لندن : متحدہ قومی موومنٹ لندن  نے پاکستان میں تنظیمی امور چلانے کے لیے سینئر خواتین اراکین پر مشتمل پانچ رکنی عارضی رابطہ کمیٹی کا اعلان کردیا،نئی عبوری کمیٹی کا اعلان سابقہ اراکین رابطہ کمیٹی کی گرفتاری کے بعد کیا گیا۔

ایم کیو ایم شعبہ اطلاعات کی جانب سے جاری اعلامیہ کے مطابق پانچ رکنی عارضی رابط کمیٹی کی انچارج ریحانہ نسرین ایڈوکیٹ، اور جوائنٹ انچارج مختارا حیدر ہوں گی جب کہ عارضی رابطہ کمیٹی کے اراکین میں ثروت اسرار ایڈوکیٹ، شرمین قزالباش، اور بتول حیدر شامل ہیں۔

یہ پڑھیے : متحدہ لندن قیادت نے نئی رابطہ کمیٹی کا اعلان کردیا

اپنے بیان میں ایم کیو ایم لندن رابطہ کمیٹی نے کہا کہ گزشتہ ماہ اعلان کی گئی عبوری رابطہ کمیٹی کے اراکین ڈاکٹر حسن ظفر عارف،کنور خالد یونس،مومن خان مومن اور امجد اللہ خان کو بلاجواز بدترین ریاستی مظالم کا نشانہ بناکر جیلوں میں قید کردیا گیا ہے،جب کہ ساتھی اسحاق ،اکرم راجپوت،اسماعیل ستارہ،ادریس علوی اور اشرف نور کے گھروں پر چھاپے مارے جا رہے ہیں اورعدم دستیابی پر اہل خانہ کو ہراساں اور گرفتار کیا جا رہا ہے۔

 یہ بھی پڑھیے : متحدہ لندن کے رہنما حسن ظفر اور کنور خالد پریس کلب سے زیر حراست

ان تمام صورت حال کے بعد ایم کیو ایم لندن کی جانب سے تنظیم امور چلانے کے لیے ایم کیو ایم کی تین خاتون وکلاء سمیت 5 سینیئر خاتون اراکین پر مشتمل عارضی رابطہ کمیٹی کا اعلان کیا گیا ہے۔

رابطہ کمیٹی لندن نے کہا کہ تمام تر مصائب و مشکلات کے باوجود قائد تحریک کی قیادت میں جدوجہد جاری رکھیں گے اور کسی قسم کی قربانی سے دریغ کریں گے نہ ہی کسی کی دھمکی اور دھونس میں آئیں گے۔

رابطہ کمیٹی لندن کے مطابق بانی ایم کیو ایم نے رابطہ کمیٹی کے فیصلے کی توثیق کردی ہے جب کہ عارضی رابطہ کمیٹی میں مزید اراکین کے اضافہ کا فیصلہ بعد میں کیا جائے گا۔

کراچی : متحدہ قومی موومنٹ لندن کے رہنما ساتھی اسحاق ایڈووکیٹ کی اہلیہ نے اپنے شوہر کو قانون نافذ کرنے والے اداروں کی جانب سے ہراساں کرنے پر سندھ ہائی کورٹ سے رجوع کرلیا۔

تفصیلات کے مطابق سندھ ہائیکورٹ میں متحدہ قومی موومنٹ لندن کے رہنما ساتھی اسحاق ایڈووکیٹ کو ہراساں کرنے سے متعلق ساتھی اسحاق کی اہلیہ شبانہ اسحاق نے ہائیکورٹ سے رجوع کر لیا، ساتھی اسحاق کی اہلیہ نے درخواست میں موقف اختیار کیا ہے کہ قانون نافذ کرنے والے ادارے ساتھی اسحاق کو بلاوجہ ہراساں کر رہے ہیں۔

جانیے : پیپلز پارٹی کے رہنما ساتھی اسحاق ایڈوکیٹ کی ایم کیو ایم میں شمولیت

درخواست میں موقف اختیار کیا گیا ہے کہ ساتھی اسحاق ایک پُرامن اور قانون پسند شہری ہی نہیں بلکہ خود ایک قانون دان بھی ہیں لہذا ایک پُر امن شہری کی حیثیت سے وہ اپنی مرضی سے سیاسی سرگرمیوں سمیت اظہار رائے کی آزادی کا حق بھی رکھتے ہیں اس لیے معزز عدالت ساتھی اسحاق کو ہراساں کرنے سے قانون نافذ کرنے والے اداروں کو روکے۔

پڑھیے : اگر کسی کے خلاف غداری کا مقدمہ ہے تو عدالت میں چلایا جائے،ساتھی اسحاق

ساتھی اسحاق کی اہلیہ شبانہ اسحاق کی جانب سے دائر کی گئی درخواست پر موقف سننے کے بعد عدالت نے وفاقی و صوبائی حکومت سمیت دیگر فریقین سے 8 نومبر تک جواب طلب کر لیا۔

یہ بھی پڑھیں : متحدہ لندن کے رہنما حسن ظفر اور کنور خالد پریس کلب سے زیر حراست

دوسری جانب سندھ بار کونسل نے بھی ساتھی اسحاق ایڈووکیٹ کے گھر پر چھاپے اور اہل خانہ کو ہراساں کرنے کے حوالے سے اعلامیہ جاری کیا ہے۔

اعلامیہ میں کہا گیا ہے کہ ساتھی اسحاق ایڈووکیٹ کو ایک سیاسی جماعت سے وابستگی کی سزا دی جارہی ہے جب کہ کسی بھی سیاسی جماعت سے وابستگی قانون کے برخلاف نہیں اس لیے ساتھی اسحاق ایڈووکیٹ کو ہراساں کرنا قانون اور آئین کے برخلاف ہے۔

یاد رہے کہ ساتھی اسحاق نے چند ماہ قبل ہی ایم کیو ایم میں شمولیت حاصل کی تھی اور بعد ازاں 22 اگست کی متنازعہ تقریر کے بعد ایم کیو ایم میں دھڑے بندی کے بعد ساتھی اسحاق کو ایم کیو ایم لندن کی جانب سے ممبر رابطہ کمیٹی نامزد کردیا گیا۔

ایم کیو ایم لندن رابطہ کمیٹی 22 اکتوبر کو اپنی دوسری پریس کانفرنس کرنے پریس کلب پہنچی ہی تھی کہ رینجرز کے اہلکاروں نے ڈاکٹر حسن ظفر، کنور خالد یونس اور امجد اللہ کو حراست میں لے لیا تھا جب کہ دیگر ممبران اشرف نور اور ساتھی اسحاق کے گھروں پر چھاپے مارے گئے تھے جن کی عدم دستیابی پر اہل خانہ کو گرفتار کر لیا گیا تھا۔

واضح رہے کہ اسحاق ایڈووکیٹ کراچی کی سیاست میں نمایاں مقام رکھتے ہیں وہ زمانہ طالب علمی سے ہی بائیں بازو کی سیاست میں حصہ لیتے رہیں اور ضیاء الحق کے بد ترین دورِ آمریت میں پاکستان پیپلز پارٹی کے سرگرم عہدیدار رہے اور مارشل لا کی سختیاں جھیلیں، درد مند دل اور ہر ایک کے کام آنے کے باعث وہ زمانہ طالب علمی سے ہی ’ساتھی‘ کے نام سے اتنے معروف ہو گئے کہ اب یہ لقب ان کے نام کا مستقل حصہ بن گیا ہے۔

کراچی : ایم کیوایم لندن سے رابطہ رکھنے پر ضلع کورنگی کے وائس چیئرمین رکن الدین کے خلاف تحریک عدم اعتماد کثرتِ رائے سے منظورکرلی گئی ہے۔

تفصیلات کے مطابق آج ڈسٹرکٹ کونسل کورنگی میں ہونے والے اجلاس میں وائس چیئرمین رکن الدین کے خلاف تحریک عدم اعتماد پیش کی گئی جسے کثرتِ رائے سے منظور کرلیا گیا ہے۔

ایوان کی اکثریت رائےکے بعد اب ایک نوٹیفیکیشن کے ذریعے رکن الدین کو وائس چیرمین ڈسٹرکٹ کورنگی کے عہدے سے سبکدوش کردیا جائے گا جس کے بعد ایوان نئے وائس چیرمین کا انتخاب کرے گا۔

واضح رہے رکن الدین متحدہ قومی موومنٹ کے لانڈھی سیکٹر کے انچارج تھے جو بعد ازاں رابطہ کمیٹی کے ممبرمقرر کر دیے گئے تھے۔

تا ہم 22 اگست کی متنازعہ تقریر کے بعد رکن الدین نے ڈاکٹرفاروق ستار کی قیادت قبول کرنے کے بجائے لندن ایم کیو ایم سے رابطے بحال رکھے جس کے بعد انہیں وائس چیرمین ڈسٹرکٹ کورنگی سے سبکدوش کرنے کا فیصلہ کیا گیا۔

یاد رہے ایم کیوایم لندن رابطہ کمیٹی نے ڈسٹرکٹ کورنگی کے منتخب نمائندوں سے رکن الدین کے خلاف تحریک اعتماد ناکام بنانے کی اپیل کی تھی جسے نظر انداز کرتے ہوئے ڈسٹرکٹ کونسل نے رکن الدین کے خلاف تحریک عدم اعتماد منظور کر لی۔