ARYNews.tv | Urdu – Har Lamha Bakhabar

Tag: ایل او سی

  • سرجیکل اسٹرائیک کے جھوٹے دعوے کے بعد بھارتی جنگی جنون عروج پر

    سرجیکل اسٹرائیک کے جھوٹے دعوے کے بعد بھارتی جنگی جنون عروج پر

    راولپنڈی: لائن آف کنڑول پر بھارتی اشتعال انگیزیوں کا سلسلہ جاری ہے۔ آج صبح بھارتی فوج نے وادی نیلم میں مسافر کوچ پر راکٹ فائر کیا جس کے باعث چار افراد جاں بحق اور سات زخمی ہوگئے۔

    دفتر خارجہ کا کہنا ہے کہ گزشتہ ڈھائی برسوں میں بھارت نے 600 سے زائد مرتبہ ایل او سی اور ورکنگ باؤنڈری کی خلاف ورزی کی جن میں ساٹھ سےزائد پاکستانی شہید ہوئے۔

    سنہ 2014 میں بھارت نے ایل او سی اور ورکنگ باؤنڈری کی 315 مرتبہ خلاف ورزی کی جس میں 18 شہری شہید اور 74 زخمی ہوئے۔

    سنہ 2015 میں بھارتی فوج نے ایل او سی اور ورکنگ باؤنڈری پر سیز فائر کی 248 خلاف ورزیاں کیں جن میں 39 شہری شہید اور ڈیڑھ سو زخمی ہوئے۔

    رواں سال 29 ستمبر کو سرجیکل اسٹرائیک کے جھوٹے دعوے کا بھانڈا پھوٹنے کے بعد بھارت نے سیز فائر معاہدے کی خلاف ورزی کو معمول بنالیا۔ دفتر خارجہ کے مطابق ان 2 ماہ میں فائرنگ سے 26 شہری شہید اور 107 زخمی ہوئے۔

    یکم اکتوبر کو بھمبر سیکٹر پر بھارتی فوج نے بلا اشتعال فائرنگ کی جس کا پاک فوج نے بھرپور جواب دیا۔

    چار اکتوبر کو جنگی جنون میں مبتلا بھارتی فوج نے پھر سیز فائر معاہدے کی خلاف ورزی کی۔

    سولہ اکتوبر کو بھی بھارت کی جانب سے کنٹرول لائن کی خلاف ورزی کی گئی۔

    انیس اکتوبر کو بھارت نے 2 مرتبہ جنگ بندی کے معاہدے کو روند ڈالا۔

    بیس اکتوبر کو بھارتی اشتعال انگیزی سے 28 سالہ عبد الرحمٰن شہید اور محمد احسان زخمی ہوگیا۔

    اٹھائیس اکتوبر کو بھارتی فوج کی بلا اشتعال فائرنگ سے ایک خاتون شہید ہوئیں۔

    اکتیس اکتوبر کو ہونے والی فائرنگ میں 4 شہری شہید ہوئے۔

    آٹھ نومبر کو بھارتی فوج نے آبادی پر بلا اشتعال فائرنگ کی جس کی زد میں آ کر ماں بیٹی سمیت 3 شہری شہید ہوگئے۔

    چودہ نومبر کو لائن آف کنٹرول پر بھارتی فورسز نے بلا اشتعال فائرنگ کر کے 7 پاکستانی فوجیوں کو شہید کر دیا تھا۔

    انیس نومبر کو ہونے والی بلا اشتعال فائرنگ سے 4 بچے شہید ہوئے۔

    کل بائیس نومبر کو بھی بھارتی اشتعال انگیزی سے 4 پاکستانی شہری شہید ہوئے تھے۔

    آج صبح بھارتی فوج نے وادی نیلم میں مسافر کوچ پر راکٹ فائر کیا جس کے باعث چار شہری شہید ہوگئے۔

  • اقوام متحدہ کے مبصرین کی جی ایچ کیو آمد

    اقوام متحدہ کے مبصرین کی جی ایچ کیو آمد

    راولپنڈی: بھارتی فوج کی فائرنگ سے 4 بچوں کی شہادت پر اقوام متحدہ کے مبصرین نے راولپنڈی میں جی ایچ کیو کا دورہ کیا۔ مبصرین کو واقعے کی تفصیلات سے آگاہ کیا گیا اور انہیں دستاویزات دی گئیں۔

    ایل او سی پر بھارتی فوج کی اشتعال انگیزی جاری ہے۔ بارود اگلتی بندوقوں نے 3 بچیوں اور ایک لڑکے کی جان لے لی۔ پاک فوج نے اقوام متحدہ سے نوٹس لینے کا مطالبہ کردیا۔

    ترجمان دفتر خارجہ کے مطابق اقوام متحدہ کے فوجی مبصرین نے جی ایچ کیو میں فوجی حکام سے ملاقات کی۔ بھارتی فورسز کے ہاتھوں 4 بچوں کی شہادت کی دستاویزات مبصرین کے حوالے کی گئیں اور تحقیقات کی درخواست کی گئی۔

    ترجمان دفتر خارجہ کا کہنا ہے کہ بھارتی وزیر دفاع مسلسل پاکستان مخالف بیانات داغ رہے ہیں۔ بھارت پاکستان کو غیر مستحکم کرنے کی کوشش کر رہا ہے۔

    واضح رہے کہ دفتر خارجہ کے مطابق رواں برس بھارت نے لائن آف کنٹرول پر 222 بار سیز فائر کی خلاف ورزی کی جس کے باعث 26 معصوم شہری شہید اور 107 زخمی ہوئے۔

    ایک روز قبل پاک فوج نے پاکستانی حدود میں آنے والا بھارتی ڈرون طیارہ مار گرایا تھا۔ طیارہ پاکستانی چوکیوں کی طرف 60 میٹر تک آیا تھا۔ ڈرون کا مقصد چوکیوں کی جگہ اور اطراف کی تصاویر اور ویڈیو حاصل کرنا تھا۔

    اس سے قبل بھی بھارتی بحریہ کی آبدوز نے پاکستان کے سمندروں میں داخل ہونے کی کوشش کی تھی تاہم پاک بحریہ نے بر وقت ردعمل دیتے ہوئے اسے ناکام بنا دیا۔

  • ایل او سی: بھارتی فوج کی بلا اشتعال فائرنگ سے 4 بچے شہید، متعدد زخمی

    ایل او سی: بھارتی فوج کی بلا اشتعال فائرنگ سے 4 بچے شہید، متعدد زخمی

    راولپنڈی: بھارتی فورسز جارحیت سے باز نہ آئیں، ایک بار پھر ایل او سی کے مختلف سیکٹرز پر فائرنگ کردی جس کے باعث ایک ہی خاندان کی تین بچیاں اور ایک 15سالہ لڑکا شہید اور 5 زخمی ہوگئے۔

    تفصیلات کے مطابق بھارت کا جنگی جنون کم نہیں ہورہا اور وہ اپنی بزدلانہ حرکتوں سے باز نہیں آرہی، بھارتی فوجی نے ہفتے کو ایل او سی کے مخلتف سیکٹرز پر فائرنگ کی اور آبادی کو نشانہ بنایا جس کے نتیجے میں ایک ہی خاندان کے 4 افراد شہید ہوگئے جن میں ایک بھائی، دو بہنیں اور ایک کزن جاں بحق ہوگئے۔

    بھارتی فوج نے ہفتے کو لائن آف کنٹرول کے نزدک ضلع کوٹلی میں واقع کھوئی رٹہ سیکٹر پر فائرنگ کی اور آبادی کو نشانہ بنایا جس کے نیتجے میں 16سالہ شہزاد سمیت چار، سات اور گیارہ سال کی تین بچیاں شہید ہوگئے، ان میں دو بہنیں اور ایک کزن شامل ہیں، جب کہ زخمی علیحدہ ہیں۔

    آئی ایس پی آر نے 4 افراد کی شہادت کی تصدیق کی ہے،آخری اطلاعات آنے تک کھوئی رٹہ میں فائرنگ کا سلسلہ جاری رہا۔

    برطانوی نشریاتی ادارے کے مطابق بھارتی افواج نے شہری آبادی پر گولہ باری کی اور آرٹلری بھی فائر کیے، گولے مکانات پر گرے جس کے نتیجے میں ہلاکتیں ہوئی، ہلاک شدگان اور زخمی افراد کا تعلق ایک ہی خاندان سے ہے جن میں سے دو افراد کی حالت تشویش ناک ہے۔

    آئی ایس پی آر کے مطابق آج صبح بھی بھارتی فوج نے بھمبر سیکٹر میں بروہ اور ٹانڈر کے علاقوں میں بلا اشتعال فائرنگ کی۔ پاک فوج نے بھارتی فوج کو دندان شکن جواب دیا۔

    بھارتی فوج کی جانب سے فائر بندی کی مسلسل خلاف ورزیوں کے باعث سرحدی کشیدگی میں اضافہ اور عوام میں تشویش پائی جاتی ہے۔

    یاد رہے کہ گزشتہ روز بھارتی بحریہ کی آبدوز نے پاکستان کے سمندروں میں داخل ہونے کی کوشش تھی جس کو پاک بحریہ نے بر وقت ردعمل دیتے ہوئے ناکام بنا دیا تھا۔

  • اقوام متحدہ کا لائن آف کنٹرول پر جاری کشیدگی پر تحفظات کا اظہار

    اقوام متحدہ کا لائن آف کنٹرول پر جاری کشیدگی پر تحفظات کا اظہار

    نیویارک: اقوام متحدہ نے ڈیڑھ ماہ سے زائد جاری کنٹرول لائن اور ورکنگ بانڈری پر بھارتی جارحیت پر تحفظات کا اظہار کر دیا۔ اقوام متحدہ نے دونوں ممالک کو مل کر مسائل حل کرنے کا مشورہ بھی دے دیا۔

    اقوام متحدہ نے گزشتہ ڈیڑھ ماہ سے کنٹرول لائن پر جاری کشیدگی پر اپنے تحفظات کا اظہار کردیا لیکن ساتھ ہی کچھ کرنے کے حوالے سے اپنا دامن صاف بچالیا۔

    اقوام متحدہ کا کہنا ہے کہ پاکستان اور بھارت کو کشمیر سمیت تمام مسائل کا حل مذاکرات سے نکالنا چاہیئے۔

    واضح رہے کہ بھارت نے گزشتہ روز بھمبر سیکٹر پر بلا اشتعال فائرنگ کی تھی جس کے نتیجے میں پاک فوج کے 7 جوان شہید ہوگئے تھے۔ بھارتی جارحیت کے خلاف دفتر خارجہ نے بھارتی ہائی کمشنر کو طلب کرکے اپنا سخت احتجاج بھی ریکارڈ کروایا تھا۔

    دوسری جانب ڈی جی آئی ایس پی آر عاصم باجوہ کا کہنا ہے کہ لائن آف کنٹرول کی خلاف ورزی پر ہم نے ہمیشہ جواب دیا اور کبھی خاموش نہیں رہے۔

    اے آر وائی نیوز کے پروگرام پاور پلے میں گفتگو کرتے ہوئے انہوں نے بتایا کہ سال 2016 میں بھارت نے اب تک ایل او سی پر 199 بار اور ورکنگ باؤنڈری پر 38 بار فائرنگ کی۔ جارحیت میں ستمبر کے بعد انتہائی تیزی آئی۔ ورکنگ باؤنڈری پر اکتوبر سے قبل صرف ایک بار لیکن اکتوبر سے اب تک 37 بار فائرنگ ہوئی۔

    عاصم باجوہ کا کہنا تھا کہ سرحدوں پر پاک فوج کی جوابی کارروائی میں مارے گئے بھارتی فوجیوں کی ہلاکتوں کی تعداد ہمارے شہید فوجیوں سے 3 گنا زائد ہے۔ بھارت ہلاکتیں چھپاتا ہے لیکن ہم اپنی شہادتیں نہیں چھپاتے۔

  • ہلاک بھارتی فوجیوں‌ کی تعداد ہمارے شہدا سے 3 گنا زائد ہے، عاصم باجوہ

    ہلاک بھارتی فوجیوں‌ کی تعداد ہمارے شہدا سے 3 گنا زائد ہے، عاصم باجوہ

    اسلام آباد: ڈی جی آئی ایس پی آر عاصم باجوہ نے کہا ہے کہ بھارتی جارحیت پر خاموش نہیں رہتے بھرپور جواب دیتے ہیں،سرحدوں پر پاک فوج کی جوابی کارروائی میں مارے گئے بھارتی فوجیوں کی ہلاکتوں کی تعداد ہمارے شہید فوجیوں سے 3 گنا زائد ہے، بھارت ہلاکتیں چھپاتا ہے لیکن ہم اپنی شہادتیں نہیں چھپاتے۔

     اے آر وائی نیوز کے پروگرام پاور پلے میں میزبان ارشد شریف سے ٹیلی فونک گفتگو کرتے ہوئے پاک فوج کے شعبہ تعلقات عامہ کے ڈائریکٹر جنرل میجر جنرل عاصم باجوہ نے کہا ہے کہ ہمارے 7 جوان لائن آف کنٹرول پر بھارتی فوجیوں کی فائرنگ سے شہید ہوئے، یہ بہت افسوس ناک واقعہ ہے، ایل او سی اور ورکنگ بائونڈری پر بھارتی جارحیت ستمبر میں شروع ہوئی جو تاحال جاری ہے، قبل ازیں بھی ہمارے دو فوجی جوان شہید ہوئے تھے۔

    یہ پڑھیں: بھمبر میں بھارتی فائرنگ سے 7 فوجی جوان شہید، دفتر خارجہ کا احتجاج

    ڈی جی آئی ایس پی آر نے کہا کہ لائن آف کنٹرول کی خلاف ورزی پر ہم نے ہمیشہ جواب دیا اور کبھی خاموش نہیں رہے، سال 2016ء میں بھارت نے اب تک ایل او سی پر 199 بار اور ورکنگ بائونڈری پر 38 بار فائرنگ کی، جارحیت میں ستمبر کے بعد انتہائی تیزی آئی، ورکنگ بائونڈ پر اکتوبر سے قبل صرف ایک بار لیکن اکتوبر سے اب تک 37 بار فائرنگ ہوئی۔

     یہ پڑھیں: بھارتی جارحیت کا منہ توڑ جواب دیا جائے گا، آرمی چیف راحیل شریف

    انہوں نے بتایا کہ نیویارک میں اقوام متحدہ کی جنرل اسمبلی کے اجلاس کے دوران وزیراعظم پاکستان نواز شریف نے مقبوضہ کشمیر کے معاملے پر زبردست خطاب کیا جس کے بعد سے ایل او سی اور ورکنگ بائونڈری پر فائرنگ کے واقعات میں تیزی آئی ہے ساتھ ہی کشمیر میں تحریک آزادی زوروں پر ہے جو کہ بھارت سے اب کنٹرول نہیں ہورہی۔

    اسی سے متعلق: پاکستان کسی بھی جارحیت کا بھرپور جواب دینے کی صلاحیت رکھتا ہے، وزیراعظم

    انہوں نے کہا کہ جب بھی کشمیر میں تحریک آزادی زور پکڑتی ہے تو سرحدوں پر بھارتی فائرنگ کا سلسلہ شروع ہوجاتا ہے، بھارت نے سرجیکل اسٹرائیکس کا ڈرامہ رچایا جس پر پوری دنیا نے یقین نہیں کیا اور سوالات کیے۔

    یہ بھی پڑھیں: دفترخارجہ کی بھمبرسیکٹر پر بھارتی اشتعال انگیزی کی شدید مذمت

    عاصم باجوہ نے کہا کہ بھارتی جارحیت کے نتیجے میں فائرنگ اور جوابی فائرنگ کے دوران مارے گئے بھارتی فوجیوں کی تعداد ہمارے شہید فوجیوں کی تعداد سے تین گنا زائد ہے لیکن بھارتی ہلاکتیں چھپاتا ہے اور ہم اپنے فوجیوں کی شہادتیں نہیں چھپاتے جب کہ بھارتی ہلاکتوں کی تعداد کم کرکے بتاتے ہیں۔

    انہوں نے بتایا کہ 13 برس کے بعد پہلی بار بھارتی فوجیوں نے جارحیت کے دوران آرٹلری بھی فائر کیا، جب بھی یہ فائرنگ کرتے ہیں تو شروعات گاؤں سے کرتے ہیں ۔

  • دفترخارجہ کی بھمبرسیکٹرپر بھارتی اشتعال انگیزی کی شدید مذمت

    دفترخارجہ کی بھمبرسیکٹرپر بھارتی اشتعال انگیزی کی شدید مذمت

    اسلام آباد: دفترخارجہ کےترجمان کا کہناہے کہ بھارت مسلسل بلا اشتعال فائرنگ کررہا ہے اور ایل او سی کی خلاف ورزیوں پر کئی بار بھارتی ہائی کمشنر کو طلب کیا گیا ہے۔

    تفصیلات کےمطابق دفترخارجہ کے ترجمان نفیس زکریا نےبھمبرسیکٹر میں بھارتی فورسز کی جانب سے بلااشتعال فائرنگ کی شدید مذمت کرتے ہوئے کہا کہ بھارتی جارحیت کا پاک فوج کی جانب سے بھرپور جواب دیا گیا۔

    نفیس زکریا کا کہناتھا کہ بھمبر سیکٹر پر وطن کے لیے جان قربان کرنے والے بہادر جوانوں کو سلام پیش کرتے ہیں۔ان کا کہناتھا کہ بھارت نےکشمیریوں پر ظلم وبربریت کی انتہا کردی ہے اور کشمیر سے توجہ ہٹانے کےلیے بھارت اشتعال انگیزی کررہا ہے۔

    وزیر دفاع خواجہ آصف نے بھارتی فورسز کی جانب سے بھمبر سیکٹر پر بلااشتعال فائرنگ کی شدید الفاظ میں مذمت کرتے ہوئے کہا کہ پاک فوج کی جانب سے بھارتی جارحیت پربھرپور جواب دیا گیا۔

    مزید پڑھیں:بھمبرسیکٹر میں بھارت کی اشتعال انگیزی،7 فوجی جوان شہید

    خواجہ آصف کا کہناتھاکہ بھارت خطے کے امن کےلیے خطرے کا باعث ہے اور وہ پاکستان کو دباﺅ میں رکھنا چاہتا ہے لیکن اسے کسی صورت کامیاب نہیں ہونے دیں گے۔

    دوسری جانب وزیر اطلاعات مریم اورنگزیب نے کہا ہے کہ پوری قوم شہید ہونے والے فوجیوں کے ساتھ کھڑی ہے اورہمیں پاک فوج پر فخر ہے،وطن کے دفاع کے لیے کسی قسم کا سمجھوتہ نہیں کیا جائے گا۔

    وزیراطلاعات کا کہنا ہے کہ بھارتی جارحیت کا پاک فوج نے منہ توڑ جواب دیا اور سفارتی سطح پر بھی اسی طرح کا جواب دیا جائے گا۔

  • ایل او سی پر بھارتی جارحیت، بھارتی ڈپٹی ہائی کمشنر کی دفتر خارجہ طلبی

    ایل او سی پر بھارتی جارحیت، بھارتی ڈپٹی ہائی کمشنر کی دفتر خارجہ طلبی

    اسلام آباد: پاکستان نے کھوئی رٹہ، بٹل سیکٹرز سمیت لائن آف کنٹرول پر فائر بندی کی خلاف ورزیوں کے خلاف بھارتی ڈپٹی ہائی کمشنر کو دفتر خارجہ طلب کر کے احتجاج ریکارڈ کروایا۔

    دفتر خارجہ نے بھارت کی جانب سے لائن آف کنٹرول کی مسلسل خلاف ورزی پر بھارتی ڈپٹی ہائی کمشنر کو طلب کر کے شدید احتجاج کیا ہے۔

    دفتر خارجہ کے اعلامیہ میں کہا گیا ہے کہ بھارتی فورسز کی جانب سے گزشتہ روز سیز فائر کی خلاف ورزیوں کے باعث 4 شہری شہید اور 7 زخمی ہوئے۔

    اعلامیہ میں مزید کہا گیا ہے کہ بھارت 2003 کے سمجھوتے کی پاسداری کرے۔ علاوہ ازیں سارک فورم کے ذریعے سیز فائر کی مسلسل خلاف ورزیوں کی تحقیقات کروائی جائیں۔

    اعلامیہ میں سارک ممالک پر زور دیتے ہوئے کہا گیا ہے کہ بھارتی فورسز کو پابند بنایا جائے کہ وہ سیز فائر کا احترام کریں، شہری آبادی کو نشانہ نہ بنائیں اور ایل او سی پر امن کو یقینی بنایا جائے۔

    واضح رہے کہ رواں برس بھارت نے لائن آف کنٹرول پر 222 بار سیز فائر کی خلاف ورزی کی جس کے باعث 26 معصوم شہری شہید اور 107 زخمی ہوئے۔

  • بھارتی فوج کی ایک بار پھر ایل او سی پر بلا اشتعال فائرنگ، پاک فوج کا منہ توڑ جواب

    بھارتی فوج کی ایک بار پھر ایل او سی پر بلا اشتعال فائرنگ، پاک فوج کا منہ توڑ جواب

    راولپنڈی: بھارتی فوج نے ایک بار پھر لائن آف کنٹرول پر بلا اشتعال فائرنگ کا سلسلہ شروع کردیا ہے۔ کیل، نکیال، جندروٹ سیکٹرز میں فائرنگ کا سلسلہ جاری ہے۔ پاک فوج کی جانب سے بھارت کو منہ توڑ جواب دیا گیا۔

    آئی ایس پی آر کے مطابق بھارتی فوج نے لائن آف کنٹرول کے کیل، نکیال، جندروٹ سیکٹرز میں بلا اشتعال فائرنگ کا سلسلہ شروع کردیا ہے۔ فائرنگ میں آبادی کو بھی نشانہ بنایا جارہا ہے۔

    بھارت کی جانب سے فائرنگ میں مختلف ہتھیاروں کا استعمال کیا جارہا ہے۔

    پاک فوج کی جانب سے بھارت کو منہ توڑ جواب دیا گیا۔ پاک فوج نے کئی بھارتی چیک پوسٹوں کو نشانہ بنایا اور اس طرف سے نقصان کی اطلاعات موصول ہوئی ہیں۔

    واضح رہے کہ دو روز قبل ہارٹ اسپرنگ، جند روڈ اور نکیال سیکٹر پر کی جانے والی بھارتی فائرنگ سے ایک خاتون شہید اور سات افراد زخمی ہوگئے تھے۔

    دوسری جانب ترجمان دفتر خارجہ نفیس زکریا کا کہنا ہے کہ بھارت نے رواں سال 90 سے زائد مرتبہ کنٹرول لائن پر بلا اشتعال فائرنگ کر کے سیز فائر معاہدے کی خلاف ورزی کی ہے۔

  • پاک فوج نے ایل اوسی پر پاکستانی چیک پوسٹ تباہ کرنے کا بھارتی دعویٰ مسترد کردیا

    پاک فوج نے ایل اوسی پر پاکستانی چیک پوسٹ تباہ کرنے کا بھارتی دعویٰ مسترد کردیا

    راولپنڈی : پاک فوج نے بھارت کی طرف سے وادی نیلم میں پاکستانی چیک پوسٹیں تباہ کرنے کا دعویٰ مسترد کردیا۔

    پاک فوج کے شعبہ تعلقات عامہ آئی ایس پی آر کےمطابق بھارت کی جانب سے وادی نیلم میں کنٹرول لائن پر پاکستانی چوکی کو تباہ کرنے کا دعویٰ جھوٹا ہے۔

    آئی ایس پی آر کا کہنا ہے کہ ہفتے سے ورکنگ باؤنڈری کے ہرپار،چھپرار، پوکھلیاں اور شکر گڑھ سیکٹرز پر وقفے وقفے سے فائرنگ کا تبادلہ جاری ہے۔

    پاک فوج کے شعبہ تعلقات عامہ کے مطابق بھارتی فورسز کی فائرنگ سے چار شہری زخمی ہوگئے ہیں جبکہ پاک فوج موثر طریقے سے ہندوستانی چوکیوں کو نشانہ بنارہی ہے۔

    مزید پڑھیں: ورکنگ باؤنڈری پر بلااشتعال فائرنگ،چناب رینجرزکا بھرپورجواب

    خیال رہے کہ اس سے قبل ورکنگ باؤنڈری پر بھارتی فورسز نے بلا اشتعال گولہ باری کی تھی ۔شکر گڑھ سیکٹر میں فائرنگ اور گولہ باری میں شہری آبادی کو نشانہ بنایا گیا تھاجس کے نتیجے میں دوعام شہری زخمی اور املاک کو بھی نقصان پہنچا۔

    یاد رہے کہ گزشتہ ہفتے سے شروع ہونے والی بلا اشتعال فائرنگ کے نتیجے میں ورکنگ باؤنڈری کے اطراف گاؤں میں ایک بچے سمیت چار پاکستان شہری جاں بحق جبکہ 26 زخمی ہوچکے ہیں۔

    مزید پڑھیں: ایل او سی پر فائرنگ: پاک فوج کا بھرپور جواب،5 بھارتی فوجی ہلاک،4 چوکیاں تباہ

    واضح رہے کہ گزشتہ ہفتے ہونے والی بلااشتعال فائرنگ کا پاک فوج نے بھرپور جواب دیاتھا،جس کے نتیجے میں بھمبر سیکٹر میں بھارتی فوج کی چار چیک پوسٹیں مکمل طور پر تباہ ہوگئیں اور پانچ بھارتی فوجی ہلاک ہوگئے تھے۔

  • ایل او سی پربھارتی فورسز کی فائرنگ،پاک فوج کا منہ توڑجواب

    ایل او سی پربھارتی فورسز کی فائرنگ،پاک فوج کا منہ توڑجواب

    راولپنڈی : بھارتی فورسز کی جانب سے ایل اوسی پر بلااشتعال فائرنگ کاپاک فوج کی جانب سے بھرپور جواب دیاگیا۔

    آئی ایس پی آر کا کہناہے کہ ایل او سی شاہ کوٹ سیکٹر پر بھارتی فورسز کی جانب سے بلا اشتعال فائرنگ کا سلسلہ صبح سات بجکر چالیس منٹ پر شروع ہوا جووقفے وفقے سے جاری ہے۔

    بھارتی فورسز کی جانب سے شاہ کوٹ سیکٹر پر فائرنگ میں کوئی جانی نقصان کی اطلاع نہیں ہے تاہم فائرنگ سے سرحدی دیہاتوں میں خوف وہراس کی فضا ہے۔

    مزید پڑھیں: چھمب سیکٹر بھارتی فوج کی بلا اشتعال فائرنگ، 2 افراد زخمی

    یاد رہے کہ گزشتہ روز چھمب سیکٹر میں بھارتی فوج کی بلا اشتعال فائرنگ سے دو افراد زخمی ہوگئے تھے،پاک فوج کی بھارتی فوج کےخلاف دندان شکن جوابی کارروائی کرکے دشمن کی بندوقیں خاموش کرادی تھیں۔

    مزید پڑھیں:بھارتی فوج کی ایل او سی پر گولہ باری، خاتون شہید، سات شہری زخمی

    دو روز قبل بھی بھارتی فوج نے ہارٹ اسپرنگ، جند روڈ اور نکیال سیکٹر پربلا اشتعال فائرنگ کی، فائرنگ سے ایک خاتون شہید اور سات شہری زخمی ہوگئے تھے جبکہ پاک فوج کی جوابی فائرنگ میں بھارت کا بھی جانی نقصان ہونے کی اطلاعات تھی۔

    مزید پڑھیں: ایل او سی پر فائرنگ: پاک فوج کا بھرپور جواب،5 بھارتی فوجی ہلاک،4 چوکیاں تباہ

    واضح رہے کہ بدھ کو ہونے والی بلااشتعال فائرنگ کا پاک فوج نے بھرپور جواب دیا،جس کے نتیجے میں بھمبر سیکٹر میں بھارتی فوج کی چار چیک پوسٹیں مکمل طور پر تباہ ہوگئیں اور پانچ بھارتی فوجی ہلاک ہوگئے تھے۔