کراچی: وزیر اعلیٰ سندھ سید مراد علی شاہ کا کہنا ہے کہ آرٹیکل 161 کے تحت معدنیات صوبوں کو منتقل ہونی چاہیئے، وفاق تیل اور قدرتی گیس پر رائلٹی جمع کے لیے 2 فیصد چارج لیتا ہے، سندھ چاہتا ہے صوبوں کو رائلٹی وصولی کا اختیار دیا جائے۔
تفصیلات کے مطابق وزیر اعلیٰ سندھ سید مراد علی شاہ کی زیر صدارت این ایف سی اجلاس کی تیاری پر اجلاس منعقد ہوا۔ وزیر اعلیٰ نے ہدایت کی کہ گیس انفراسٹرکچر سیس (جی آئی ڈی ایس) صوبوں کو منتقل کیا جائے، اب تک جی آئی ڈی ایس وصولی میں سندھ کو حصہ دیا جائے۔
وزیر اعلیٰ نے کہا کہ آرٹیکل 161 کے تحت معدنیات صوبوں کو منتقل ہونی چاہیئے، وفاق تیل اور قدرتی گیس پر رائلٹی جمع کے لیے 2 فیصد چارج لیتا ہے، سندھ چاہتا ہے صوبوں کو رائلٹی وصولی کا اختیار دیا جائے۔
انہوں نے کہا کہ چنگی محصول اور ضلع ٹیکس (او زیڈ ٹی) میں سندھ کا حصہ 2 فیصد بڑھایا جائے، سندھ خود او زیڈ ٹی جمع کرتا تھا تو 46 فیصد حصہ بنتا تھا۔ وفاقی حکومت نے او زیڈ ٹی جمع کرنے سے روکا اور اتنا حصہ دینے کا وعدہ کیا۔
وزیر اعلیٰ کا کہنا تھا کہ 2010 میں وفاق نے او زیڈ ٹی صوبوں کو آبادی بنیاد پر تقسیم کرنا شروع کیا، آبادی کے حساب سے سندھ کا حصہ کم ہو کر 0.66 فیصد رہ گیا، ایف بی آر ٹیکس محاصل کا تخمینہ رقم واپسی کے نیٹ کلیکشن پر ہو مجموعی آمدنی پر نہیں۔
انہوں نے مزید کہا کہ صوبوں سے سیلز ٹیکس اور دیگر ٹیکس کم کرنے سے پہلے مشاورت کی جائے، ایل این جی پر سیلز ٹیکس 5 فیصد کم کیا گیا لیکن صوبوں کو اعتماد میں نہیں لیا۔ ساتواں این ایف سی ایوارڈ 18 ویں آئینی ترمیم سے پہلے کے ہیں، 18 ویں ترمیم کے بعد ذمہ داریاں بڑھنے پر تقسیم اسی حساب سے ہونی چاہیئے۔
وزیر اعلیٰ کے ترجمان کے مطابق اسلام آباد میں این ایف سی کا اجلاس 6 فروری کو ہوگا۔