اسلام آباد : فیڈرل بورڈ آف ریونیو (ایف بی آر) نے انکم ٹیکس گوشوارے جمع کرانے کی تاریخ میں ایک ماہ کی توسیع کردی، جس کے بعد انکم ٹیکس گوشوارے اکتیس اکتوبر تک جمع کرائے جا سکتے ہیں۔
تفصیلات کے مطابق فیڈرل بورڈ آف ریونیو (ایف بی آر) سے انکم ٹیکس گوشوارے جمع نہ کرانے والوں کےلیے بڑا ریلیف آگیا، انکم ٹیکس گوشوارے جمع کرانے کی تاریخ میں ایک ماہ کی توسیع کردی گئی۔
اس حوالے سے نوٹی فیکشن بھی جاری کردیا گیا ، جس میں کہا ہے کہ انکم ٹیکس گوشوارے اکتیس اکتوبر تک جمع کرائے جا سکتے ہیں، توسیع کا فیصلہ ٹیکس باراورتاجرتنظیموں کی درخواست پر کیا گیا۔
یاد رہے فیڈرل بورڈآف ریونیو نے اہم کامیابی حاصل کرتے ہوئے رواں مالی سال کے پہلے تین ماہ میں ہدف سے بھی زیادہ ٹیکس اکٹھاکرلیا، جولائی تاستمبر مقررہ ٹیکس ہدف سے چونسٹھ ارب روپے اضافی جمع کیے گئے۔
ترجمان ایف بی آر نے بتایا تین ماہ میں ایک ہزار نو سو ستتر ارب روپے کا ٹیکس ہدف تھا اور دو ہزار اکتالیس ارب روپے کا ٹیکس جمع ہوا ، صرف ستمبرمیں آٹھ سو چوراسی ارب روپے ٹیکس جمع ہوا جبکہ ستمبر دو ہزار تئیس میں ٹیکس ہدف سات سو ننانوے ارب روپے تھا، اب تک اٹھارہ لاکھ نوے ہزار انکم ٹیکس گوشوارے جمع ہو چکے ہیں۔۔
