کراچی: صوبائی وزیر صنعت و تجارت نے ایم ڈی سائٹ کو صنعتی فضلے سے متعلق ہدایت کی ہے کہ وہ اسے محفوظ طریقے سے ٹھکانے لگانے کے لیے اقدامات کریں۔
تفصیلات کے مطابق صوبائی وزیر برائے صنعت و تجارت جام اکرام اللہ دھاریجو نے صنعتی فضلے کو نالوں اور غیر محفوظ طریقے سے ٹھکانے لگانے کی خبروں کا نوٹس لے لیا ہے۔
صوبائی وزیر نے ہدایت کی ہے کہ فیکٹری کے مالکان صنعتی فضلے کو محفوظ طریقے سے ٹھکانے لگائیں، صنعتی فضلے کو غیر محفوظ طریقے سے ٹھکانے لگانے سے ماحولیاتی آلودگی میں اضافہ ہو رہا ہے، اس عمل سے بیماریاں بھی جنم لے رہی ہیں۔
انھوں نے ایم ڈی سائٹ کو ہدایت کی ہے کہ صنعتی فضلے کو محفوظ طریقے سے ٹھکانے لگانے کے لیے فیکٹری مالکان کو پابند کریں، اور قانون کی خلاف ورزی کرنے والوں کے خلاف بلا امتیاز کارروائی کی جائے گی۔
واضح رہے کہ سائٹ ایریا میں صنعتی یونٹوں سے فضلہ غیر محفوظ طریقے سے نالیوں میں بہایا جا رہا ہے، جس سے آئے دن سائٹ میں کیمیکل ملا پانی سڑکوں پر بھی بہنے لگتا ہے۔