پاک فوج اور ایف سی نے لوئر کرم بگن اور گرد نواح کا کنٹرول سنبھال لیا ہے علاقہ میں کرفیو کا سماں ہے کسی کو باہر جانے کی اجازت نہیں دی جارہی ہے۔
تفصیلات کے مطابق لوئر کرم کے علاقہ بگن بازار اور گردونواح میں پاک فوج اور ایف سی اہلکاروں نے کنٹرول سنبھال لیا ہے، کسی کو بھی باہر جانے کی اجازت نہیں دی جارہی ہے اور کرفیو نافذ ہے۔
دوسری طرف علاقہ میں فوج نے فریقین کے مورچوں سے مسلح افراد کو ہٹا کر اپنے قبضہ میں لے لئے ہیں، وتیزی قبیلے کا کہنا ہے کہ وہ کسی صورت میں بھی بگن اور گردونواح میں آپریشن نہیں ہونے دیں گے اور نہ نقل مکانی کریں گے۔
واضح رہے کہ اس سلسے میں گزشتہ روز 6 قبائل کے لوگوں کا صدہ شہر میں احتجاجی مظاہرہ بھی ہوا تھا، مظاہرہ کے دوران مقررین نے مطالبہ کیا تھا کہ حکومت کو یکطرفہ آپریشن کی اجازت نہیں دی جائیگی۔
بگن چار خیل کے علاقے میں 21 نومبر کو مسافروں کے قافلے پر فائرنگ میں 50 افراد جاں بحق ہوگئے تھے، جس کے بعد کرم ایجنسی کے علاقے اپر کرم، بگن اور پارا چنار میں حالات کشیدہ ہوگئے تھے، اس دوران فریقین کے مابین مسلح تصادم میں کئی درجن افراد جاں بحق ہوئے۔
اسلام آباد: وفاقی کابینہ نے چینی باشندوں اور بجلی گھروں کی سیکیورٹی کے لیے ایف سی تعیناتی کی منظوری دے دی۔
تفصیلات کے مطابق ذرائع نے کہا ہے کہ وفاقی کابینہ نے آزاد کشمیر میں امن و امان کی صورت حال کے لیے ایف سی تعینات کرنے کی منظوری دی ہے۔
چینی باشندوں اور بجلی گھروں کی فول پروف سیکیورٹی یقینی بنانے کے لیے تعیناتی ہوگی، وفاقی کابینہ نے سرکولیشن سمری پر ایف سی تعینات کرنے کی منظوری دی، یہ درخواست آزاد کشمیر حکومت نے پولیس کی معاونت کے لیے کی تھی۔
ذرائع کا کہنا ہے کہ آزاد کشمیر حکومت نے امن و امان کی صورت حال برقرار رکھنے کے لیے ایف سی کی خدمات مانگی تھیں، منظوری کے بعد اب نیلم جہلم، منگلا اور گل پور پاور ہاؤسز کی فول پروف سیکیورٹی کے لیے ایف سی تعینات ہوگی۔
ذرائع کے مطابق آزاد کشمیر میں فرنٹیئر کانسٹیبلری کے 6 پلاٹونز تعینات کیے جائیں گے، اور ایف سی کی تعیناتی ابتدائی طور پر 3 ماہ کے لیے ہوگی۔
کراچی: دریائے سندھ پر بننے والے گھوٹکی، کندھ کوٹ پل کی سیکیورٹی ایف سی کے حوالے کر دی گئی۔
تفصیلات کے مطابق سیکریٹری محکمہ داخلہ کی صدارت میں منعقدہ اجلاس میں گھوٹکی کندھ کوٹ پل کی سیکیورٹی فرنٹیئر کانسٹیبلری کے حوالے کرنے کا فیصلہ کر لیا گیا۔
بریفنگ میں بتایا گیا کہ گھوٹکی، کندھ کوٹ پل کی لمبائی 12 کلو میٹر ہے، اور ابھی 8 کلومیٹر کی تعمیر باقی ہے، کچے کی صورت حال کے پیش نظر پولیس اور رینجرز کے ساتھ ایف سی کی تعیناتی بھی ناگزیر ہے۔
بتایا گیا کہ پل پر کام کرنے والے 3 مزدوروں کو ڈاکوؤں نے اغوا کر لیا تھا، جس پر پراجیکٹ ڈائریکٹر نے سیکیورٹی کے بغیر کام کرنے سے انکار کر دیا تھا، اجلاس میں پل کی سیکیورٹی کے لیے ایف سی اہلکاروں کو تعینات کرنے کی ہدایت جاری کی گئی۔
کوئٹہ: وزیراعلیٰ بلوچستان عبدالقدوس بزنجو نے کہا ہے کہ یہ وردی اپنی جانوں کا نذرانہ پیش کررہی ہے، بریگیڈیئر، کرنل اور میجد شہید ہورہے ہیں مگر پھر بھی اسی کے خلاف باتیں ہورہی ہیں۔
تفصیلات کے مطابق بلوچستان اسمبلی کے اجلاس میں عبدالقدوس بزنجو کا کہنا تھا کہ جتنی زبان ان کے پاس ہےاتنی ہمارےپاس بھی ہے، یہ کونساقانون ہےکہ لوگ یہاں بدمعاشیاں دکھارہےہیں، اسپیکر کو اس رویے پر سخت ایکشن لینا چاہیے کیونکہ ایوان کے تقدس کو پامال کیا گیا۔
انہوں نے دعا کی کہ اللہ کرنل سہیل کے درجات بلند کرے۔ اُن کا کہنا تھا کہ یہ وردی اپنی جانوں کا نذرانہ پیش کررہی ہے، دہشت گردی کے خلاف جاری جنگ میں بریگڈیئر، کرنل، میجر شہید ہورہے ہیں، ہر تکلیف میں ہمیں فوج یاد آتی ہے مگر پھر بھی اسی کے خلاف باتیں کرتے ہیں۔
وزیراعلیٰ بلوچستان کا کہنا تھا کہ بات کرنا بہت آسان اور جان دینا مشکل ہے، جب عوام دہشت گردی کا نشانہ بن رہے تھے تو یہ تنقیدی لوگ کہاں تھے؟ کرنل سہیل تین بچوں کا والد تھا اُس نے بلوچستان کی خاطر جان دی۔
عبدالقدوس بزنجو کا کہنا تھا کہ منظور پشتون پختونوں کا دوست نہیں بلکہ دشمن ہے، ہم ایسے لوگوں کے ساتھ نہیں بلکہ اپنی فوج، ایف سی، پولیس کے ساتھ ہیں کیونکہ انہوں نے ہمارے خاطر قربانیاں دیں، آج ہم اپنے گھروں میں سکون سے بیٹھے ہیں اور ہمارے سپاہی لڑ رہے ہیں۔
اُن کا کہنا تھا کہ 20 سال بعد قوم نے سکھ کا سانس لینا شروع کیا، ہمیں فوج کا احترام کرنا چاہیے کیونکہ یہ ہمارے بچے اور بھائی ہیں، زلزلہ متاثرین کی دیکھ بھال فوج کا کام نہیں تھا مگر 2013 میں ہمیں صرف فوج ہی نظر آئی۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
کوئٹہ : بلوچستان کے دارالحکومت کوئٹہ کے نواحی علاقے نوحصار میں خود کش بم دھماکے کے نتیجے میں 4 ایف سی اہلکار شہید اور 8 زخمی ہو گئے ہیں.
تفصیلات کے مطابق کوئٹہ کے نواحی علاقے نوحصار میں خود کش دھماکے میں 4 ایف سی اہلکار شہید ہو گئے ہیں جب کہ 8 افراد زخمی ہیں، ریسکیو ادارے کے مطابق شہید و زخمی ہونے والے افراد کو ایمبولینس کے ذریعے قریبی اسپتال منتقل کیا جارہا ہے جہاں زخمیوں کو طبی امداد دی جا رہی ہے، 2 زخمیوں کی حالت تشویشناک ہے۔
ذرائع کے مطابق دھماکا اس وقتے ہوا جب سیکیورٹی فورسز کے اہلکار سرچ آپریشن کر رہے تھے کہ اسی دوران ایف سی اور لیویز کے کیمپ کے قریب دھماکا ہو گیا دھماکے کے بعد لیویز اور ایف سی اہلکاروں نے علاقے کا محاصرہ کرلیا ہے جب کہ جائے وقوعہ سے شواہد اکٹھے کیے جا رہے ہیں۔
واضح رہے کہ بلوچستان میں ایف سی اور لیویوز کے اہلکار دہشت گردوں کی سرکوبی کے لیے جواں مردی کے ساتھ امن دشمنوں کو منہ توڑ جواب دے رہے ہیں اور اس عظیم مقصد کے حصول میں وطن عزیز پر جانوں کے نذرانے پیش کر رہے ہیں۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
اسلام آباد: آئی ایس پی آر کے مطابق ایف سی بلوچستان نے کارروائی کر کے دہشت گردی کا بڑا منصوبہ ناکام بنا دیا، کارروائی کےدوران بارودی مواد اور اسلحہ برآمد ہوا۔
ڈی جی آئی ایس پی آر کے مطابق یہ کارروائی زیرحراست ملزمان سے حاصل ہونے والی معلومات کی بنیاد پر کی گئی۔
واضح رہے کہ ملک بھرمیں آپریشن ردالفساد کامیابی سے جاری ہے، اسی کے تحت ایف سی بلوچستان نے مستونگ میں اہم کارروائی کی۔
ایف سی بلوچستان نے انٹیلی جنس بنیادوں پر آپریشن کارروائی کے دوران بارود اور اسلحہ برآمد کیا، اسلحے میں اسنائپر، رائفلز، دستی بم، دیسی ساختہ تیار بارودی سرنگیں شامل ہیں۔
تفصیلات کے مطابق برآمد اسلحہ غاروں میں چھپایا گیا تھا، کارروائی زیرحراست ملزمان سےحاصل ہونے والی معلومات پر کی گئی۔
آپریشن رد الفساد کے تحت جاری کارروائیوں میں ایف سی بلوچستان نے دہشت گردی کا بڑا منصوبہ ناکام بنا دیا۔ بارود اور اسلحہ برآمد کیا، جسے دہشت گردی کے بڑے واقعے میں استعمال کیے جانے کا اندیشہ تھا۔
واضح رہے کہ پاک فوج کے آپریشن خوش حال بلوچستان کے تحت بھی صوبے بھر میں کارروائیاں جاری ہیں، گذشتہ دنوں سیکیورٹی فورسز نے غیرقانونی طورپر مقیم افغان باشندوں سمیت متعدد مشتبہ افراد کو حراست میں لے لیا تھا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔
اسلام آباد : فیض آباد انٹرچینج پر دھرنے کے خلاف سیکورٹی فورسز کے آپریشن کے دوران مظاہرین سے جھڑپوں میں پولیس اہلکار سمیت 5 افراد جاں بحق اور 188 افراد زخمی ہوگئے جبکہ پولیس نے درجنوں مظاہرین کو گرفتار کرلیا۔
تفصیلات کے مطابق فیض آباد انٹرچینج پردھرنے کے شرکاء کو دی گئی ڈیڈ لائن ختم ہونے کے بعد گزشتہ صبح سیکورٹی اہلکاروں نے دھرنے کے شرکاء کو تین اطراف سے گھیر کر آپریشن کا آغاز کیا اور آنسو گیس کے شیل فائر کیے۔
مظاہرین کے خلاف مزید 6 مقدمات درج
فیض آباد آپریشن کے دوران مزاحمت پر مذہبی جماعت کے قائدین کے خلاف انسداد دہشت گردی سمیت دیگر سنگین دفعات کے تحت مزید 6 مقدمات درج کیے گئے۔
مقدمات تھانہ آئی نائن، تھانہ کھنہ، کورال، تھانہ آبپارہ میں درج کیے گئے جس کے بعد اسلام آباد کے تھانوں میں مجموعی طور پر درج ہونے والے مقدمات کی تعداد 26 تک پہنچ گئی۔
وفاقی دارالحکومت کی انتظامیہ کے مطابق اب تک 400 کے قریب مظاہرین کو گرفتار کیا جاچکا ہے۔
اسلام آباد میں فوج کی تعیناتی پروزارت داخلہ کو جوابی مراسلہ
ذرائع کے مطابق اسلام آباد میں فوج کی تعیناتی پر وزارت داخلہ کوجوابی مراسلہ میں کہا گیا ہے کہ فوج کی طلبی کے لیے چند امورکا واضح ہونا ضروری ہے۔
ذرائع کا کہنا ہے کہ جوابی مراسلے میں کہا گیا ہے کہ عدالت کی آتشی اسلحےکےاستعمال سےگریزکی ہدایت ہے، فوج ہنگامہ ختم کرنے کے لیے استعمال کی جاتی ہے۔
وزارت داخلہ کو جوابی مراسلے میں کہا گیا ہے کہ فوج ہنگامہ ختم کرنے کے لیے استعمال کی جاتی ہے، فوج محض مظاہرین منتشر کرنےکے لیے استعمال نہیں کی جاتی۔
مراسلے میں مزید کہا گیا ہے کہ فیض آباد میں تعینات رینجرزکوتحریری احکامات نہیں دیے گئے، مظاہرین سے نمٹنے کے لیے پولیس کوپوری صلاحیت سے استعمال نہیں کیا گیا۔
دھرنے میں جاں بحق افراد کی نماز جنازہ ادا
فیض آباد دھرنے میں جاں بحق 4 افراد محمد عدیل، حافظ عاشر، محمد عرفان، محمد جنید کی نمازجنازہ ادا کردی گئی، نمازجنازہ کے بعد میتیں آبائی علاقوں کو روانہ کردی گئیں۔
مجموعی طور پر 188 زخمی، پولیس اہلکار سمیت 5 افراد جاں بحق، پولیس موبائل اور میڈیا ڈی ایس این جی سمیت 14 گاڑیاں نذر آتش کی گئیں۔
کارکنان کی ہلاکت پر شٹر ڈاؤن ہڑتال اور تین روزہ سوگ کا اعلان
تحریک لبیک پاکستان اور پاکستان سنی تحریک نے کارکنان کی ہلاکت پر 3 روزہ سوگ کا اعلان کردیا۔
تحریک لبیک پاکستان کے ترجمان اشرف آصف جلالی کا کہنا ہے کہ ’کارکنوں کا رسمِ قل کل مال روڈ پر ادا کیا جائے گا جبکہ ملک بھر میں پیر کے روز پہیہ جام ہڑتال رہے گی‘۔
اُن کا کہنا تھا کہ پیمرا کی جانب سے چینلز کی بندش کی مذمت کرتے ہیں، کارکنان کی ہلاکت کا مقدمہ درج کروائیں گے، زاہد حامد کے علاوہ رانا ثناء اللہ کا معاملہ بھی بڑا مسئلہ ہے۔
دوسری جانب سنی تحریک کے سربراہ ثروت قادری نے بھی ملک گیر شٹر ڈاؤن ہڑتال کا اعلان کرتے ہوئے کہا کہ ’حکومت نے ایک وزیر کی خاطر کئی قیمتیں جانیں ضائع کیں، ختم نبوت کے لیے دھرنا دینے والوں کے خلاف آپریشن بدترین ظلم ہے، شہیدوں کا خون رائیگاں نہیں جانے دیں گے اور حکومت کے خاتمے تک سڑکوں پر رہیں گے۔
جنازوں کی تدفین کے بعد مذاکرات ہوں گے، خادم رضوی
تحریک لبیک پاکستان کے سربراہ خادم حسین رضوی نے ایک بار پھر فیض آباد کے مقام پر جمع ہونے والے شرکاء سے خطاب کرتے ہوئے کہا کہ ’اب پوری کابینہ کے استعفے کا مطالبہ کرتے ہیں، حکومت سے مذاکرات اب شہدا کی تدفین کے بعد ہوں گے‘۔
اُن کا کہنا تھا کہ ‘ہماری طرف سے کوئی پیر یا عالم مذاکرات کی پیش کش نہ کرے بلکہ ہماری اپنی ہی کمیٹی مذاکرات کا فیصلہ کرے گی، دھرنے کے نقصان کا جواب لیں گے‘۔
وفاقی حکومت نے گزشتہ رات آرٹیکل 245 کے تحت اسلام آباد کی صورتحال کو کنٹرول کرنے کے لیے فوج کو غیر معینہ مدت کے لیے طلب کرتے ہوئے نوٹی فکیشن جاری کردیا۔
اسلام آباد میں فوج کی طلبی آئین کے آرٹیکل 245، انسداد دہشت گردی ایکٹ کے سیکشنز5-4 اور تعزیرات پاکستان کے سیکشن 131 اے کے تحت کی گئی۔
وقت 7:45 منٹ پر مظاہرین ایک بار پر فیض آباد پر جمع ہونا شروع ہوئے جس کے بعد دھرنا قائدین کنٹرینر سے نکل کر ایک بار پھر نشستوں پر بیٹھ گئے، دھرنے والوں کی جانب سے مطالبات میں اضافہ بھی ہوگیا۔
مرکزی اسٹیج سے اعلانات کیے گئے کہ اب صرف وفاقی وزیرقانون کے استعفے پر اکتفا نہیں ہوگا بلکہ پوری کابینہ کے مستعفیٰ ہونے کے بعد دھرنا ختم کیا جائے گا۔
ترجمان پمز اسپتال کا کہنا ہے کہ مجموعی طور پر 178 زخمی لائے گئے جن میں 69 پولیس اہلکار، 57 ایف سی اور 52 شہری شامل ہیں۔ نمائندہ اے آر وائی عاصم علی رانا کے مطابق اب تک 4 افراد جاں بحق ہوئے جن میں ایک پولیس اہلکار بھی شامل ہے۔
فیض آباد میں مشتعل مظاہرین نے دکانوں کو آگ لگانے کی کوشش کی جس پر پولیس نے انہیں روکنے کے لیے شدید شیلنگ کی، اطلاعات کے مطابق تازہ پولیس کی کارروائی کے نتیجے میں 5 افراد زخمی جبکہ 1 شخص جاں بحق ہوگیا۔
روالپنڈی کے علاقے پنڈی بھٹیاں میں پرتشدد مظاہروں کے دوران 3 افراد جاں بحق ہوئے جبکہ چوہدری نثار کے گھر سے ہونے والی فائرنگ کے نتیجے میں 1 شخص جاں بحق ہوا۔
پولیس اور ایف سی کی جانب سے شدید شیلنگ اور ہوا کا رخ پولیس کی جانب ہونے کے باعث سیکورٹی اہلکاروں کو پیچھے ہٹنا پڑا، دھرنے کے شرکاء کے پاس شیلنگ سے پچنے کے لیے ماسک اور پتھراؤ کے لیے غلیل موجود تھے۔
وزیراعظم شاہدخاقان عباسی کوآرمی چیف کاٹیلیفون
آرمی چیف جنرل قمرجاوید باجوہ نے وزیراعظم شاہد خاقان عباسی کو ٹیلیفون کیا اور وزیراعظم کو دھرنے کو پرامن طریقے سے حل کرنے کا مشوردہ دیا۔
پاک فوج کے سربراہ جنرل قمرجاوید باجوہ نے کہا کہ دونوں جانب سےتشدد ملکی مفاد میں نہیں ہے۔
فیض آباد پرقیدیوں کو لےجانے والی پولیس وین کوآگ لگا دی گئی ہے اور مظاہرین کی جانب سے ہنگامہ آرائی کا سلسلہ جاری ہے۔
آپریشن کا فیصلہ عدالتی حکم پر کیا، احسن اقبال
وفاقی وزیر داخلہ احسن اقبال کا کہنا ہے کہ ‘عدالتی احکامات کی روشنی میں آپریشن کا فیصلہ کیا، عدالت عالیہ کے احکامات کی بجا آوری سے انکار نہیں کرسکتے تھے، اسلام آباد ہائی کورٹ نے 3 دن میں فیض آباد خالی کروانے کا حکم دیا تھا‘۔
اُن کا کہنا تھا کہ ’دھرنے کا مقام جلد خالی کرالیا جائے، انتظامیہ محتاط انداز میں مظاہرین سے نمٹ رہی ہے اور کوشش ہے کہ کسی کے جان و مال کا نقصان نہ ہو‘۔
وفاقی وزیر داخلہ کا کہنا تھا کہ ملک میں بدامنی پھیلانے کی کوشش کی جارہی ہے تاہم حکومت اس کی کسی صورت اجازت نہیں دے گی‘۔
آپریشن کی ناکامی کے بعد اجلاس طلب
آپریشن میں ناکامی کے بعد انتظامیہ نے اعلیٰ سطح کا اجلاس طلب کیا جس میں ڈی جی رینجرز پنجاب، چیف کمشنر، رینجرز کے سیکٹر کمانڈر سمیت پولیس افسران نے شرکت کی۔
ذرائع کے مطابق اجلاس میں آپریشن سے متعلق نئی حکمتِ عملی پر غور کیا جارہا ہے۔
پنجاب میں ایمرجنسی نافذ
چیف ایگزیکٹو آفیسر نے محکمہ صحت پنجاب نے صوبے بھر میں ایمرجنسی نافذ کرتے ہوئے تمام دفاتر کو کل کھلے رہنے اور عملے کی یقینی بنانے کی ہدایت کی۔
موبائل فون سروس بند کرنے کی سمری وزیراعظم کو ارسال
ذرائع کا کہنا ہے کہ حکومت ملک بھر میں موبائل فون سروس بند کرنے کے لیے سمری وزیراعظم کو ارسال کردی، سمری کی منظوری کے بعد موبائل فون سروس کچھ دیر بعد بند کردی جائے گی۔
حکومت نے ٹیلی ویژن نشریات اور انٹرنیٹ سروس معطل کردی
زاہد حامد کا وزیراعظم سے رابطہ
ذرائع کے مطابق وفاقی وزیر قانون زاہد حامد نے شاہد خاقان عباسی سے رابطہ کیا اور استعفیٰ دینے کی پیش کش کی۔
چوہدری نثار کے گھر پر مظاہرین کا پتھراؤ
سابق وزیرداخلہ اور مسلم لیگ ن کے رہنما چوہدری نثار علی خان کے گھر پر اور وہاں موجود پولیس کی گاڑیوں پر مظاہرین کی جانب سے پتھراؤ کیا، سابق وفاقی وزیر داخلہ کے گھر سے فائرنگ کے نتیجے میں 1 نوجوان جاں بحق اور ایک زخمی ہوا۔
مشتعل مظاہرین نے چوہدری نثارکےگھرمیں داخل،توڑپھوڑ بھی کی۔
رکن قومی اسمبلی جاوید لطیف اور ساتھیوں پر مظاہرین کا حملہ
مسلم لیگ ن کے رکن قومی اسمبلی میاں جاوید لطیف جب مظاہرین سے مذاکرات کے لیے پہنچے تو مشتعل افراد نے اُن پر پتھراؤ کیا جس کے نتیجے میں وہ خود اور ساتھی زخمی ہوگئے۔
وفاقی وزیر قانون زاہد حامد کے آبائی گھر پر حملہ
سیالکوٹ میں مشتعل مظاہرین نے وفاقی وزیر قانون زاہد حامد کے گھر پر دھاوا بولا اور دیواریں کود کر گھر میں داخل ہوئے، مشتعل مظاہرین نے گھر میں توڑ پھوٹ بھی کی۔
مظاہرین نے نجی نشریاتی ادارے کی گاڑی کو آگ لگادی
انتظامیہ نے فوج کو طلب کرنے کے لیےسمری تیار کرلی
ذرائع کے مطابق حکومت نے دھرنا مظاہرین سے نمٹنےکے لیے فوج کوطلب کرنےکے لیے سمری تیار کرلی، فوج کواہم علاقوں میں تعینات کرنےکے لیے بلایا جاسکتا ہے جبکہ دھرنامظاہرین کےخلاف آپریشن سول ایڈمنسٹریشن کے کنٹرول میں ہے۔
وزیر اعظم کی ہدایت پر پاکستان الیکٹرونک میڈیا ریگولیٹری اتھارٹی (پیمرا) نے تمام نیوز چینلز آف ایئر کرنے کی ہدایت کردی۔
اسلام آباد میں سرکاری ٹیلی ویژن کے علاوہ تمام چینلز بند کردیے گئے ہیں جبکہ سرکاری ٹی وی کی نشریات بدستور جاری ہیں۔
فیض آباد دھرنے کے آپریشن کے دوران زخمی ہونے والے افراد کی تعداد 140 ہوگئی ہے جن میں سے55 پولیس اہلکار، 35 ایف سی اہلکار جبکہ 50 مظاہرین شامل ہیں۔
زخمیوں میں اسسٹنٹ کمشنرعبدالہادی، ڈی سی پی عارف شاہ ، ایس ایچ او، ایلیٹ فورس کے اہلکار سمیت میڈیا کے 2 نمائندے بھی شامل ہیں۔
ترجمان پمزڈاکٹرالطاف کا کہنا ہے کہ زخمیوں کو اسپتال منتقل کیا جا رہا ہےاور ایسا کوئی زخمی نہیں آیا جس کی حالت تشویش ناک ہو۔
خلاف فیصل آباد میں احتجاج
فیصل آباد میں فیض آباد آپریشن کے خلاف چشتیہ چوک اورسمندری میں مشتعل مظاہرین نے ہنگامہ آرائی کی ٹائرنذر آتش کر کےسرگودھا روڈ اور رجانہ روڈ بلاک کیا۔
لاہورمیں احتجاج
پنجاب کے دارالحکومت لاہور میں فیض آباد آپریشن کے خلاف مظاہرین نے امامیہ کالونی ریلوے پھاٹک بند کردی اورٹائرجلا کرلاہور، راولپنڈی جی ٹی روڈ بند کیا۔
مظاہرین نے شہرکے داخلی وخارجی راستوں پررکاوٹیں کھڑی کردیں جبکہ لاہور کے علاقے شاہدرہ میں مظاہرین اور پولیس میں جھڑپ کے نتیجے میں پولیس اہلکار سمیت 4 افراد زخمی ہوئے۔
بھارہ کہو میں مظاہرین کی توڑ پھوڑ
فیض آباد انٹرچینج پر دھرنے کے شرکا کے خلاف آپریشن کے آغاز سے اسلام آباد کے مضافاتی علاقے بھارہ کہو کے علاقے اٹھال چوک پر مظاہرین کی جانب سے تور پھوڑ کی گئی۔
ترامڑی اور چٹھہ بختاور میں بھی توڑ پھوڑ
اسلام آباد کے مضافات میں ترامڑی اور چھٹہ بختاور میں مسلح افراد نے شہریوں پر حملہ کیا اور تورپھوڑ کی۔
سیکورٹی اہلکاروں کی جانب سے شیلنگ کے بعد مظاہرین منتشرہوئے تاہم جیسے ہی جاں بحق ہونے والے افراد کی تعداد کا اعلان کیا گیا مظاہرین مشتعل ہوگئے اور انہوں نے فورسز پر حملے شروع کیے۔
خیال رہے کہ گزشتہ روز اسلام آباد ہائی کورٹ نے فیض آباد دھرنے کو ختم کرانے کے عدالتی احکامات پرعمل درآمد نہ کرنے پر وفاقی وزیرداخلہ احسن اقبال کو توہین عدالت کا شوکاز نوٹس جاری کیا تھا۔
سیف سٹی کے کیمروں کی کیبل کاٹ دی گئی
یاد رہے کہ گزشتہ رات فیض آباد انٹرچینج کی نگرانی کرنے والے کرنے والے سیف سٹی کے کیمروں کی کیبل کاٹ دی گئی تھی، وفاقی وزیرداخلہ احسن اقبال نے چیف کمشنر کو اس کی تحقیقات کا حکم دیا تھا۔
مظاہرین اور حکومت کے مذاکرات ناکام
واضح رہے کہ اسلام آباد اور روالپنڈی کو ملانے والے فیض آباد انٹرچینج پر مذہبی جمات کے دھرنے کو آج 20 روز ہوگئے تھے جسے ختم کرانے کے لیے حکومت کی جانب سے مذاکرات کی تمام کوششیں بے سود ثابت ہوئیں۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
کوئٹہ: ایف سی کے سیکٹر کمانڈر تصور ستار کا کہنا ہے کہ کوئٹہ کے علاقے پشتون آباد میں آپریشن شروع کر رہے ہیں۔ آپریشن سے پہلے عمائدین کو اعتماد میں لے لیا ہے۔
تفصیلات کے مطابق ایف سی کے سیکٹر کمانڈر تصور ستار اور ڈی آئی جی کوئٹہ عبد الرزاق چیمہ نے مشترکہ پریس بریفنگ دی۔
اس موقع پر سیکٹر کمانڈر تصور ستار نے بتایا کہ کوئٹہ کے علاقے پشتون آباد میں آپریشن شروع کر رہے ہیں۔ علاقے کو 4 حصوں میں تقسیم کیا ہے۔ آپریشن کے لیے تمام ٹیموں میں خواتین اہلکار شامل ہیں۔
سیکٹر کمانڈر کا کہنا تھا کہ آپریشن سے پہلے عمائدین کو اعتماد میں لے لیا ہے۔ آپریشن کے لیے ڈاکٹرز اور دیگر عملے کو اسٹینڈ بائی رکھا ہے۔ آپریشن کے دوران ہر گھر پر 6 فراد پر مشتمل ٹیم جائے گی۔
ان کے مطابق پولیس کے 270 جبکہ ایف سی کے 791اہلکار آپریشن میں حصہ لیں گے۔ سرچ آپریشن میں ریسکیو اور فائر بریگیڈ اہلکار بھی شامل ہیں۔
سیکٹر کمانڈر نے بتایا کہ انٹیلی جنس اداروں سے رابطے کے بعد سرچ آپریشن کیا جا رہا ہے۔ پشتون آباد میں 3 ہزار گھروں کے کوائف چیک کیے جائیں گے جبکہ سرچ آپریشن کے دوران مکینوں کو تحائف بھی دیں گے۔
علاقہ مکینوں کے تعاون سے دہشت گردوں کا خاتمہ
اس موقع پر ڈی آئی جی کوئٹہ عبد الرزاق چیمہ نے بتایا کہ سرچ آپریشن ممکنہ دہشت گردوں کی موجودگی کی اطلاع پر کیا جا رہا ہے۔
انہوں نے کہا کہ سرچ آپریشن کا مقصد علاقے کو دہشت گردوں سے پاک کرنا اور مکینوں کو دہشت گردی کے خلاف اعتماد میں لینا ہے۔ ’علاقہ مکینوں کے تعاون سے دہشت گردوں کا خاتمہ چاہتے ہیں۔
ڈی آئی جی کا کہنا تھا کہ کام کے دوران ہم پر حملے بھی ہوں گے، شہید بھی ہوں گے، پولیس پر حالیہ حملے سنگین نوعیت کے ہیں۔ سرچ آپریشن کے لیے ایف سی سے تعاون لے رہے ہیں۔
ڈی آئی جی نے مزید بتایا کہ پشتون آباد سرچ آپریشن کے بعد میڈیا بریفنگ دی جائے گی۔ آپریشن کے دوران داخلی و خارجی راستے بند ہوں گے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
کوئٹہ: صوبہ بلوچستان میں چمن شاہراہ پر 2 آئل ٹینکر الٹ گئے جس کے نتیجے میں 45 ہزار لیٹر تیل بہہ گیا۔
تفصیلات کے مطابق کوئٹہ چمن شاہراہ پر تیزرفتاری کے باعث 2 آئل ٹینکر الٹ گئے، حادثے کے نتیجے میں 45 ہزار لیٹر تیل بہہ گیا،ایف سی نے علاقے کو گھیرے میں لے کرامدادی کارروائیاں شروع کر دیں۔
لیویز ذرائع کا کہنا ہے کہ حادثے میں دوسرے آئل ٹینکر کا ڈرائیور زخمی ہوگئے۔
خیال رہے کہ گزشتہ ماہ 17 ستمبر کو صوبہ پنجاب کے شہر مظفرگڑھ کی تحصیل کوٹ ادو میں آئل ٹینکر میں لگنے والی آگ کے نتیجے میں 4 افراد جان کی بازی ہارگئے جبکہ متعدد زخمی ہوگئے تھے۔
واضح رہے کہ رواں سال 29 رمضان کو احمد پورشرقیہ کے قریب ایک افسوسناک واقعہ میں تیز رفتار آئل ٹینکر اچانک بے قابو ہوکر الٹ گیا تھا، حادثے میں 214 افراد جاں بحق جبکہ 60 افراد زخمی ہوگئے تھے۔
اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔
پنجگور: بلوچستان کے ضلع پنجگور میں ایف سی کے قافلے پردہشت گردوں کے حملے میں کرنل سمیت 3 شہید اہلکاروں کی نماز جنازہ ادا کردی گئی۔
تفصیلات کے مطابق بلوچستان کے ضلع پنجگور میں گزشتہ شب فرنٹیئر کور کے قافلے پر دہشت گردوں کے حملے میں کرنل سمیت 3 شہید اہلکاروں کی نمازجنازہ ادا کردی گئی۔
آئی جی ایف سی سمیت دیگرحکام نے شہید ایف سی اہلکاروں کی نمازجنازہ میں شرکت کی۔ شہید اہلکاروں کے جسد خاکی آبائی علاقوں کوروانہ کردیے گئے۔
یاد رہے کہ گزشتہ روز بلوچستان کے ضلع پنجگور میں ایف سی کے قافلے پر حملے میں کرنل سمیت 3 اہلکار شہید جبکہ 3 زخمی ہوگئے تھے۔
وزیراعظم شاہد خاقان عباسی نے سیکورٹی اہلکاروں کی شہادت پر اپنے گہرے دکھ اور افسوس کا اظہار کیا تھا، وزیراعظم نے بزدلانہ حملے کی شدید مذمت کرتے ہوئے زخمیوں کے بہترین علاج کی ہدایت کی تھی۔
واضح رہے کہ گزشتہ ماہ 24 اگست کو دہشت گردوں نے ضلع کیچ میں ایف سی کے قافلے پر حملہ کیا تھا جس کے نتیجے میں 2 اہلکار شہید ہوگئے تھے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
