اسلام آباد : اسلام آباد پولیس نے جیو فینسنگ کے ذریعے ایف نائن پارک کیس کے ملزمان کا سراغ لگا لیا۔
تفصیلات کے مطابق اسلام آباد کے ایف نائن پارک میں گن پوائنٹ پر خاتون سے اجتماعی زیادتی کیس میں اہم پیش رفت سامنے آئی۔
اسلام آباد پولیس کے ترجمان نے بتایا کہ ایف نائن پارک زیادتی کیس میں ملوث ملزمان کا سراغ لگا لیا گیا، ملزمان کو جیو فینسنگ سے تلاش کیا گیا۔
ترجمان کا کہنا تھا کہ حساس معاملہ ہے اس لئے قیاس آرائیوں سے گریز کریں۔
یاد رہے اسلام آباد کے ایف 9 پارک میں لڑکی کو مبینہ طور پر اجتماعی زیادتی کا نشانہ بنایا گیا تھا، متاثرہ لڑکی نے پولیس کو دیئے گئے بیان میں بتایا تھا کہ دوست کے ساتھ پارک آئی تھی دو افراد نے گن پوائنٹ پر روکا اور مجھے جنگل میں لے جاکر زیادتی کا نشانہ بنایا ۔
متاثرہ لڑکی کا کہنا تھا کہ درندہ صفت ملزمان نے دھمکی دی کہ اگر کسی کو بھی اس بارے میں بتایا تو تمہیں جان سے مار دیں گے، میں نے اُن سے ہاتھ جوڑ کر زیادتی نہ کرنے التجا کی تو انہوں نے تشدد کا نشانہ بنایا اور ٹانگ پر پستول کا بٹ مارا۔
بعد ازاں لڑکی کا پمز اسپتال میں طبی معائنہ ہوا جس کی میڈیکل رپورٹ میں جسم پر تشدد کے نشانات پائے گئے تھے، جس کے بعد متاثرہ لڑکی کی مدد سے ایک ملزم کا خاکہ تیار کیا گیا تھا۔
