ARYNews.tv | Urdu – Har Lamha Bakhabar

Tag: ایل او سی

  • مسلح افواج ہر بھارتی جارحیت کا جواب دینےکے لیے تیار ہیں،آئی ایس پی آر

    مسلح افواج ہر بھارتی جارحیت کا جواب دینےکے لیے تیار ہیں،آئی ایس پی آر

    راولپنڈی: پاک فوج کے ترجمان میجر جنرل آصف غفور کا کہنا ہے کہ مسلح افواج ہر بھارتی جارحیت کا جواب دینےکے لیے تیار ہیں۔

    تفصیلات کے مطابق ڈی جی آئی ایس پی آر میجر جنرل آصف غفور نے بھارتی آرمی چیف کے بیان پر ردعمل دیتے ہوئے کہا کہ ایل او سی پر جارحیت سے متعلق بھارتی آرمی چیف کا بیان معمول کی ہرزہ سرائی ہے۔

    میجر جنرل آصف غفور نے کہا کہ بھارتی آرمی چیف اپنے لوگوں کو خوش کرنے کے لیے بیانات دے رہے ہیں، بھارتی آرمی چیف کے بیانات داخلی حالات کو سنبھالا دینے کی کوشش ہیں۔

    ڈی جی آئی ایس پی آر نے اپنے بیان میں مزید کہا کہ مسلح افواج ہر بھارتی جارحیت کا جواب دینےکے لیے تیار ہیں۔

    یاد رہے کہ گزشتہ ہفتے ڈی جی آئی ایس پی آر کا کہنا تھا کہ منوج نروانے آرمی چیف کے عہدے پر نئے ہیں اور اپنی جگہ بنانے کی کوششوں میں مصروف ہیں لیکن وہ بھارتی فوج میں نئے نہیں آئے۔

    میجر جنرل آصف غفور کا کہنا تھا کہ بھارتی آرمی چیف کو خطے کے حالات اور پاکستان کی افواج کی قابلیت کا بخوبی علم ہے۔

  • گزشتہ برس بھارت نے ایل او سی کی 3 ہزار سے زائد بار خلاف ورزی کی: وزارت خارجہ

    گزشتہ برس بھارت نے ایل او سی کی 3 ہزار سے زائد بار خلاف ورزی کی: وزارت خارجہ

    اسلام آباد: وزارت خارجہ حکام نے سینیٹ کی قائمہ کمیٹی برائے امور کشمیر و گلگت بلتستان کے اجلاس میں اپنی بریفنگ میں بتایا کہ سنہ 2019 میں بھارت نے جنگ بندی کی 3 ہزار سے زائد بار خلاف ورزی کی۔

    تفصیلات کے مطابق سینیٹ کی قائمہ کمیٹی برائے امور کشمیر و گلگت بلتستان کا اجلاس چیئرمین ساجد میر کی زیر صدارت ہوا۔ اجلاس میں وزارت خارجہ حکام نے کمیٹی کو لائن آف کنٹرول پر بھارتی جارحیت کے حوالے سے بریفنگ دی۔

    اپنی بریفنگ میں وزارت خارجہ حکام نے بتایا کہ بھارتی خلاف ورزیوں اور نقصانات کی تفصیلات جمع کی جا رہی ہیں، قیام پاکستان سے اب تک کے نقصانات کی رپورٹ کے لیے وقت درکار ہے۔

    حکام کا کہنا تھا کہ چند سال سے خلاف ورزیاں بھارت کا معمول بن گئی ہیں، سنہ 2019 میں بھارت نے جنگ بندی کی 3 ہزار سے زائد بار خلاف ورزی کی۔ جارحیت پر بھارتی ہائی کمشنر کو بلا کر احتجاج کیا جاتا ہے۔

    وزارت خارجہ حکام کا کہنا تھا کہ پاکستان مسئلہ کشمیر سے متعلق تمام آپشنز پر غور کر رہا ہے۔ کشمیر کا معاملہ ٹھنڈا پڑ جانے کا تاثر درست نہیں۔

    سینیٹر صلاح الدین ترمذی نے دریافت کیا کہ مسئلہ کشمیر پر وزیر خارجہ ملتان کےعلاوہ کن ممالک میں گئے؟ سابق ترجمان دفتر خارجہ ڈاکٹر محمد فیصل نے کہا کہ وزیر خارجہ 5 اگست کے بعد 50 ممالک کے وزرائے خارجہ سے ملے۔ سلامتی کونسل کے اجلاس میں 54 وزرائے خارجہ سے ملاقاتیں کیں۔

    ڈاکٹر محمد فیصل کا کہنا تھا کہ عالمی میڈیا اب کشمیر کے معاملے پر آواز اٹھا رہا ہے۔ ان کیمرہ اجلاس میں کمیٹی کو زیادہ تفصیل سے آگاہ کر سکتے ہیں۔

    وفاقی وزیر برائے کشمیر امور علی امین گنڈا پور نے کہا کہ بہت سے ممالک مسئلہ کشمیر پر ہمارا ساتھ دینے کو تیار ہیں۔

    سینیٹر سراج الحق نے کہا کہ انتظار کرو اور دیکھو کی پالیسی پر عمل افسوسناک ہے، مسئلہ کشمیر پر او آئی سی کا اجلاس اسلام آباد میں بلایا جائے۔

    انہوں نے آزاد کشمیر کے کیمپوں کی حالت زار پر اظہار تشویش کرتے ہوئے کہا کہ آزاد کشمیر کے کیمپوں کے خود متعدد دورے کیے ہیں۔ وزارت خارجہ حکام کی جانب سے کہا گیا کہ کیمپوں میں سہولتیں بہتر بنانے کے منصوبے جاری ہیں۔

  • لائن آف کنٹرول پر شہید فوجی جوان آبائی علاقوں میں سپرد خاک

    لائن آف کنٹرول پر شہید فوجی جوان آبائی علاقوں میں سپرد خاک

    پنو عاقل: لائن آف کنٹرول پر گزشتہ روز بھارتی فوج کی بلا اشتعال فائرنگ سے شہید ہونے والے فوجی جوانوں کو آبائی علاقوں میں سپرد خاک کر دیا گیا۔

    تفصیلات کے مطابق گزشتہ روز ایل او سی پر بھارتی فوج کی اشتعال انگیزی کے باعث جام شہادت نوش کرنے والے پاک فوج کے دو اہل کاروں کو سپرد خاک کر دیا گیا۔

    نائب صوبیدار کندیرو کی تدفین صوبہ سندھ کے ضلع سکھر کی تحصیل پنو عاقل میں عمل میں آئی، جب کہ سپاہی محمد احسان کو پنجاب کے ضلع جہلم کے شہر پنڈدادن خان میں سپرد خاک کیا گیا۔

    یہ بھی پڑھیں:  ایل او سی پر فائرنگ سے 2 جوان شہید، پاک فوج کا منہ توڑ جواب، 3 بھارتی فوجی ہلاک

    شہید فوجیوں کی نماز جنازہ میں فوجی اور سول حکام، عزیز و اقارب اور شہریوں کی بڑی تعداد نے شرکت کی۔

    یاد رہے کہ دونوں جوان بھارتی فورسز کی بلا اشتعال فائرنگ سے گزشتہ روز شہید ہوئے تھے، پاک فوج کی جوابی کارروائی میں تین بھارتی فوجی ہلاک ہو گئے تھے، اور دشمن کی ایک چوکی تباہ ہو گئی تھی۔

    ڈی جی آئی ایس پی آر کا کہنا تھا کہ بھارتی فورسز نے حاجی پیر سیکٹر پر بلا اشتعال فائرنگ کی ہے جس کا بھرپور جواب دیا گیا۔ پاک فوج کی جوابی کارروائی سے بھارتی چیک پوسٹ تباہ ہو گئی، اور 3 بھارتی فوجی مارے گئے، جن میں ایک صوبیدار بھی شامل تھا۔

    آئی ایس پی آر کے مطابق پاک فوج کے جوان دیوا سیکٹر پر بھارتی اشتعال انگیزی سے شہید ہوئے تھے۔

  • ایل او سی خلاف ورزی دنیا کی توجہ ہٹانے کے لیے ہے: شاہ محمود

    ایل او سی خلاف ورزی دنیا کی توجہ ہٹانے کے لیے ہے: شاہ محمود

    اسلام آباد: وزیر خارجہ شاہ محمود قریشی نے ایل او سی پر بھارتی بلا اشتعال فائرنگ کی مذمت کرتے ہوئے کہا ہے کہ بھارت دنیا کی توجہ ہٹانے کے لیے لائن آف کنٹرول کی خلاف ورزیاں کر رہا ہے۔

    تفصیلات کے مطابق وزیر خارجہ شاہ محمود نے بھارتی فورسز کی جانب سے ایل او سی پر ایک بار پھر بلا اشتعال فائرنگ پر رد عمل ظاہر کرتے ہوئے کہا ہے کہ بھارت متنازع شہریت کے ایکٹ پر شدید رد عمل سے توجہ ہٹانا چاہتا ہے۔ بھارت کسی بھول میں نہ رہے، پاکستانی قوم سیسہ پلائی دیوار کی طرح ہے۔

    انھوں نے کہا کہ بھارتی عوام نے مودی سرکار کی انتہا پسند سوچ کو مسترد کر دیا ہے، مودی حکومت خطے میں امن کو تہہ و بالا کرنے پر تلی ہے، دنیا جنگی جنون میں مبتلا بھارت سرکار کی شر انگیزیوں کا نوٹس لے۔

    تازہ ترین:  ایل او سی پر فائرنگ سے 2 جوان شہید، پاک فوج کا منہ توڑ جواب، 3 بھارتی فوجی ہلاک

    دریں اثنا، وزیر خارجہ شاہ محمود نے پاک فوج کے شہید دونوں جوانوں کو خراج عقیدت پیش کرتے ہوئے کہا مسلح افواج کی جرأت اور بہادری کو ہم سلام پیش کرتے ہیں، مسلح افواج کی قربانیوں پر پوری قوم کو فخر ہے ، بھارت کسی بھول میں نہ رہے، قوم سیسہ پلائی دیوار کی طرح مسلح افواج کے شانہ بشانہ ہے۔

    خیال رہے کہ بھارتی فورسز نے ایک بار ایل او سی کی خلاف ورزی کرتے ہوئے حاجی پیر سیکٹر اور دیوا سیکٹر پر بلا اشتعال فائرنگ کی، دیوا سیکٹر میں فائرنگ سے پاک فوج کے دو جوانوں نے جام شہادت نوش کیا، جب کہ حاجی پیر سیکٹر نے پاک فوج کے منھ توڑ جواب سے تین بھارتی فوجی مارے گئے اور چیک پوسٹ تباہ ہو گئی۔

  • ایل او سی پر فائرنگ سے 2 جوان شہید، پاک فوج کا منہ توڑ جواب، 3 بھارتی فوجی ہلاک

    ایل او سی پر فائرنگ سے 2 جوان شہید، پاک فوج کا منہ توڑ جواب، 3 بھارتی فوجی ہلاک

    راولپنڈی: لائن آف کنٹرول پر بھارتی اشتعال انگیزی کے سبب پاک فوج کے 2 جوان شہید ہو گئے جب کہ جوابی کارروائی میں پاک فوج نے 3 بھارتی فوجی مار دیے۔

    تفصیلات کے مطابق بھارتی فوج کی جانب سے ایل او سی پر اشتعال انگیزیاں بڑھتی جا رہی ہیں، ڈی جی آئی ایس پی آر نے کہا ہے کہ بھارتی فورسز نے حاجی پیر سیکٹر پر بلا اشتعال فائرنگ کی ہے جس کا بھرپور جواب دیا گیا۔

    آئی ایس پی آر کے مطابق پاک فوج نے حاجی پیر سیکٹر پر بھارتی اشتعال انگیزیوں کا منہ توڑ جواب دیا، پاک فوج کی جوابی کارروائی سے بھارتی چیک پوسٹ تباہ ہو گئی۔

    ڈی جی آئی ایس پی آر کی ٹویٹ کے مطابق پاک فوج کی جوابی کارروائی میں 3 بھارتی فوجی مارے گئے، مارے جانے والے بھارتی فوجیوں میں ایک صوبیدار بھی شامل ہے۔

    آئی ایس پی آر کا کہنا ہے کہ بھارتی اشتعال انگیزی سے دیوا سیکٹر پر پاک فوج کے 2 جوان بھی شہید ہوئے۔ شہید نائب صوبیدار کندیرو سکھر کی تحصیل پنو عاقل کا رہایشی تھا جب کہ شہید سپاہی محمد احسان کا تعلق جہلم کی تحصیل پنڈدادن خان سے تھا۔

  • ایل او سی پر میزائلوں کی تنصیب رپورٹ ہوئی ہے: وزیر خارجہ

    ایل او سی پر میزائلوں کی تنصیب رپورٹ ہوئی ہے: وزیر خارجہ

    اسلام آباد: وزیر خارجہ شاہ محمود قریشی کا کہنا ہے کہ مودی سرکار نے سیکیولر انڈیا کے نظریے کو دفن کر دیا ہے، ایل او سی پر میزائل اور اسپائک اینٹی ٹینک میزائلوں کی تنصیب رپورٹ ہوئی ہے۔

    تفصیلات کے مطابق وزیر خارجہ شاہ محمود قریشی نے بھارت میں مسلم مخالف قانون سازی اور امن و امان کی صورتحال پر اہم بیان دیتے ہوئے کہا ہے کہ بھارت میں اس وقت کشیدگی عروج پر ہے اور یہ مودی سرکار کے اقدامات کی وجہ سے ہے۔

    وزیر خارجہ کا کہنا تھا کہ آج کوئی مقبوضہ کشمیر میں 5 اگست کے اقدامات کا ساتھ نہیں دے رہا، متنازعہ شہریت ایکٹ کے خلاف دنیا بھر میں بھارتی سراپا احتجاج ہیں۔ بھارت سرکار نے سیکیولر انڈیا کے نظریے کو دفن کر دیا ہے۔

    انہوں نے کہا کہ بھارت میں ہندو راشٹرا اور ہندو توا کی سوچ کو مسلط کیا جا رہا ہے۔ بھارت کا ارادہ دکھائی دے رہا ہے کہ وہ ایل او سی پر کوئی شرارت کرے۔ ایل او سی پر سیز فائر کی خلاف ورزیوں میں اضافہ ہوگیا ہے جبکہ سرحد پر باڑھ کو بھی کاٹا گیا۔ بھارتی فوج کی غیر معمولی نقل و حرکت دیکھنے میں آرہی ہے۔

    شاہ محمود قریشی کا کہنا تھا کہ یہ سارے عوامل امن و امان کے لیے خطرہ دکھائی دے رہے ہیں، ہمارے اداروں نے ایل او سی پر نئی ڈپلوائمنٹ کو رپورٹ کیا ہے۔ ایل او سی پر میزائل اور اسپائک اینٹی ٹینک میزائلوں کی تنصیب رپورٹ ہوئی۔ دنیا پوری طرح با خبر ہے کہ مودی سرکار کیا کر رہی ہے۔

    انہوں نے کہا کہ جب 2 ایٹمی طاقتیں سامنے ہوں تو بات خطے تک محدود نہیں رہے گی، کشمیر پر دو ٹوک مؤقف اپنانے پر ترک صدر اور ملائیشین وزیر اعظم کا شکریہ۔

    وزیر خارجہ کا کہنا تھا کہ او آئی سی نے کشمیر میں پیلٹ گنز کے بے دریغ استعمال کا نوٹس لیا ہے۔ اطلاعات کے مطابق تحقیقات کا آغاز بھی کر دیا گیا ہے۔ او آئی سی کے پلیٹ فارم سے بھی ان پر بہت تنقید کی جا رہی ہے۔

  • بھارتی فوج کی ایل او سی پر فائرنگ، 2 شہری شہید، 2 زخمی

    بھارتی فوج کی ایل او سی پر فائرنگ، 2 شہری شہید، 2 زخمی

    راولپنڈی: بھارتی فوج نے لائن آف کنٹرول (ایل او سی) کی ایک مرتبہ پھر خلاف ورزی کرتے ہوئے بلا اشتعال فائرنگ کی ہے جس کے نتیجے میں 2 شہری شہید 2 زخمی ہوگئے۔

    پاک فوج کے شعبہ تعلقات عامہ( آئی ایس پی آر ) کے مطابق بھارتی فوج نے ایک بار پھر سیز فائر معاہدے کی خلاف ورزی کرتے ہوئے شہری آبادی کو نشانہ بنایا۔

    آئی ایس پی آر کے مطابق بھارتی فوج نے لائن آف کنٹرول پر لسوا گاؤں پر بلا اشتعال فائرنگ کی، فائرنگ کے نتیجے میں 2 شہری شہید اور 2 شہری زخمی ہوگئے۔

    آئی ایس پی آر کا کہنا ہے کہ شہید ہونے والوں میں 14سال کا شہریار اور 29 سال کا نوید شامل ہے جبکہ فائرنگ سے خاتون سمیت 2 افراد زخمی ہوئے ہیں۔

    پاک فوج کے شعبہ تعلقات عامہ کے مطابق پاک فوج نے دشمن کو منہ توڑ جواب دیا، پاک فوج کی جانب سے کی جانے والی جوابی کارروائی میں بھارتی چوکی تباہ اور بھاری جانی نقصان ہوا ہے۔

    یاد رہے کہ رواں سال اکتوبر میں بھارتی فوج نے ایل او سی کی خلاف ورزی کرتے ہوئے بلا اشتعال فائرنگ کی تھی جس کے نتیجے میں 3 شہری زخمی ہوگئے تھے۔ آئی ایس پی آر کے مطابق بھارتی فوج کی فائرنگ سے زخمی ہونے والے شہریوں کا تعلق ضلع بھمبرکے گاؤں مندیکا سے تھا

  • بھارتی مہم جوئی کا منہ توڑ جواب دیا جائے گا: ڈی جی آئی ایس پی آر نے بھارت کو خبردار کردیا

    بھارتی مہم جوئی کا منہ توڑ جواب دیا جائے گا: ڈی جی آئی ایس پی آر نے بھارت کو خبردار کردیا

    اسلام آباد: ڈی جی آئی ایس پی آر میجر جنرل آصف غفور نے ایک بار پھر بھارت کو متنبہ کردیا ہے کہ مسلح افواج بھارت کے ہر جارحانہ عزائم کا منہ توڑ جواب دینے کو تیار ہیں۔

    تفصیلات کے مطابق پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل آصف غفور نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ مسلح افواج بھارت کے ہر جارحانہ عزائم کا جواب دینے کو تیار ہیں۔

    ڈی جی آئی ایس پی آر کا کہنا تھا کہ پاکستانی مسلح افواج بھارتی مہم جوئی کا منہ توڑ جواب دے گی، بھارتی آرمی چیف کا اشتعال انگیز بیان لائن آف کنٹرول کی صورتحال بگاڑنے کی کوشش ہے۔

    انہوں نے کہا کہ اشتعال انگیز بیان بھارت میں احتجاج سے توجہ ہٹانے کی کوشش ہے۔ بھارت ہمیشہ اپنے داخلی معاملات اور انتخابات میں ایسے ہتھکنڈے استعمال کرتا ہے۔

    خیال رہے کہ بھارتی فوج کے سربراہ جنرل بپن راوت نے گزشتہ روز اپنے ایک بیان میں کہا تھا کہ مقبوضہ کشمیر میں لائن آف کنٹرول پر صورتحال کسی وقت بھی سنگین ہو سکتی ہے۔

    بعد ازاں بھارت کی جانب سے سرحدوں پر غیر معمولی نقل و حرکت بھی بڑھا دی گئی۔ بھارت نے پاک انڈیا سرحد پر براہموس اور اسپائک میزائل بھی نصب کر دیے ہیں۔

  • بھارت نے سرحد پر اینٹی ٹینک میزائل نصب کر دیے

    بھارت نے سرحد پر اینٹی ٹینک میزائل نصب کر دیے

    نئی دہلی: پڑوسی ملک بھارت نے سرحد پر اینٹی ٹینک میزائل سمیت دیگر میزائل نصب کر دیے ہیں۔

    تفصیلات کے مطابق پاکستان کے داخلی مسائل کے دوران دشمن کی شرپسندی کی سازشیں سامنے آنے لگی ہیں، بھارت شر انگیزیوں کے لیے پھر سے پر تولنے لگا، سرحدوں پر غیرمعمولی نقل و حرکت بڑھا دی گئی ہے۔

    بھارت نے پاک انڈیا بارڈر پر براہموس اور اسپائک میزائل نصب کر دیے ہیں، جس پر وزیر خارجہ شاہ محمود قریشی نے اقوام متحدہ کے سیکریٹری جنرل اور سلامتی کونسل کے صدر کو خط لکھ دیا ہے۔

    وزیر خارجہ نے خط میں اقوام متحدہ کو باور کرایا ہے کہ بھارت ایل او سی پر نصب میزائل آزاد کشمیر پر استعمال کر سکتا ہے، بھارت نے ایل او سی کے پانچ سیکٹرز میں باڑ کو جزوی طور پر ہٹا دیا ہے۔

    شاہ محمود کا کہنا تھا کہ بھارت جعلی بنیادوں پر کوئی فوجی آپریشن کر سکتا ہے، اے آر وائی نیوز سے گفتگو کرتے ہوئے وزیر خارجہ نے کہا کہ بھارت نے اگر ایل او سی پر کوئی حرکت کی تو پاکستان بھرپور، بر وقت اور مناسب جواب دے گا، بھارت کو 27 فروری کا دن یاد رکھنا چاہیے۔

    یہ بھی پڑھیں:  لائن آف کنٹرول پر حرکت کی گئی تو پوری طرح تیار ہیں، شاہ محمود قریشی

    یاد رہے کہ گزشتہ روز آزاد کشمیر کے صدر مسعود خان نے کہا تھا کہ بھارت 47 لاکھ افراد انتہا پسند گروپ کی صورت میں تیار کر رہا ہے، ہندوستان نے جو جرائم کیے ہیں صدیوں تک ان کا جواب دینا پڑے گا، بھارت کی کوشش ہے کشمیر کے لوگ آپس میں لڑ پڑیں، ان کی کوشش ہے آزاد کشمیر اور پاکستان کے درمیان کوئی تصادم ہو، لیکن ہم بھارت کی سازشوں کو کسی صورت کام یاب ہونے نہیں دیں گے۔

  • ایل او سی پر بھارتی اشتعال انگیزی، پاک فوج کے 2 افسر زخمی

    ایل او سی پر بھارتی اشتعال انگیزی، پاک فوج کے 2 افسر زخمی

    راولپنڈی: خطے میں امن کا دشمن بھارت جنگ بندی معاہدے کی خلاف ورزیوں سے باز نہ آیا، ایل او سی پر بھاری اشتعال انگیزی کے باعث پاک فوج کے 2 افسر زخمی ہوگئے۔

    ڈی جی آئی ایس پی آر میجر جنرل آصف غفور کے مطابق ایل او سی کے راولاکوٹ سیکٹر پر بھارت نے بلااشتعال فائرنگ کی جس کے نتیجے میں پاک فوج کے 2 افسر زخمی ہوگئے۔

    سماجی رابطے کی ویب سائٹ ٹوئٹر پر جاری بیان میں ڈی جی آئی ایس پی آر نے بتایا کہ بھارتی فوج نے رکھ چکری میں پاکستانی پوسٹ پر مارٹرفائرکئے جب کہ پاک فوج نے بھارتی اشتعال انگیزی کابھرپور اورموثر جواب دیا۔

    ڈی جی آئی ایس پی آر کے مطابق بھارتی فوج سے فائرنگ کےتبادلےمیں پاک فوج کاایک میجراورکیپٹن زخمی ہوئے۔

    یہ بھی پڑھیں: آزاد کشمیر ایل او سی کی صورتحال پر امریکی ٹی وی کی رپورٹ جاری

    واضح رہے کہ ایک ماہ قبل معروف امریکی نشریاتی ادارے سی این این نے کشمیر سے متعلق اپنی خصوصی رپورٹ میں بھارت کے مقبوضہ و آزاد کشمیر میں جاری ظلم و بربریت کو دنیا پر عیاں کیا تھا، امریکی ٹی وی نے اپنی رپورٹ میں بتایا تھا کہ بھارتی شیلنگ کے باعث آزاد کشمیر کے شہری خوفزدہ ہیں۔

    سی این این کا اپنی رپورٹ میں کہنا تھا کہ آزادکشمیر کےرہائشیوں کوایل اوسی پربھارتی شیلنگ کا سامنا ہے، بھارتی شیلنگ کے باعث لوگوں کے گھروں کو نقصان پہنچا ہے۔

    نشریاتی ادارے نے رپورٹ میں بتایا کہ بھارتی شیلنگ سےلوگوں کی معمولات زندگی متاثرہوتےہیں۔