Tag: ایمنسٹی اسکیم

لاہور: فیڈرل بورڈ آف ریونیو (ایف بی آر) کے چیئرمین شبیر زیدی نے کہا ہے کہ مستقبل میں پاکستان سے باہر پیسہ لے کر جانا آسان نہیں ہوگا، پاکستان میں آپ کا پیسہ زیادہ محفوظ ہوگا۔

تفصیلات کے مطابق چیئرمین ایف بی آر شبر زیدی نے لاہور میں میڈیا سے گفتگو کرتے ہوئے کہا کہ بے نامی لاء بنایا گیا لیکن ابھی تک اس عمل نہیں کیا گیا، بے نامی اکاؤنٹس کو ختم کرنا چاہتے ہیں۔

شبر زیدی نے کہا کہ ایمنسٹی اسکیم میں آپ کے مسائل کم ہوں گے، ایک بہت عام اور آسان اسکیم متعارف کروائی ہے، ٹیکس پیئرز اور انکم ٹیکس آفیسرز کے درمیان قربت نہیں ہونی چاہئے، میرا مقصد بندے کی بجائے ادارے کو پکڑنا ہے۔

چیئرمین ایف بی آر نے کہا کہ پرانی ایمنسٹی اسکیم کا ذکر کرکے اس اسکیم کو خراب نہ کیا جائے، نان فائلر ایک کرمنل ہے۔

مزید پڑھیں: چند خام مال پر تو ٹیکس چھوٹ دی جا سکتی ہے سب پر نہیں: شبر زیدی

انہوں نے کہا کہ 1992 سے لے کر 2018 تک قانون میں تبدیلی نہیں کی گئی، ان سالوں میں پاکستان کو ٹریڈنگ اسٹیٹ بنا کر چلایا گیا، اس قانون کے تحت بلیک منی کو وائٹ کیا جاتا رہا ہے، ایکسچینج کمپنیوں کو بھی ٹھیک کرنا چاہتے ہیں۔

شبر زیدی نے کہا کہ پاکستانیوں کے بیرون ملک اثاثوں کی تفصیل میرے پاس ہے، اگر کوئی افسر پرانی ایمنسٹی پر تنگ کررہا ہے تو مجھے بتائیں شکایت کا ازالہ کیا جائے گا۔

چیئرمین ایف بی آر نے کہا کہ میں ایمنسٹی اسکیم کو پروموٹ کرنے کے لیے لاہور آیا ہوں، صرف بیکار کی باتیں نہ کی جائیں بہتری کی باتیں کی جائیں، انشاء اللہ پیسہ بھی آئے گا اور ٹیکس سسٹم میں ریفارمز بھی ہوں گے۔

اسلام آباد: فیڈرل بورڈ آف ریونیو (ایف بی آر) کے چیئرمین شبر زیدی نے کہا ہے کہ حکومت کی جانب سے ایمنسٹی اسکیم متعارف نہیں کرائی گئی بلکہ یہ اثاثے ظاہر کرنے کا قانون ہے۔

اے آر وائی نیوز کے پروگرام آف دی ریکارڈ میں میزبان کاشف عباسی کے ہمراہ گفتگو کرتے ہوئے شبر زیدی کا کہنا تھا کہ بے نامی ایکٹ 2017 کو لوگ نظر انداز کررہے ہیں، 2018 میں جو ایمنسٹی اسکیم متعارف کرائی گئی اُس میں بے نامی ایکٹ کو نافذ نہیں کیا گیا تھا۔

اُن کا کہنا تھا کہ بے نامی اثاثے جرم ہیں جس کے لیے 2017 میں قانون نافذ ہوچکا، گزشتہ حکومت کی ایمنسٹی اسکیم سے پہلے ہی بے نامی ایکٹ آچکا تھا مگر اُسے گزشتہ اسکیم میں شامل نہیں کیا گیا۔

مزید پڑھیں: اسکیم کا مقصد ریونیو جمع کرنا نہیں معیشت کی بہتری ہے: مشیر خزانہ

چیئرمین ایف بی آر کا کہنا تھا کہ قانون کا مقصد ہےبےنامی اثاثوں کو قانونی شکل میں لانا ہے کیونکہ 2017 سے پہلے اس طرح کے اثاثے جائز قرار دیے گئے تھے، بے نامی ایکٹ متعارف تو کرایا گیا مگر اس پر عمل درآمد نہیں ہوا، موجودہ حکومت نے ہی آکر اس قانون پر عملدرآمد شروع کیا۔ اُن کا مزید کہنا تھا کہ 40فیصد بینک اکاؤنٹس ٹیکس نیٹ میں نہیں جنہیں نیٹ میں لانا بہت ضروری ہے۔

یاد رہے کہ آج وفاقی کابینہ نے اثاثے ظاہر کرنے کے حوالے سے متعارف کرائی جانے والی اسکیم کی منظوری دی جس کے بعد مشیر خزانہ عبدالحفیظ شیخ نے میڈیا سے گفتگو کرتے ہوئے بتایا کہ بے نامی پراپرٹی وائٹ نہیں کی جاتی تو قانون کے تحت ضبط کی جا سکے گی۔ ریونیو جمع کرنے کے لیے نہیں معیشت کی بہتری کے لیے اسکیم کی منظوری دی گئی۔

اسلام آباد: مشیر خزانہ عبد الحفیظ شیخ نے فیڈرل بورڈ آف ریونیو کو ہدایت کی ہے کہ اثاثہ جات ظاہر کرنے کی اسکیم ٹیکس ایمنسٹی کو آسان کر کے قابل عمل بنائی جائے۔

تفصیلات کے مطابق اسلام آباد میں مشیر خزانہ عبد الحفیظ شیخ کی زیر صدارت اجلاس منعقد ہوا، جس میں ٹیکس ایمنسٹی اسکیم 2019 کا جائزہ لیا گیا، مشیر خزانہ نے ایف بی آر کو اثاثہ جات ظاہر کرنے کی اسکیم کو مزید سہل بنانے کی ہدایت کی۔

حفیظ شیخ نے یہ ہدایات اتوار کے روز اسلام آباد میں ایف بی آر کے عہدے داروں کے ساتھ اسکیم کا تفصیلی جائزہ لیتے ہوئے دیں، اجلاس میں ٹیکس ایمنسٹی اسکیم کے طریقہ کار اور دائرہ کار پر غور کیا گیا۔

مشیر خزانہ نے اس بات پر بھی زور دیا کہ اسکیم کا مقصد ٹیکس پر معیشت کا انحصار بڑھانا اور اسے دستاویزی شکل دینا ہے، گفتگو میں اسکیم کے امکان اور خصوصیات پر توجہ مرکوز کی گئی۔

یہ بھی پڑھیں:  وزیر اعظم نے حفیظ شیخ اور معاشی ٹیم کو ٹارگٹس دے دیے

اجلاس سے خطاب کرتے ہوئے مشیر خزانہ نے کہا کہ مجوزہ اسکیم کو اس لیے آسان بنایا جائے تاکہ اسے سمجھ کر زیادہ سے زیادہ افراد فائدہ اٹھا سکیں۔

ان کا کہنا تھا کہ ایمنسٹی اسکیم کا مقصد زیادہ سے زیادہ لوگوں کو ٹیکس نیٹ میں لانا ہے تاکہ ٹیکس دہندگان کو سہولت ملے اور معیشت کو دستاویزی شکل دی جا سکے۔