کراچی : وزیر اعظم شہباز شریف آج ایم کیو ایم کے وفد سے ملاقات کریں گے ، جس میں ن لیگ سے معاہدے سمیت دیگر اہم امور پر بات چیت ہوگی۔
تفصیلات کے مطابق وزیر اعظم شہباز شریف آج ایک روزہ دورے پر کراچی پہنچ گئے ، دورے کے دوران شہباز شریف کی ایم کیو ایم کے وفد سے ملاقات ہوگی۔
ذرائع کا کہنا ہے کہ ایم کیوایم کےوفدمیں خالدمقبول صدیقی،امین الحق،وسیم اخترشامل ہوں گے ، ملاقات میں ن لیگ سے معاہدے سمیت دیگر اہم امور پر تبادلہ خیال ہوگا۔
ذرائع نے بتایا ایم کیوایم معاہدے سے متعلق پیشرفت، مردم شماری سمیت دیگر تحفظات وزیراعظم کے سامنے رکھے گی اور بلدیاتی انتخابات میں انتخابی اتحاد، مستقبل میں ورکنگ ریلیشن پر بھی بات چیت ہوگی۔
دوسری جانب دورہ کراچی کے بعد وزیر اعظم شہید بے نظیرآبادنوابشاہ بھی جائیں گے، جہاں وہ آصف زرداری سےان کی والدہ کی وفات پرتعزیت کریں گے اور مرحومہ کےایصال ثواب کے لیے فاتحہ خوانی بھی کریں گے۔
