہے کہ ایف بی آر کا فارم اوپن نہیں ہو رہا ہے اور دستاویز اپ لوڈ نہیں ہو رہیں۔
تفصیلات کے مطابق انٹرنیٹ میں رکاوٹ سے ٹیکس گوشوارے جمع کرانے میں مشکلات کا سامنا ہے ، ٹیکس گوشوارے بروقت جمع نہ ہونے پر ٹیکس دہندگان نے اےآر وائی نیوز سے رابطے کیا۔
ٹیکس دہندگان کا کہنا ہے کہ انٹرنیٹ کی سست روی سے ایف بی آرکاسسٹم بھی سست ہوگیا ہے، انکم ٹیکس گوشوارے جمع کرانے میں دشواری کا سامنا ہے۔
ٹیکس دہندگان نے کہا کہ انٹرنیٹ سست ہونےکی وجہ سے دستاویز اپ لوڈ نہیں ہو رہیں،کچھ دہندگان 30 ستمبر کی آخری تاریخ سے پہلے گوشوارے جمع کرانا چاہتےہیں تاہم انٹرنیٹ سست ہونے کی وجہ ایف بی آر کا فارم بھی اوپن نہیں ہو رہا ہے۔
خیال رہے فیڈرل بورڈ آف ریونیو (ایف بی آر) نے انکم ٹیکس گوشوارے جمع کرانے کی آخری تاریخ 30 ستمبر کا اعلان کیا ہے۔
ایف بی آر نے اس بات پر زور دیا کہ مقررہ تاریخ تک ریٹرن فائل کرنے میں ناکام رہنے والے افراد اور اداروں کے خلاف قانونی کارروائی کی جائے گی اور ایسے افراد کے لیے کم از کم جرمانہ ایک ہزار روپے مقرر کیا گیا ہے
ایف بی آر نے یہ واضح کیا کہ جن لوگوں کے پاس غیر ملکی سفری ریکارڈ، بینک بیلنس، جائیدادوں، مکانات یا گاڑیوں کے مالک ہیں وہ بغیر کسی ناکامی کے اپنے ٹیکس گوشوارے جمع کرائیں۔
