اینٹورپ : پاکستان ہاکی ٹیم کے کپتان محمد عمران نے اولمپک کوالیفائنگ راؤنڈ میں آٹھویں پوزیشن کے بعد کپتانی چھوڑنے سے انکار کر دیا۔
اے آر وائی نیوز سے ٹیلی فون پر گفتگو کرتے ہوئے محمد عمران کا کہنا تھا کہ انہیں شکست کے بعد قربانی کا بکرا بنانے کی کوشش کی جا رہی ہے۔
کپتانی سے دستبردار ہونے کی خبریں بے بنیاد ہیں۔ ان کا کہنا تھا کہ اگر ریٹائرمنٹ کا فیصلہ کیا تو میڈیا کے سامنے اعلان کرتے ہوئے اصل وجوہات سے بھی آگاہ کروں گا۔
پاکستان کی وجہ سے پہچان بنی ہے اور ملک کیلئے کھیلنا اعزاز کی بات ہے۔
اینٹورپ: اولمپکس کوالیفائنگ راؤنڈ میں پاکستان کا سفر آٹھویں پوزیشن پر ختم ہوگیا، فرانس نے پاکستان کو دو ایک سے زیر کیا۔
اولمپک ہاکی کوالیفائنگ راؤنڈ میں پاکستان ساتویں پوزیشن سے بھی محروم ہوگیا،فرانس کیخلاف کھلاڑی ایسے کھیل جیسے ہاکی سے زیادہ واقفیت نہ ہو، پہلے کوارٹر میں پاکستان کو ایک گول کا خسارہ اٹھانا پڑا۔
حریف ٹیم کو پاکستان پرزرا بھی رحم نہ آیا ،فرانس نے دوسرے کوارٹر میں برتری کو ڈبل کردیا، آخری کوارٹر میں پاکستان کیجانب سے واحد گول محمد توثیق نے اسکور کیا لیکن اب دیر ہوچکی تھی۔
اولمپک کوالیفائنگ راؤنڈ میں پاکستان ٹیم کی ناقص پرفارمنس پہلے ہی ریواولمپکس سے باہر کراچکی ہے۔
اینٹورپ: ہاکی اولمپک کوالیفائنگ راؤنڈ کے اہم میچ میں آئرلینڈ نےپاکستان کو ایک صفر سے شکست دے کر اولمپکس سے باہر کردیا۔ پاکستان اولمپکس کوالیفائنگ راؤنڈ میں ناقص منصوبہ بندی اور خراب فٹنس کے سبب ناکام رہا۔
گرین شرٹس نے اولمپکس میں کوالیفائی کا آخری چانس بھی گنوادیا۔ پاکستان ہاکی ٹیم کے کپتان محمد عمران نے اولمپکس سے باہر ہونے پر قوم سے معافی مانگ لی ہے۔
تفصیلات کے مطابق ہاکی اولمپک کوالیفائنگ راؤنڈ کے کراس اوور میچ میں آئرلینڈ نے پاکستان کو ایک صفر سے شکست دے دی۔اس شکست کے بعد تاریخ میں پہلی بار قومی ہاکی ٹیم اولمپکس سے باہر ہوگئی ہے۔
آئرلینڈ نے کھیل کے آغاز سے ہی گیند پر کنٹرول رکھا، پاکستانی کھلاڑیوں نے کوششیں کیں لیکن ناکام رہےاور پینلٹی کارنر کے مواقع بھی ضائع کردیئے۔
ایونٹ میں بھارت اور فرانس سے ڈرا میچز کھیلنا پاکستان ٹیم کے لئے درد سر بنا۔ برطانیہ سے شکست نے براہ راست کوالیفائی کا چانس بھی کھو دیا اور ائرلینڈ کے خلاف مواقع کھونا اولمپکس سے باہر ہونے کا سبب بنا۔
صورتحال کا بھرپور انداز سے فائدہ اٹھاتے ہوئے آئرش ٹیم نےگیند کو جال میں پہنچا کر پاکستان کی امیدوں پر پانی پھیر دیا، پاکستان کو اب ساتویں پوزیشن کا میچ کھیلنا پڑ رہا ہے، جیت بھی ریو اولمپکس کا دروازہ نہیں کھول سکے گی۔
دوسری جانب پاکستان ہاکی ٹیم کے کپتان محمد عمران نے اولمپکس دوہزار سولہ سے باہر ہونے پر قوم سے معافی مانگ لی ہے, پاکستان ہاکی ٹیم کے کپتان محمد عمران کا کہنا ہے کہ پورے ایونٹ میں کھلاڑیوں کی یہی کوشش تھی کہ ہر میچ کو فائنل سمجھ کر کھیلا جائے۔
آئرلینڈ کیخلاف شکست کے بعد پوری ٹیم افسردہ، میچ کے دوران گول کرنے کے کئی مواقع ملے لیکن ضائع ہوگئے۔ان کا کہنا تھا کہ شکست کی ذمہ دار فرد واحد کو ٹھہرانا درست نہیں ہوگا۔
ریو اولمپکس سے باہر ہونے پر بطور کپتان پوری قوم سے معافی مانگتا ہوں۔