آج سدا بہار فلمی گیتوں کے لیے سریلی دھنیں تخلیق کرنے والے ایم اشرف کی برسی منائی جارہی ہے۔ ‘تیرا سایہ جہاں بھی ہو سجنا پلکیں بچھا دوں….ساری عمر بتا دوں۔ یہ مقبول ترین گیت آپ نے بھی سنا ہو گا، اس کی موسیقی ایم اشرف ہی نے ترتیب دی تھی۔
پاکستانی موسیقار ایم اشرف 4 فروری 2007ء کو وفات پاگئے تھے۔ انھوں نے پاکستانی فلم انڈسٹری کے لیے کئی گیتوں کی موسیقی ترتیب دی جو آج بھی سماعتوں میں رس گھول رہے ہیں۔
یکم فروری 1938ء کو پیدا ہونے والے ایم اشرف نے موسیقار اختر حسین سے فنِ موسیقی کی تربیت حاصل کی اور اپنی محنت اور لگن کے سبب فلم نگری تک پہنچے جہاں انھوں نے اپنے دور کے دیگر موسیقاروں کے درمیان اپنی جگہ بنائی۔ ایم اشرف مشہور موسیقار ماسٹر عنایت اور ماسٹر عبداللہ کے بھانجے تھے۔ یوں ہم کہہ سکتے ہیں کہ وہ ایک فن کار گھرانے کے فرد تھے اور یہی وجہ ہے کہ انھیں شروع ہی سے ساز اور سُر کا شوق تھا اور اسی فنِ موسیقی کو اپنا کر فلم انڈسٹری میں نام بنایا۔
بطور میوزک ڈائریکٹر ایم اشرف نے شباب کیرانوی کی فلم سپیرن سے اپنے سفر کا آغاز کیا تھا۔ وہ چار دہائیوں سے زائد عرصے تک اردو اور پنجابی فلموں کے لیے دھنیں تخلیق کرتے رہے۔ ایم اشرف نے اپنے کیریئر میں 400 سے زائد فلموں کی موسیقی ترتیب دی اور لگ بھگ 2800 فلمی گانے کمپوز کیے۔ ان کی بدولت متعدد گلوکار بھی فلم انڈسٹری میں متعارف ہوئے جن میں ناہید اختر، نیرّہ نور، رجب علی اور دیگر شامل ہیں۔ ایم اشرف 1960ء سے 70ء تک دو عشرے انڈسٹری میں مصروف رہے۔
یہ دنیا رہے نہ رہے میرے ہمدم، ہمارے دل سے مت کھیلو کھلونا ٹوٹ جائے گا، جیسے کئی گیتوں کو ان کی موسیقی نے لازوال بنا دیا اور وہ بہت مقبول ہوئے۔ پاکستان کے اس باصلاحیت موسیقار کو کئی ایوارڈز سے نوازا گیا۔ ملکۂ ترنّم نور جہاں اور مہدی حسن سے لے کر طاہرہ سیّد، رجب علی، اخلاق احمد، نیّرہ نور اور کئی نام ور گلوکاروں نے ان کی مرتب کردہ دھنوں میں گیت گائے۔ ایم اشرف نے مجموعی طور پر 13 فلموں کے لیے بہترین موسیقار کا نگار ایوارڈ اپنے نام کیا جو ایک ریکارڈ ہے۔
