ARYNews.tv | Urdu – Har Lamha Bakhabar

Tag: ایمرجنسی لینڈنگ

  • پائلٹ کی موت، طیارے کی ایمرجنسی لینڈنگ

    پائلٹ کی موت، طیارے کی ایمرجنسی لینڈنگ

    جکارتہ: انڈونیشیا میں دوران پرواز پائلٹ کی طبیعت خراب ہونے پر طیارے کی ایمرجنسی لینڈنگ کرنی پڑی، بعد ازاں پائلٹ کی اسپتال میں موت واقع ہوگئی۔

    بین الاقوامی ویب سائٹ کے مطابق انڈونیشیا کی ایئر لائن سٹی لنک کے ایک طیارے کو جمعرات کی صبح مشرقی جاوا ومیں اقع جوانڈا بین الاقوامی ہوائی اڈے پر ایمرجنسی لینڈنگ کرنی پڑی کیونکہ پائلٹ کی طبیعت ٹھیک نہیں تھی۔

    مقامی میڈیا رپورٹ کے مطابق سٹی لنک کے سربراہ دیوا کدیک رائے نے واقعہ کی تصدیق کرتے ہوئے بتایا کہ جس پائلٹ نے طیارہ کی لینڈنگ کی ذمہ داری سنبھالی تھی اس کی قریب کے ایک اسپتال میں داخل ہونے کے بعد موت ہوگئی۔

    دیوا کدیک نے کہا کہ کیو جی 307 پرواز نے ٹیک آف کے تقریباً 15 منٹ بعد ایمرجنسی لینڈنگ کی گزارش کی۔

    مقامی میڈیا کے مطابق سٹی لنک افسران نے مسافروں کو وضاحت پیش کر دی اور انہیں منزل تک پہنچانے کے لیے دوسرے طیارے کا بندوبست کردیا۔

  • امریکی طیارے کو خوف ناک حادثہ، باسکٹ بال ٹیم سوار تھی

    امریکی طیارے کو خوف ناک حادثہ، باسکٹ بال ٹیم سوار تھی

    یوٹاہ: امریکا میں ایک طیارہ پرندوں کا غول ٹکرانے کے باعث خوف ناک حادثے کا شکار ہوتے ہوتے رہ گیا، طیارے میں یوٹاہ جاز باسکٹ بال ٹیم سفر کر رہی تھی۔

    تفصیلات کے مطابق منگل کے روز دوپہر کو ڈیلٹا ایئر لائن کے ایک بوئنگ 757 طیارے کو امریکی ریاست یوٹاہ کے سالٹ لیک سٹی سے پرواز کے فوراً بعد ایمرجنسی لینڈنگ کرنی پڑ گئی۔

    طیارے کے انجن سے پرواز کے فوراً بعد ہی پرندوں کا غول ٹکرایا تھا، جس کے باعث انجن کو شدید نقصان پہنچا، طیارہ یوٹاہ جاز باسکٹ بال کی ٹیم کے لیے چارٹر کیا گیا تھا۔

    ایوی ایشن ذرائع کے مطابق امریکی شہر میمفس کے لیے طیارے نے ٹیک آف کیا ہی تھا کہ چند منٹ کے دوران پائلٹ نے کنٹرول ٹاور سے رابطہ کر کے طیارے کے بائیں جانب کے انجن میں شدید گڑ بڑ کی نشان دہی کی، جس پر پائلٹ کو فوری طور پر جہاز واپس اتارنے کی ہدایت کی گئی۔

    پرندوں کا غول ٹکرانے سے طیارے کو شدید نقصان پہنچا، جب کہ ایک انجن ناکارہ ہو گیا، واقعے کے بعد پائلٹس طیارے کو بہ حفاظت واپس زمین پر اتارنے میں کامیاب ہو گئے تھے۔

    رپورٹس کے مطابق واقعے میں جہاز کے بائیں انجن کی باڈی کئی فٹ تک اکھڑی ہوئی تھی، اس پر خون تھا اور پرندوں کی باقیات انجن کے اندر تک گھس چکی تھیں۔

    طیارے کو گراؤنڈ کر دیا گیا ہے، بتایا گیا کہ واقعے کے وقت طیارہ 7800 فٹ کی بلندی پر اور 230 کلو میٹر فی گھنٹہ کی رفتار پر تھا۔

  • امریکا: طیارے کی ساحل سمندر پر ایمرجنسی لینڈنگ، ویڈیو وائرل

    امریکا: طیارے کی ساحل سمندر پر ایمرجنسی لینڈنگ، ویڈیو وائرل

    امریکا میں چھوٹا طیارہ حادثے کا شکار ہوگیا جس کا پائلٹ معجزاتی طور پر محفوظ رہا، ایوی ایشن حکام نے حادثے کی تحقیقات شروع کردیں۔

    امریکی ریاست فلوریڈا میں حادثے کا شکار یہ طیارہ سیسنا 172 تھا جس نے دوپہر 2 بجے ہالی ووڈ ایئر پورٹ سے اڑان بھری۔ 10 منٹ فضا میں رہنے کے بعد طیارے کو ساحل پر ایمرجنسی لینڈنگ کرنی پڑی۔

    فیڈرل ایوی ایشن ایڈمنسٹریشن کے ترجمان کے مطابق بظاہر جہاز کے انجن میں کوئی خرابی پیدا ہوئی جس کی وجہ سے پائلٹ اسے واپس ایئر پورٹ نہ لے جاسکا اور اسے ساحل پر ایمرجنسی لینڈنگ کرنی پڑی۔

    ساحل پر موجود ایک شخص نے اس کی ویڈیو بھی بنائی، اس کا کہنا تھا کہ زمین کو چھونے کے بعد طیارے کی ناک ریت میں دھنستی ہوئی آگے چلی گئی اور بالآخر وہ رک گیا۔

    حادثے میں پائلٹ معمولی زخمی ہوا جسے فوری طور پر اسپتال منتقل کردیا گیا۔

    فیڈرل ایوی ایشن حادثے کی تحقیقات کر رہی ہے۔

  • شاہی جوڑے کے طیارے کی ایمرجنسی لینڈنگ

    شاہی جوڑے کے طیارے کی ایمرجنسی لینڈنگ

    لاہور: اسلام آباد میں موسم خراب ہونے کے سبب برطانوی شاہی جوڑے کا طیارہ لاہور میں دوبارہ لینڈ کر گیا۔

    تفصیلات کے مطابق ذرائع کا کہنا ہے کہ شاہی جوڑے کا طیارہ موسم کی خرابی کی وجہ سے اسلام آباد نہیں جا سکا، موسم بہتر ہونے کے بعد طیارہ دوبارہ اسلام آباد کے لیے روانہ ہوگا۔

    نمائندہ اے آر وائی نیوز کے مطابق خراب موسم کی وجہ سے شاہی جوڑے کا طیارہ 45 منٹ تک فضا میں چکر لگاتا رہا، کلیئرنس نہ ملنے پر طیارے کو لاہور میں لینڈ کروالیا گیا۔

    ذرائع کا کہنا ہے کہ محکمہ موسمیات نے رات 12 بجے تک موسم خراب رہنے کی پیش گوئی کردی ہے۔

    مزید پڑھیں: آپ نے ہمیں رشتوں کی اہمیت بتادی

    شاہی جوڑے کو لاہور سے اسلام آباد بائے روڈ لے جانے کے آپشن پر بھی غور کیا جارہا ہے تاہم حتمی فیصلہ ابھی نہیں کیا گیا ہے۔

    واضح رہے کہ آج شاہی جوڑے نے لاہور کا دورہ کیا تھا ،انہوں نے گورنر پنجاب چوہدری سرور، وزیراعلیٰ پنجاب عثمان بزدار سے ملاقات کی تھی۔

    شہزادہ ولیم اور شہزادی کیٹ مڈلٹن نے بادشاہی مسجد کا دورہ بھی کیا تھا اور مسجد کے پیش امام سے تلاوت بھی سنی تھی، اس موقع پر شہزادی کیٹ نے سر پر دوپٹا اوڑھ رکھا تھا۔

    شاہی مہمانوں کی نیشنل کرکٹ اکیڈمی لاہور آمد ہوئی تھی جہاں انہوں نے چیئرمین پی سی بی، ایم ڈی پی سی بی اور کرکٹرز سے ملاقات کی تھی اور کرکٹ بھی کھیلی تھی۔

  • وزیر اعظم عمران خان کا طیارہ تکنیکی خرابی کا شکار، نیویارک میں ایمرجنسی لینڈنگ

    وزیر اعظم عمران خان کا طیارہ تکنیکی خرابی کا شکار، نیویارک میں ایمرجنسی لینڈنگ

    نیویارک: وزیر اعظم عمران خان کا طیارہ تکنیکی خرابی کا شکار ہوگیا جس کے باعث طیارے کی دوبارہ نیویارک میں ایمرجنسی لینڈنگ کرنی پڑی، وزیر اعظم آج رات نیویارک میں ہی قیام کریں گے۔

    تفصیلات کے مطابق وزیر اعظم عمران خان نیویارک میں اقوام متحدہ کی جنرل اسمبلی اجلاس سے خطاب کے بعد وطن واپسی کے لیے روانہ ہوئے تو ان کا طیارہ تکنیکی خرابی کا شکار ہوگیا جس کے باعث طیارے کو ٹورنٹو سے واپس موڑنا پڑا۔

    وزیر اعظم کے طیارے نے دوبارہ نیویارک میں لینڈ کیا جس کے بعد وزیر اعظم وفد سمیت امریکی سیکیورٹی اسکواڈ کے ہمراہ روز ویلٹ ہوٹل دوبارہ پہنچ گئے، وزیر اعظم کی آمد کے بعد روز ویلٹ ہوٹل کی سیکیورٹی دوبارہ بڑھا دی گئی۔

    ذرائع کے مطابق طیارے کے نیوی گیشن سسٹم میں خرابی پر طیارے کو ٹورنٹو سے دوبارہ نیویارک کی طرف موڑا گیا اور ایمرجنسی لینڈنگ کرنی پڑی، وزیر اعظم کا طیارہ اس وقت جان ایف کینیڈی ایئرپورٹ پر موجود ہے اور امریکی ایوی ایشن حکام طیارے کا نیوی گیشن سسٹم ٹھیک کر رہے ہیں۔

    ذرائع کا کہنا ہے کہ وزیر اعظم کے طیارے کا دوران پرواز الیکٹرک سسٹم فیل ہوگیا تھا، الیکٹرک سسٹم فیل ہونے سے لینڈنگ میں انتہائی دشواری کا سامنا کرنا پڑا۔

    ابتدا میں طیارے کو جلد ہی اڑانے کا ارادہ ظاہر کیا گیا تاہم سسٹم کی درستگی کا کام وقت لینے لگا تو وزیر اعظم امریکی سیکیورٹی اسکواڈ کے ہمراہ واپس ہوٹل کی جانب روانہ ہوگئے۔

    وزیر اعظم کے معاون خصوصی نعیم الحق نے سماجی رابطے کی ویب سائٹ ٹویٹر پر ٹویٹ کرتے ہوئے بتایا کہ طیارے میں تکنیکی خرابی کے باعث وزیر اعظم آج رات نیویارک کے ہوٹل میں ہی قیام کریں گے۔

    خیال رہے کہ وزیر اعظم گزشتہ کئی روز سے جنرل اسمبلی اجلاس میں شرکت کے لیے نیویارک میں موجود تھے۔ گزشتہ روز انہوں نے جنرل اسمبلی سے اپنا تاریخی خطاب کیا جس میں انہوں نے مقبوضہ کشمیر میں بھارتی بربریت کا پردہ چاک کردیا تھا۔

  • لاہورسے جدہ جانے والی پرواز کی فنی خرابی کی بنا پرایمرجنسی لینڈنگ

    لاہورسے جدہ جانے والی پرواز کی فنی خرابی کی بنا پرایمرجنسی لینڈنگ

    لاہور: جدہ جانے والی پی آئی اے کی پرواز اڑان بھرتے ہی انجن میں فنی خرابی کے سبب تکنیکی بنیادوں پر واپس لینڈ کرگئی ، جہاز میں 130 مسافر سوار تھے۔

    تفصیلات کے مطابق لاہور سے جدہ جانیوالی پرواز پی کے759کے اڑان بھرنے کے کچھ ہی دیر بعد اس کے انجن نمبر1میں فنی خرابی پیدا ہوگئی۔ پی آئی اے کے بوئنگ777طیارے کے کاک پٹ میں فائر الارم بجنا شروع ہوگئے تھے ۔

    ذرائع کا کہنا ہے کہ تکنیکی خرابی کے سبب طیارے کے انجن میں سے دھواں نکلناشروع ہوگیا تھا جس کے بعد کپتان نے حفاظتی اقدامات کے تحت کنٹرول ٹاور سے رابطہ کرتے ہوئے طیارے کو واپس اترنے کی اجازت مانگی۔

    کنٹرول ٹاور نے صورت حال کا اندازہ کرتے ہوئے طیارے کو فی الفور ٹیکنیکل لینڈنگ کی اجازت دی جس پر کپتان نے طیارے کو بحفاظت اتار لیا، طیارے کے ایک انجن کو جزوی طور پر نقصان پہنچا ہے ۔

    پی آئی اے کے ترجمان کے مطابق طیارے میں فنی خرابی کے باعث اسے واپس اتارا گیا۔ مذکورہ پروازمیں 130سے زائد مسافر سوار تھے، پی آئی اے انتظامیہ نے بوئنگ777طیارے کو گراؤ نڈ کردیا گیا ہے اور انجن کی مرمت کا کام شروع کردیا گیا ہے جبکہ مسافروں کو متبادل پرواز کے ذریعے جدہ روانہ کر دیا ہے ۔

  • طیارے کی ساحل پر ایمرجنسی لینڈنگ سے سن باتھ لیتا شخص ہلاک

    طیارے کی ساحل پر ایمرجنسی لینڈنگ سے سن باتھ لیتا شخص ہلاک

    لزبن: پرتگال میں ایک ساحل پر طیارے کی ہنگامی لینڈنگ سے ساحل پر آئے افراد کی تفریح، خوف میں بدل گئی۔ طیارے کی زد میں آکر ایک 8 سالہ بچی اور ایک شخص ہلاک ہوگئے۔

    پرتگال کے دارالحکومت لزبن سے 30 کلومیٹر جنوب میں واقع مشہور کاپریکا بیچ غسل آفتابی کے لیے مقبول ترین مقام ہے جہاں ہزاروں افراد آتے ہیں۔

    حکام کے مطابق طیارے کا بایاں پر معمولی طور پر ٹوٹ گیا تھا جس کے باعث جہاز غیر ہموار ہو کر نیچے آنے لگا۔ عینی شاہدین کا کہنا ہے کہ طیارے کو ساحل پر گرتا دیکھ کر لوگ خوفزدہ ہو کر سمندر کی طرف بھاگے۔

    اس سے قبل یہ کافی دیر تک فضا میں بے ہنگم طریقے سے نچلی پرواز کرتا رہا جس سے وہاں موجود افراد شدید خوف و ہراس میں مبتلا ہوگئے۔

    بعد ازاں طیارے نے کریش لینڈنگ کی جس کی زد میں آکر بچی اور ایک شخص بری طرح زخمی ہوئے۔ بچی اپنے والدین کے ساتھ وہاں موجود تھی جبکہ مذکورہ شخص ساحل پر سن باتھ لے رہا تھا۔

    بعد ازاں دونوں زخمی دم توڑ گئے۔

    مزید پڑھیں: کھٹمنڈو ایئرپورٹ پر تیندوے نے ہلچل مچا دی

    جہاز میں سوار دونوں افراد محفوظ رہے جنہیں پولیس نے فوراً حراست میں لے لیا۔

    اس موقع پر وہاں موجود افراد نے شور مچانا شروع کردیا اور پائلٹ کو گھیرنے کی بھی کوشش کی تاہم پولیس، پائلٹ اور جہاز میں سوار دوسرے شخص کو وہاں سے نکال کر لے گئی۔

    دونوں افراد سے تفتیش کی جارہی ہے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔