لاس اینجلس: ہالی وڈ کے معروف اداکاروں جونی ڈیپ اور ان کی سابق اہلیہ ایمبر ہرڈ کے درمیان ہتک عزت کا مقدمہ کچھ عرصے سے شہ سرخیوں میں تھا، مقدمے میں جونی ڈیپ کو فتح ہوئی اور عدالت نے ان کی سابق اہلیہ کو حکم دیا کہ وہ ہرجانے کی رقم ادا کریں۔
رپورٹ کے مطابق جونی ڈیپ اور ان کی سابق اہلیہ ایمبر ہرڈ کے ڈیڑھ ماہ تک چلنے والے مقدمے کی سماعت میں دونوں فریقین کی جانب سے ایک دوسرے پر سنگین الزامات لگائے گئے لیکن فیصلہ اداکار جونی ڈیپ کے حق میں آیا تھا۔
جونی ڈیپ کو جرمانے کی ادائیگی، ایمبر ہیئرڈ قیمتی ترین تحفہ فروخت کریں گی
تاہم اب ایک غیر ملکی رپورٹ کے مطابق ہالی وڈ کے اداکار جونی ڈیپ نے اپنی سابق بیوی ایمبر ہرڈ سے ملنے والی ہرجانے کی رقم ایک ملین ڈالر کو 5 خیراتی اداروں میں تقسیم کرنے کا اعلان کیا ہے۔
رپورٹس کے مطابق ان اداروں میں بیمار بچوں کی دیکھ بھال کرنے والے اور بے گھروں کو پناہ فراہم کرنے والے اداروے شامل ہیں، ہر ادارے کو 2 لاکھ ڈالر بطور خیرات دی جائے گی۔
جونی ڈیپ سے کیس ہارنے کے بعد امبر ہرڈ نے فلم انڈسٹری چھوڑ دی
خیال رہے کہ ہالی ووڈ کی جانی مانی شخصیات ایمبر ہرڈ اور جونی ڈیپ نے 2015 میں شادی کی تھی۔
شادی کے 15 ماہ بعد دونوں نے علیحدگی کا اعلان کر دیا، ایمبر ہرڈ لاس اینجلس کی ایک عدالت میں گال پر چوٹ کے ساتھ پیش ہوئیں اور انہوں نے طلاق کی درخواست کے ساتھ عدالت سے استدعا کی کہ جونی ڈیپ کو ان سے دور رہنے کا حکم دیا جائے۔
انہوں نے دعویٰ کیا کہ ان کے سابقہ شوہر نے ان پر پرتشدد حملہ کیا اور ان پر لفظی، جذباتی اور جسمانی تشدد کیا۔ ایمبر کی جانب سے الزام لگانے کے بعد ہالی وڈ کا ایک ہائی پروفائل کیس عالمی سطح پر سب کی توجہ کا مرکز بنا ہوا تھا۔
جونی ڈیپ نے 2019 میں ایمبر ہرڈ کے خلاف 50 ملین ڈالرز کا ہتک عزت کا دعویٰ دائر کیا تھا، مقدمے کی سماعت کے بعد ٹرائل جیوری نے 2022 میں 10 ملین ڈالر ہرجانہ اور 5 ملین ڈالر تعزیری نقصانات جونی ڈیپ کو ادا کرنے کا فیصلہ سنایا تھا۔
