شہرہ آفاق لو اسٹوری ’بیوٹی اینڈ دا بیسٹ‘ پر بننے والی فلم کا ٹریلر جاری کردیا گیا۔ فلم میں ہیری پوٹر کی ہرمائنی ایما واٹسن مرکزی کردار ادا کر رہی ہیں۔
اٹھارویں صدی میں تحریر کی جانے والی تخیلاتی داستان ’بیوٹی اینڈ دا بیسٹ‘ ایک ایسے شہزادے کی کہانی ہے جو ایک بوڑھی پری سے بدتمیزی کرنے کے بعد سزا کے طور پر بھیڑیے میں بدل جاتا ہے۔
اسے واپس انسان بننے کے لیے ضروری ہے کہ جب کوئی لڑکی شہزادے سے اسی بھیڑیے کے روپ میں سچے دل سے اظہار محبت کرے تب ہی پری کی بد دعا کا اثر ختم ہوگا۔
فلم میں بھیڑیا ایک بوڑھے شخس کو قید کرلیتا ہے اور جب اس کی بیٹی بیلے (ایما واٹسن) اپنے باپ کو بچانے آتی ہے تو بھیڑیا اسے بھی قید کرلیتا ہے۔ وہ اس سے اچھا برتاؤ کرنے کی کوشش کرتا ہے تاکہ وہ اس سے متاثر ہو کر بھیڑیے سے محبت کر بیٹھے۔
بھیڑیے کی کوشش بالآخر کامیاب رہتی ہے اور بیلے اس سے محبت کرنے لگتی ہے لیکن تب ہی کچھ لوگ اس بھیڑیے کو مارنے کی کوشش کرتے ہیں اور یہیں سے کہانی میں نیا موڑ آتا ہے۔
فلم میں کئی واقعات کے ذریعہ اس غیر معمولی محبت کو پنپتے ہوئے دکھایا گیا ہے۔
جیسے ایک منظر میں بیلے کچھ ریچھوں کے غول میں گھر جاتی ہے اور بھیڑیا وہاں آکر اس کی جان بچاتا ہے۔
فلم میں بھیڑیے کا کردار ڈین اسٹیونس نے ادا کیا ہے۔ دوسری جانب ایما واٹسن کی اداکاری لاجواب ہے۔ وہ ہیری پوٹر فلموں کی سیریز کے علاوہ بھی متعدد فلموں میں اپنی اداکاری کے جوہر دکھا چکی ہیں۔
والٹ ڈزنی پکچرز کی جانب سے پیش کی جانے والی فلم بیوٹی اینڈ دا بیسٹ 17 مارچ کو سینما گھروں کی زینت بنے گی۔
