Tag: ایف بی آر

اسلام آباد : وفاقی حکومت نے ایف بی آر سے اہم اختیارات واپس لے لیے اور ٹیکس پالیسی سازی اور ٹیکس وصولی کو الگ الگ کردیا گیا۔

تفصیلات کے مطابق آئی ایم ایف کی ایک اور شرط پر عملدرآمد مکمل کرتے ہوئے وفاقی حکومت نے ایف بی آر سے اہم اختیارات واپس لے لیے۔

کابینہ نے وزارت خزانہ میں ٹیکس پالیسی آفس قائم کردیا اور اس حوالے سے نوٹیفکیشن بھی جاری کردیا گیا۔

ٹیکس پالیسی سازی اور ٹیکس وصولی کو الگ الگ کردیا گیا ہے ، ایف بی آر صرف ٹیکس وصولی کے کام کی حد تک محدود رہے گا۔

نوٹیفکیشن میں بتایا گیا کہ ایف بی آر ریونیو بڑھانے کیلئے صرف ٹیکس تجاویز عملدرآمد پر توجہ دے گا اور ٹیکس پالیسی آفس وزیر خزانہ وریونیو کو رپورٹ کرے گا۔

نوٹیفکیشن کے مطابق ٹیکس پالیسی آفس حکومتی اصلاحاتی ایجنڈا بنانے پر کام کرے گا ساتھ ہی ٹیکس پالیسیوں اور تجاویز کا تجزیہ کرے گا۔

ڈیٹا ماڈلنگ، ریونیو، اکنامک فارکاسٹنگ کے ذریعے ٹیکس پالیسیوں اور تجاویز کا تجزیہ ہوگا۔

ذرائع کا کہنا ہے کہ آئی ایم ایف کو ٹیکس پالیسی سازی، وصولی خودمختاررکھنےکی یقین دہانی کرائی گئی تھی، ٹیکس پالیسی آفس انکم، سیلز ٹیکس اور ایف ای ڈی سے متعلق پالیسی رپورٹس پیش کرے گا اور فراڈ کم کرنے کیلئے خامیوں پر قابو پا کر ٹیکس کے نفاذ پر توجہ دی جائے گی۔

وزیراعلیٰ سندھ سید مراد علی شاہ نے کہا ہے کہ ایف بی آر کرپشن کا گڑھ بن چکا ہے اس لیے زرعی ٹیکس یہ نہیں بلکہ صوبائی حکومت جمع کرے گی۔

اے آر وائی نیوز کے مطابق وزیر اعلیٰ سندھ مراد علی شاہ نے سندھ اسمبلی کے اجلاس میں دھواں دھار خطاب کرتے ہوئے ایف بی آر کو کڑی تنقید کا نشانہ بنایا اور آئی ایم ایف کے دباؤ پر زرعی ٹیکس کے نفاذ کی وجہ بھی ایف بی آر کو قرار دے دیا ہے۔

وزیراعلیٰ سندھ نے کہا کہ ایف بی آر کرپشن کا گڑھ ہے اور وزیراعظم بھی یہ کئی بار کہہ چکے ہیں کہ اس ادارے میں اصلاحات ضروری ہیں۔ ایف بی آر نے اپنی ناکامی چھپانے کیلیے کہا کہ ایک زرعی سیکٹر ٹیکس نہیں دیتا لیکن ایف بی آر زرعی ٹیکس جمع نہیں کرے گی بلکہ صوبائی حکومت کرے گی اور ہم چاہتے ہیں کہ سیلز ٹیکس کو بھی صوبوں کو دیا جائے کیونکہ سندھ حکومت نے اپنے تمام ٹیکس اہداف حاصل کیے ہیں اور سندھ ریونیو بورڈ ہر سال اپنے اہداف پورے کرتا ہے۔

مراد علی شاہ نے کہا کہ زرعی ٹیکس قانون پاس کرنے کیلیے آئی ایم ایف کا دباؤ تھا۔ آئی ایم ایف سے بات کرنا وفاقی حکومت کا کام ہے ، لیکن آئی ایم ایف سے بات چیت میں صوبوں کو شامل نہ کرنا غلط طریقہ ہے۔ وفاقی حکومت صوبوں کیساتھ ایسا سلوک نہ کرے۔

ان کا کہنا تھا کہ ہمیں ایف بی آر اور وفاقی حکومت نے یہ ٹیکس لگانے کا کہا اور کہا گیا کہ بل پاس نہ کیا تو آئی ایم ایف ٹیم نہیں آئیگی اور ہم ڈیفالٹ میں چلے جائیں گے۔ آئی ایم ایف کو کیا پتہ کہ ہاری اور زمیندار میں کیا فرق ہے۔ آئی ایم ایف کو غلط راستے دکھائیں گے تو وہ اسی جگہ پر اٹک جائیں گے۔

وزیراعلیٰ سندھ نے کہا کہ کچھ لوگ اس ٹیکس کے نفاذ پر خوش ہو رہے ہیں، مگر میں زرعی ٹیکس لگانے پر ہرگز خوش نہیں ہوں۔ فوڈ سیکیورٹی کے مسائل آئے تو اس ٹیکس پر نظرثانی کرنا ہوگی۔ میں اب بھی کہتا ہوں کہ زرعی ٹیکس بل میں کوئی ترمیم کی گنجائش ہے، تو مشاورت کر لیتے ہیں۔

مراد علی شاہ نے مزید کہا کہ یہ سوچ غلط ہے کہ زرعی ٹیکس نافذ نہیں، یہ ٹیکس 20 سال سے ہے اور اس سال بھی زرعی ٹیکس سے ایک ارب روپے جمع کر چکے ہیں۔ میری اپنی فیملی کی ہزاروں ایکڑ زمین ہے۔ مجھ سمیت ناصر شاہ ، شرجیل میمن، سعید غنی، سردار شاہ ایمانداری سے زرعی ٹیکس دیتے ہیں۔

ان کا کہنا تھا کہ زرعی سیکٹر میں لوگ 35 فیصد ٹیکس دیتے تھے۔ ایف بی آر نے 45 فیصد کر دیا اور اس پر مسائل سامنے آئیں گے۔ ایف بی آر میں ایسے لوگ بھی بیٹھے ہیں جن کو کچھ نہیں پتہ۔ بہت سے ایسے زمیندار بھی ہونگے جو افورڈ نہیں کرسکتے۔ زمیندار زمینداری چھوڑے گا تو فوڈ سیکیورٹی کے مسائل کا خدشہ ہے۔

وزیراعلیٰ سندھ نے کہا کہ پیپلز پارٹی وفاقی حکومت کا حصہ نہیں، مگر ہم اس کو سپورٹ اس لیے کر رہے ہیں کہ وہ اپنے پیروں پر کھڑی رہے۔

اسلام آباد : وفاقی کابینہ کا ایف بی آر کو 1087 گاڑیوں کی خریداری کی اجازت دینے کا انکشاف سامنے آیا، 1300سی سی گاڑیاں افسران کے دفتری استعمال میں ہوں گی۔

تفصیلات کے مطابق فیڈرل بورڈ آف ریونیو (ایف بی آر) کے پاس 1010 کے علاوہ مزید 77 نئی گاڑیوں کی خریداری کی منظوری موجود ہیں۔

وفاقی کابینہ کی جانب سے ایف بی آر کو 1087 گاڑیوں کی خریداری کی اجازت دینے کا انکشاف ہوا ، جس کے بعد گاڑیوں کی خریداری کے معاملے پر اعلیٰ ٹیکس حکام کا اے آر وائی نیوز سے رابطہ ہوا۔

دستاویز میں بتایا گیا کہ پہلے مرحلے میں ایف بی آر نے 1010 نئی گاڑیوں کی خریداری کاعمل شروع کیا جبکہ ایف بی آر کے پاس مزید 77 گاڑیوں کی خریداری کی منظوری موجود ہے۔

دستاویز میں کہنا تھا کہ کابینہ نے ایف بی آر کو آپریشنل مقاصد کیلئے 1300 سی سی تک گاڑیاں خریدنے کی اجازت دی ، ایف بی آر کو نئی گاڑیوں کی خریداری کیلئے ای سی سی اور کفایت شعاری کمیٹی سمیت کابینہ ڈویژن کی وہیکل اتھارٹائزیشن کمیٹی کی منظوری حاصل ہیں۔

ذرائع کا کہنا تھا کہ ایف بی آر کی 1010گاڑیاں افسران کے ذاتی استعمال کے لیے نہیں ہیں، گاڑیاں متعلقہ ڈائریکٹ کےزیراستعمال ہوں گی اور گاڑیوں کےدروازوں پرایف بی آرکالوگوہوگا ساتھ ہی گاڑیوں میں ٹریکرہوگاتاکہ غلط استعمال نہ ہوسکے۔

ذرائع نے کہا ایف بی آر کے 360 افسران 78 شوگر ملز کی مانیٹرنگ پرمامورہیں جواپنی گاڑی میں شوگرملزجاتے ہیں اور شوگر ملز دور درازعلاقوں میں ہونے کی وجہ سے ٹیکس افسران مشکلات سے دو چار ہیں۔

ٹیکس حکام نے بتایا کہ کئی شوگرملزکی انتظامیہ ٹیکس کی بےبسی دیکھ کرانہیں گاڑی کی پیشکش کرتےہیں، ٹیکس فراڈ پکڑنے کے لیے ٹیکس افسران کی باوقار سرکاری سواری لازمی ضرورت ہے۔

حکام کا کہنا تھا کہ گزشتہ مالی پنجاب ریونیواتھارٹی کا ٹیکس ہدف240ارب،ایف بی آرکا9430ارب روپے تھا، پنجاب ریونیواتھارٹی کے پاس ایف بی آر سے 20 گنا زیادہ ورک فورس ہے۔

اسلام آباد : چیئرمین سینیٹ کمیٹی برائے خزانہ سلیم مانڈوی والا نے وزارت خزانہ سے ایف بی آر افسران کیلئے 1010 گاڑیوں کی خریداری فوری روکنے کا مطالبہ کردیا۔

تفصیلات کے مطابق چیئرمین سینیٹ کمیٹی برائے خزانہ سلیم مانڈوی والا نے وزیر خزانہ محمد اورنگزیب کو خط لکھا۔

جس میں سینیٹ خزانہ کمیٹی کی جانب سے ایف بی آر افسران کیلئے گاڑیاں خریدنے پر تشویش کا اظہار کیا گیا ہے۔

خط میں مطالبہ کیا گیا ہے کہ افسران کیلئے 1010 گاڑیوں کی خریداری کو فوری روکا جائے، گاڑیوں کی خریداری کیلئے اپنائے گئے طریقہ کار پرکمیٹی کے اعتراضات ہیں۔

خط کے متن میں کہا گیا کہ گاڑیوں کی خریداری کیلئے اپنائے گئے طریقہ کار کیلئے شفافیت کو مدنظرنہیں رکھاگیا اور بڈنگ پراسس میں باقی کمپنیوں کو شمولیت ملنی چاہئیے۔

سلیم مانڈوی والا کا کہنا تھا کہ اس پروکیورمنٹ پراسس کو فوری روکنے کیلئے وزیرخزانہ کردار اداکریں، اے جی پی آر کو جاری پرچیز آڈر کینسل کر دیا جائے اور ادائیگی نہ کی جائے۔

انھوں نے کہا کہ وزارت خزانہ فیڈرل بورڈ آف ریونیو کو گاڑیوں کی خریداری روکنے کیلئے ہدایات دے، مالیاتی صورتحال اور شفافیت کو برقرار نہ رکھنا بددیانتی ہوگی۔