اسلام آباد : وزیر اطلاعات عطاتارڑ نے لائن آف کنٹرول کے دورے کے موقع پر بین الاقوامی و مقامی میڈیا کے سامنے زمینی حقائق پیش کردیے۔
تفصیلات کے مطابق وزیر اطلاعات عطاتارڑ نے بین الاقوامی و مقامی میڈیا کے ہمراہ لائن آف کنٹرول کا دورہ کیا، وزارت اطلاعات نےمقامی اور عالمی میڈیا کے نمائندگان کے دورہ میں سہولت فراہم کی، دورے کا مقصد بھارت کی جانب سے پھیلائےگئےبے بنیاد پروپیگنڈےکوبےنقاب کرنا تھا۔
اس موقع پر بھارتی پروپیگنڈے کو بے نقاب کرنے کے لئے زمینی حقائق میڈیا کے سامنے پیش کئے گئے ، میڈیا نمائندوں کو ان مقامات پر لے جایا گیا، جنہیں بھارت نے مبینہ دہشتگردی کے ٹھکانے قرار دیا تھا۔
زمینی حقائق، مقامی آبادی کی گواہی اور حالات کا خود مشاہدہ کر کے میڈیا نے بھارتی دعوؤں کی حقیقت جاننے کا موقع حاصل کیا۔
وزیر اطلاعات عطا تارڑ نے کہا کہ بھارت کی جانب سے بارہا پاکستان کے خلاف بے بنیاد الزامات لگائے گئے، آج ہم نے عالمی اور ملکی میڈیا کے سامنے تمام حقائق رکھ دیئے ہیں، جو مقامات بھارت خیالی دہشت گرد کیمپس قرار دیتا رہا ہے وہ عام شہری آبادی کے علاقے ہیں۔
ان کا کہنا تھا کہ پاکستان ایک ذمہ دار ریاست ہےجونہ صرف علاقائی اور عالمی امن کیلئےبھی پرعزم ہے، پاکستان دنیا کے کسی بھی حصے میں دہشت گردی یا دہشت گردانہ سرگرمیوں کی مذمت کرتا ہے، ہم نے اپنے عمل سے بارہا ثابت کیا ہے کہ ہم امن کے داعی ہیں اور اپنی خودمختاری کے دفاع کے لئے ہم ہر حد تک جائیں گے۔
وفاقی وزیر نے مزید کہا کہ بھارت کوپہلے اپنے زیر قبضہ کشمیر میں انسانی حقوق کی خلاف ورزیوں کا نوٹس لینا چاہئے، بھارت اپنی داخلی ناکامیوں کوچھپانے کے لئے لائن آف کنٹرول پر پروپیگنڈا کرتا ہے، آج عالمی میڈیا نے خود اپنی آنکھوں سے اصل حقیقت دیکھ لی ہے، پاکستان علاقائی امن کےلئے پرعزم ہے تاہم کسی بھی بھارتی جارحیت کا فوری اور منہ توڑ جواب دیا جائے گا۔
