کراچی: این ایل سی اور ڈی پی ورلڈ کی شراکت داری کے تحت تجارتی سامان لے کر پہلا قافلہ کراچی سے وسطی ایشیا کے لیے روانہ ہو گیا۔
تفصیلات کے مطابق نیشنل لاجسٹکس کارپوریشن اور ڈی پی ورلڈ کی جوائنٹ وینچر کمپنی کے توسط سے مختلف تجارتی سامان پر مشتمل کنٹینروں کا پہلا قافلہ کراچی سے وسطی ایشیائی ریاستوں کے لیے روانہ ہوا۔
تاریخی سنگ میل لاجسٹکس کے دونوں بڑے اداروں کی باہمی شراکت داری کے نتیجے میں طے ہوا ہے، کراچی میں ایک پر وقار تقریب کا انعقاد کیا گیا، جس میں ڈی پی ورلڈ کے گروپ چیئرمین اور سی ای او سلطان احمد بن سولیم نے وسطی ایشیائی ریاستوں کے لیے کارگو سروس کا افتتاح کیا۔
ڈی پی ورلڈ اور این ایل سی کے سینئر حکام سمیت معروف کاروباری شخصیات نے تقریب میں شرکت کی، سلطان احمد بن سولیم نے کہا کہ دونوں اداروں کے مابین اشتراک پورے خطے میں رابطوں اور تجارت کو فروغ دینے کے لیے ایک نئے دور کا آغاز ثابت ہوگا۔
کراچی ہیوی ٹریفک: کارگو ٹرین کے لیے خصوصی ریل کوریڈور بنانے کا اعلان
انھوں نے اس عزم کا اظہار کیا کہ این ایل سی کی خطے میں موجودہ حیثیت اور ڈی پی ورلڈ کی عالمی سطح پر موجودگی سے بے پناہ کاروباری مواقع میسر آئیں گے، جس سے اقتصادی سرگرمیوں کو تقویت ملے گی، اور اس پیش رفت سے کاروبار میں آسانی پیدا ہوگی اور ترسیل کی لاگت اور وقت میں نمایاں کمی واقع ہوگی۔
ڈائریکٹر جنرل این ایل سی نے اپنے خیالات کا اظہار کرتے ہوئے کہا کہ اس اقدام سے علاقائی تجارت پر دور رس اثرات مرتب ہوں گے اور خطے کی کاروباری برادری کو بھرپور فائدہ ہوگا۔ ترسیل کے مربوط نظام اور بلا رکاوٹ تجارت کو یقینی بنا کر پاکستان کی اقتصادی ترقی اور خوش حالی میں مددگار ثابت ہوگا۔
ان کا کہنا تھا کہ یہ سروس علاقائی تجارت کی ترقی کو یقینی بنانے کے لیے دونوں اداروں کی جانب سے اس عزم کا عملی اظہار ہے جس سے اقتصادی سرگرمیوں میں خاطر خواہ اضافہ ہوگا۔
