Tag: ایمیزون

اسپیس ایکس کا مقابلہ، ایمیزون نے خلائی مارکیٹ میں قدم رکھ دیا

اسپیس ایکس کا مقابلہ کرنے کیلئے ایمیزون نے اپنا پہلا انٹرنیٹ سیٹلائٹ لانچ کرتے ہوئے خلائی مارکیٹ میں قدم رکھ دیا۔

ایمیزون نے اپنا پہلا انٹرنیٹ سیٹلائٹ لانچ کرتے ہوئے خلائی مارکیٹ میں قدم رکھ دیا، جہاں ایلون مسک کی اسپیس کمپنی غلبہ رکھتی ہے۔

ایمیزون نے فلوریڈا سے اپنے پہلے 27 سیٹلائٹس خلا میں روانہ کر کے اپنے انٹرنیٹ فرام اسپیس منصوبے ’پروجیکٹ کوئپر براڈ بینڈ انٹرنیٹ‘ کا باقاعدہ آغاز کر دیا۔

پروجیکٹ کوئپر ایمیزون کا ایک 10 ارب ڈالر کا بڑا منصوبہ ہے، جس کا اعلان 2019 میں کیا گیا تھا۔ اس منصوبے کے تحت دنیا بھر میں صارفین، کاروباری اداروں اور حکومتی اداروں کو سیٹلائٹ کے ذریعے براڈ بینڈ انٹرنیٹ فراہم کیا جائے گا۔

رپورٹ کے مطابق ایمیزون کا مقصد ہے دنیا میں تیز رفتار اور سستی انٹرنیٹ سروس فراہم کرنے کیلئے تین ہزار دو سو سے زائد سیٹلائٹس کو مدار میں بھیجے گا۔

اسپیس ایکس نے اس سیٹلائیٹ میں دوبارہ قابل استعمال ایندھن کے بوسٹر کو استعمال کیا، اسپیس ایکس کے 7ہزار سے زائد اسٹار لنکس اب بھی مدار کے اندر موجود ہیں جبکہ یورپ کی کمپنی ون ویب کے سیکڑوں سیارے اس مدار سے بھی اوپر ہیں۔

مئی 2, 2025
ایمیزون کے پارسل سے کوبرا نکل آیا، ویڈیو وائرل

بھارت کے شہر بنگلورو میں میاں بیوی اس وقت حیران رہ گئے جب انہیں اپنے ایمیزون پیکیج کے ساتھ زہریلا کوبرا بھی پارسل میں بھیج دیا گیا۔

غیر ملکی ذرائع ابلاغ کے مطابق مذکورہ جوڑے نے آن لائن ریٹیل کمپنی سے ایکس بکس کنٹرولر کا آرڈر دیا تھا لیکن جب انہوں نے اپنا آرڈر موصول کیا تو اس باکس کی پیکنگ کے لیے استعمال ہونے والی ٹیپ سے ایک کوبرا چپکا ہوا تھا۔

میاں بیوی نے پارسل سے چپکے پوئے کوبرا کا ایک ویڈیو بنایا جو سوشل میڈیا پر وائرل ہوگیا، ویڈیو کے وائرل ہوتے ہی ایمیزون انڈیا حرکت میں آگیا۔ کمپنی کے ترجمان نے بتایا کہ ہم اس معاملے کی تحقیقات کررہے ہیں۔

ایمیزون کے ترجمان کا کہنا تھا کہ ہمارے صارفین، ملازمین اور ساتھیوں کی حفاظت ہمارے لیے سب سے اہم ہے، ہم صارفین کی تمام شکایات کو سنجیدگی سے لیتے ہیں۔ اور اس واقعہ کی تحقیقات کا آغاز کردیا گیا ہے۔

جوڑے کا اپنے بیان میں کہنا تھا کہ اس پیکج کو ڈیلیوری پارٹنر نے ان کے ہاتھوں میں تھمایا تھا نہ کہ اسے گھر کے باہر چھوڑا گیا تھا۔ انہوں نے ایک بیان میں دعویٰ کیا کہ پورا واقعہ کیمرے میں نظر بند ہے، جبکہ عینی شاہد بھی موجود ہیں۔

سوئی ہوئی خاتون کے بالوں میں سانپ رینگنے لگا، ویڈیو وائرل

متاثرہ جوڑے نے کہا کہ یہ سکیورٹی کی واضح طور پر خلاف ورزی ہے۔ جو ایمیزون کی لاپرواہی اور ان کی ناقص نقل و حمل/گودام کے حالات اور نگرانی کو ظاہر کرتا ہے۔

جون 19, 2024
ایمیزون کے سینئر مینیجر کا دہلی میں قتل

نئی دہلی: بھارت کے دارالحکومت کے علاقے میں نامعلوم حملہ آروں نے ایمیزون کے ایک سینئر مینیجر کو قتل کردیا۔

بھارتی میڈیا رپورٹس کے مطابق ایمیزون کے ایک سینئر مینیجر کو دہلی کے بھجن پورہ علاقے میں نامعلوم حملہ آوروں نے گولی مار کر ہلاک کر دیا، فائرنگ میں ایک اور شخص زخمی بھی ہوا۔

بھارتی حکام کا کہنا ہے کہ مرنے والے کی شناخت ہرپریت گل ایمیزون کے سینئر مینجر کے طور پر ہوئی ہے جبکہ زخمی گووند سنگھ کا اسپتال میں علاج جاری ہے۔

رپورٹ کے مطابق ہرپریت اور گوند اپنی بائیک پر بھجن پورہ علاقے سے گزر رہے تھے کہ اچانک اسکوٹی اور بائیک پر سوار 5 حملہ آورں نے روک لیا اور بلا اشتعال فائرنگ کرکے موقع سے فرار ہوگئے۔

رپورٹ میں بتایا گیا کہ ایمیزون میں سینئر مینیجر کے طور پر کام کرنے والے ہرپریت کے سر میں گولی لگی اور اسے جگ پرویش چندر اسپتال میں مردہ قرار دے دیا گیا۔

مقامی پولیس کا کہنا ہے کہ ملزمان کی شناخت اور ان کو پکڑنے کے لیے علاقے میں سی سی ٹی وی کی جانچ کی جا رہی ہے، فائرنگ کے واقعے کے پیچھے محرکات کا پتہ لگایا جا رہا ہے جبکہ قتل کا مقدمہ درج بھی کر لیا گیا ہے۔

اگست 30, 2023
جیف بیزوس نے منگنی کر لی

ایمیزون کے بانی جیف بیزوس نے امریکی صحافی لورین سانچیز نے منگنی کر لی۔

جیف بیزوس کے قریبی ذرائع نے غیر ملکی میڈیا کو بتایا کہ جیف بیزوس اور لورین سانچیز کی منگنی ہو گئی ہے، 59 سالہ جیف بیزوس اور 53 سالہ صحافی لورین نے جنوری 2019 میں اپنے تعلق کا اعلان کیا تھا۔

دونوں کا تعلق اس وقت جڑا تھا جب بیزوس نے اپنی 25 سالہ شریک حیات کو طلاق دی تھی، اور لورین نے اپنی 13 سالہ شادی ختم کر دی تھی، پچھلے چند برسوں میں بیزوس اور لورین کو متعدد مواقع پر ایک ساتھ دیکھا گیا۔

بیزوس اور لورین کب شادی کے بندھن میں بندھیں گے، اس حوالے سے ابھی کوئی تفصیلات سامنے نہیں آئی ہیں۔ جب سے دونوں میں تعلقات استوار ہوئے ہیں تب سے انھوں نے مختلف تقریبات میں تصویر کھنچوانے کے علاوہ اپنی نجی زندگی کی تفصیلات کی تشہیر نہیں ہونے دی۔

2022 میں دونوں نے سی این این کو پہلا مشترکہ انٹرویو دیا تھا، جس میں انھوں نے بیزوف کی بے پناہ دولت کو خیراتی کاموں میں خرچ کرنے سے متعلق کھل کر گفتگو کی تھی۔

بیزوس نے ایمی ایوارڈ یافتہ صحافی لورین سانچیز کے بارے میں کہا کہ وہ بہت زیادہ فیاض اور بڑے دل والی خاتون ہیں، اور یہ کہ وہ ان سے متاثر ہوئے ہیں۔

مئی 23, 2023
سعودی عرب: ایمیزون کی جانب سے ملازمتوں کے مواقع

ریاض: دنیا کی بڑی ای کامرس کمپنی ایمیزون نے سعودی خواتین کے لیے ملازمت کے مواقع فراہم کر دیے ہیں۔

تفصیلات کے مطابق ہفتے کو ایمیزون کمپنی کی جانب سے جاری ایک بیان میں کہا گیا ہے کہ سعودی خواتین کے لیے لاجسٹکس اور ڈیلیوری انڈسٹریز میں ملازمت کے مواقع پیدا کرنے کے لیے ایک پروگرام کا آغاز کیا گیا ہے۔

یہ پروگرام گزشتہ برس ریاض، جدہ، ابہا اور دمام میں شروع کیا گیا تھا، رواں سال یہ پروگرام جازان، قصیم، مکہ، مدینہ اور ھفوف میں شروع کیا جا رہا ہے، اس سے خواتین میں لاجسٹک صنعت میں کام کرنے کے لیے خاصی دل چسپی پیدا ہوئی ہے۔

عرب نیوز کے مطابق ایمیزون کے مشرق وسطیٰ اور شمالی افریقا آپریشنز کے ڈائریکٹر پرشانت سرن نے کہا کہ یہ پروگرام خواتین کے لیے مزید جامع اور مساوی ماحول پیدا کرنے کی جانب ایک اور قدم ہے، جو سعودی عرب کی قومی تبدیلی کے سفر کے ساتھ ہم آہنگ ہے۔

ایلون مسک نے ایمیزون کے مالک کو ایک بار پھر شکست دے دی

انھوں نے کہا ہمیں سعودی عرب میں باصلاحیت خواتین کو مستقبل کے اس شعبے میں مواقع فراہم کرنے اور ملک بھر میں مقامی کاروباری اداروں کے ساتھ شراکت داری پر فخر ہے۔

ایمیزون کی جانب سے کہا گیا ہے کہ سعودی خواتین کو ہنر اور ٹیکنالوجی کی تربیت دی جائے گی، جو مناسب لاجسٹکس اور ڈیلیوری کے کردار میں کامیاب ہونے کے لیے درکار ہے۔

سعودی خواتین کے روٹس میں یونیورسٹیوں، اسپتالوں، کمپاؤنڈز اور اسکولوں تک ڈیلیوری شامل ہوگی، اور ان کی انفرادی ضروریات کو مدنظر رکھ کر شفٹوں کے لیے کام کے اوقات میں اضافی لچک رکھی جائے گی۔

مارچ 14, 2022
ایلون مسک نے ایمیزون کے مالک کو ایک بار پھر شکست دے دی

اسپیکس ایکس اور ٹیسلا موٹرز جیسی کمپنیوں‌ کے مالک ایلون مسک نے ایک بار پھر ایمیزون کے مالک جیف بیزوس کو شکست دے کر امیر ترین شخص ہونے کا اعزاز چھین لیا۔

ایلون مسک کی دولت کی مجموعی مالیت 230 بلین ڈالر تک پہنچ گئی ہے، جس کے بعد وہ ایمیزون کے مالک جیف بیزوس کو ایک بار پھر ہرانے میں کامیاب ہو گئے ہیں، مسک کی دولت اب بل گیٹس اور وارن بفٹ دونوں کی دولت سے بھی زیادہ ہو گئی ہے۔

ایلون مسک گزشتہ سال کے وسط میں فوربز کی ٹاپ ٹین بلینئرز کی فہرست میں شامل ہوئے تھے، لیکن اب وہ اس پر راج کر رہے ہیں، اور بیزوس دوسرے نمبر پر چلے گئے ہیں۔

ایلون مسک نے اس فتح کی خوشی ایک شریر ایموجی ٹوئٹ کرتے ہوئے منائی، انھوں نے جیف بیزوس کی ایک ٹوئٹ پر دوسرے نمبر کا میڈل ٹوئٹ کیا، یہ بتانے کے لیے ان کا حریف اس بار دوسرے نمبر پر آیا ہے۔

ڈیلی میل کے مطابق اسپیس ایکس نے 8 اکتوبر کو 100 بلین ڈالر کے شئیرز فروخت کیے تھے، جس سے کمپنی کی دولت میں ایک دم اضافہ ہوا، شیئرز کی قیمت میں 33 فی صد اضافے نے کمپنی کے حصص کو 100 اعشاریہ 3 بلین تک پہنچا دیا جو فروری میں 74 بلین ڈالرز پر تھی۔

واضح رہے کہ ایمیزون اور بلیو اوریجن کے بانی جیف بیزوس اس وقت 197 بلین ڈالرز کی مالیت کے ساتھ دنیا کے دوسرے امیر ترین شخص ہیں۔

اکتوبر 18, 2021
لارڈ آف دی رنگز ٹی وی شو کی صورت میں پیش کیا جائے گا

مشہور فلم سیریز لارڈ آف دی رنگز ٹی وی شو کی صورت میں اگلے برس ستمبر میں پیش کیا جائے گا، یہ ٹی وی شو اسٹریمنگ پلیٹ فارم ایمیزون پر پیش کیا جائے گا۔

بین الاقوامی ویب سائٹ کے مطابق ایمیزون کی اربوں ڈالر لاگت سے تیار ہونے وال سیریز دی لارڈ آف دی رنگز کا ٹی وی ورژن ستمبر 2022 میں شروع ہوگا۔

اسٹریمنگ پلیٹ فارم ایمیزون نے کہا ہے کہ نیوزی لینڈ میں پہلے سیزن کی شوٹنگ مکمل ہوچکی ہے اور پلیٹ فارم کی جانب سے شو کی کچھ تصاویر بھی ریلیز کی گئی ہیں۔

ایمیزون اسٹوڈیوز کی سربراہ جینییفر سالک نے ایک بیان میں کہا کہ یہ سفر 2 ستمبر 2022 کو ہماری اصل دی لارڈ آف دی رنگز سیریز کے پریمیئر کے ساتھ شروع ہورہا ہے۔

نیوزی لینڈ کے سرکاری عہدیداران کے مطابق ایمیزون شو کے پہلے سیزن کی شوٹنگ پر تقریباً 46 کروڑ 50 لاکھ ڈالر خرچ کر رہا ہے۔ ان کے مطابق ایمیزون شو کے 5 سیزنز بنانے کی توقع کررہا ہے، جس کے بعد یہ اب تک کی سب سے مہنگی ٹی وی سیریز بن جائے گی۔

ایمیزون کی جانب سے ایک پریس ریلیز میں کہا گیا کہ پہلا سیزن 240 سے زائد ممالک میں دستیاب ہوگا، جس کی نئی اقساط ہفتہ وار ریلیز ہوں گی۔

اس سیریز کا پلاٹ مصنف جے آر آر کی کتابوں دی ہوبٹ اور دی لارڈ آف دی رنگز میں بیان کردہ ہزاروں سال قدیم واقعات سے متعلق تصوراتی دنیا پر مبنی ہے۔

اگست 4, 2021
کیا آپ درختوں پرجھولتے ان اسمارٹ فونز کی کہانی جانتے ہیں؟

شکاگو: درختوں پر جھولتے اسمارٹ فونز کے پیچھے بہت دلچسپ وجہ ہے اور وہ ہے کہ زیادہ سے زیادہ کام اپنے لیے حاصل کرنا۔

امریکی ادارے بلومبرگ کی رپورٹ کے مطابق ای کامرس کمپنی ایمیزون کے لیے کام کرنے والے ڈرائیوروں نے دوسروں کے مقابلے میں زیادہ آرڈر حاصل کرنے کے لیے دلچسپ طریقہ ڈھونڈ لیا ہے۔

شکاگو کے نواح میں‌ ایمیزون کےڈیلیوری اسٹیشنز اور ہول فوڈ اسٹورز کے باہر ان درختوں پر ڈیلیوری ڈرائیور اسمارٹ فون لٹکا دیے ہیں تاکہ صارفین کے زیادہ سے زیادہ آرڈر حاصل کر کے آمدنی میں اضافہ کیا جاسکے۔

ڈرائیوروں نے درختوں پر یہ فون لٹکا کر انہیں اپنے پاس موجود فونز سے منسلک کر دیا ہے تاکہ دیگر کے مقابلے میں انہیں سبقت حاصل ہوسکے۔

رپورٹ کے مطابق درختوں پر لٹکے یہ فون ایمیزون کے سسٹم سے بھی جڑے ہیں اور ڈرائیور چاہے وہاں سے میلوں دور ہی کیوں نہ ہو، سسٹم کو ایسا ہی محسوس ہوتا ہے کہ وہ قریب موجود ہے۔

امریکی ادارے کی رپورٹ کے مطابق ابھی یہ واضح نہیں کہ کتنے لوگ اس طریقے کو استعمال کر رہے ہیں مگر اس سے اندازہ ہوتا کہ آمدنی میں کمی کی وجہ سے لوگ کس طرح جارحانہ انداز سے دوسروں سے مقابلہ کر رہے ہیں۔

ایمیزوں کے ڈرائیوروں کو فی گھنٹہ 15 سے 18 ڈالرز ملتے ہیں جبکہ ایندھن اور گاڑی کی مرمت کے اخراجات بھی نہیں دیے جاتے۔

واضح رہے کہ عام طور پر ایمیزون کے آرڈر بک کرنے والا الگورتھم ایسے ڈرائیوروں کو ترجیح دیتا ہے جو ویئر ہاؤس کے قریب ہوں اور ایسے افراد کو پہلے ڈیلیوری کا موقع فراہم کیا جاتا ہے۔

ستمبر 6, 2020
دنیا کے امیر ترین شخص نے 10 ارب ڈالرز کس مقصد کے لیے عطیہ کیے؟

دنیا کے امیر ترین شخص اور ای کامرس کمپنی ایمیزون کے مالک جیف بیزوس نے موسمیاتی تغیرات یعنی کلائمٹ چینج سے نمٹنے کے اقدامات کے لیے 10 ارب ڈالرز عطیہ کرنے کا اعلان کردیا۔

سماجی رابطے کی ویب سائٹ انسٹاگرام پر پوسٹ کرتے ہوئے جیف بیزوس کا کہنا تھا کہ وہ بیزوس ارتھ فنڈ کا اجرا کر رہے ہیں۔

View this post on Instagram

Today, I’m thrilled to announce I am launching the Bezos Earth Fund.⁣⁣⁣ ⁣⁣⁣ Climate change is the biggest threat to our planet. I want to work alongside others both to amplify known ways and to explore new ways of fighting the devastating impact of climate change on this planet we all share. This global initiative will fund scientists, activists, NGOs — any effort that offers a real possibility to help preserve and protect the natural world. We can save Earth. It’s going to take collective action from big companies, small companies, nation states, global organizations, and individuals. ⁣⁣⁣ ⁣⁣⁣ I’m committing $10 billion to start and will begin issuing grants this summer. Earth is the one thing we all have in common — let’s protect it, together.⁣⁣⁣ ⁣⁣⁣ – Jeff

A post shared by Jeff Bezos (@jeffbezos) on Feb 17, 2020 at 10:00am PST

انہوں نے کہا کہ ان کی فاؤنڈیشن سائنس دانوں، ماحولیاتی کارکنوں، غیر سرکاری تنظیموں اور کوئی بھی ایسی کوشش جس سے دنیا کے قدرتی ماحول کو تحفظ دیا جا سکے، کی مالی امداد کرے گی۔

بیزوس کا کہنا تھا کہ ماحولیاتی تبدیلیاں ہمارے سیارے کے لیے سب سے بڑا خطرہ ہیں۔ میں ماحولیاتی تبدیلیوں کے تباہ کن اثرات کا مقابلہ کرنے کے لیے نئے طریقوں کی تلاش میں لوگوں کے ساتھ مل کر کام کرنا چاہتا ہوں۔

ایک امریکی اخبار کے مطابق اپنی دولت میں سے 10 ارب ڈالر عطیہ کردینے کے باوجود جیف بیزوس دنیا کے امیر ترین انسان ہی رہیں گے۔

گزشتہ برس ان کے اثاثوں کی مالیت میں ایک ارب 120 کروڑ ڈالر کی کمی ہوئی تھی جبکہ مائیکرو سافٹ کے بانی بل گیٹس کے اثاثے 12 کروڑ 90 لاکھ ڈالر بڑھ گئے۔ اس کے باوجود جیف بیزوس دنیا کے امیر ترین افراد میں سرفہرست ہیں۔

فروری 19, 2020
ایمیزون کے جنگلات میں مزید سیکڑوں مقامات پر آگ بھڑک اٹھی

براسیلیا : برازیل کے شمالی حصے میں واقع وسیع و عریض ایمیزون کے جنگلات میں سیکڑوں مقامات پر نئی آگ بھڑک اٹھی ہے۔

تفصیلات کے مطابق برازیل کے صدر جیئر بولسونارو پر دہائی کی شدید ترین آگ بجھانے کے لیے عالمی دباؤ بڑھ گیا،اس حوالے سے بتایا گیا کہ ایمیزون میں لگنے والی آگ کے باعث برازیل کے علاوہ دیگر شمالی ریاستوں سمیت رونڈونیا اور آکرے بھی متاثر ہورہے ہیں۔

ایک مقامی شخص نے بتایا کہ میں جنگل میں لگنے والی آگ سے ماحول اور صحت کو پہچنے والے نقصان پر پریشان ہوں، میری ایک بیٹی ہے جسے سانس لینے میں دشواری ہے اور آگ سے اس کی تکلیف میں اضافہ ہوگیا ہے۔

دوسری جانب دنیا کے سب سے بڑے بارانی جنگل میں آتشزدگی پر عالمی دنیا چیخ اٹھی ہے اور فرانس میں جی 7 کے اجلاس میں یہ اہم موضوع زیر بحث آیا۔

سرکاری اعداد و شمار کے مطابق گزشتہ برس برازیل کے جنگل میں 78 ہزار 383 مرتبہ آگ لگنے کے واقعات پیش آئے جو 2013 کے بعد سے سب سے زیادہ ہیں۔

رپورٹس کے مطابق برازیل کے جنگلات میں 72 ہزار سے زائد مرتبہ آگ لگ چکی ہے اور گزشتہ برس کے مقابلے ان واقعات میں 84 فیصد اضافہ دیکھنے میں آیا ہے۔

برازیل کی نیشنل انسٹیٹوٹ فار اسپیس ریسرچ (این آئی پی ای) کے مطابق نصف آگ ایمیزون کے جنگل میں لگی، جہاں تقریباً 2 کروڑ آبادی رہائش پذیر ہے۔

آگ سے متعلق نئے اعداد وشمار کے بعد برازیل کے صدر جیئر بولسونارو نے عسکری قیادت کو آتشزدگی سے نمٹنے اور خطے میں مجرمانہ کارروائیوں کے خاتمے کی اجازت دے دی۔

دوسری جانب امریکا کے صدر ڈونلڈ ٹرمپ اور برطانیہ کے وزیراعظم بورس جونسن نے جی 7 سمٹ میں ایمیزون کے جنگل میں لگنے والی آگ بجھانے کے لیے اپنی خدمات پیش کردیں۔

برازیل کے وزیر دفاع نے امریکا اور برطانیہ کی جانب سے آگ بجھانے کی پیشکش پر کہا کہ تعاون پر خوش آمدید کہیں گے۔

واضح رہے کہ زمین کی 20 فیصد آکسیجن صرف ایمیزون کے جنگلات میں موجود درخت اور پودے پیدا کرتے ہیں، یہی وجہ ہے کہ ان جنگلات میں لگی آگ پوری دنیا کے لیے پریشانی کا باعث ہے۔

اگست 25, 2019