لاہور : مسلم لیگ ن نے این اے 121 سے شیخ روحیل اصغر کو این اے 120 سے ایاز صادق کو ٹکٹ دے دیا۔
تفصیلات کے مطابق ن لیگ نے لاہور کے بڑے حلقے میں ٹکٹوں کی تقسیم کا معاملہ حل کر لیا ، شیخ روحیل اصغر قومی اسمبلی کے حلقہ این اے 121 سے الیکشن کریں گے جبکہ ایاز صادق کو این اے 120 سے ن لیگ کا ٹکٹ سے دیاگیا ہے۔
ن لیگ نے این اے 120 میں سہیل شوکت بٹ سے کاغذات نامزدگی واپس لینے کا فیصلہ کیا ہے، سہیل شوکت بٹ صوبائی اسمبلی کے حلقہ پی پی 151 سے الیکشن لڑیں گے۔
دوسری جانب خوشاب میں ن لیک پارٹی ٹکٹوں کی تقسیم پر پارٹی تقسیم ہوگئی، مسلم لیگ نون پنجاب کی نائب صدر سابق وفاقی وزیر سمیرا ملک کو پارٹی نے حلقہ این اے ستاسی سے ٹکٹ جاری نہیں کیا بلکہ ملک شاکر بشیر اعوان کو ٹکٹ جاری کر دیا، جس پرسمیرا ملک نے آزاد حثیت سے الیکشن لڑنے کا اعلان کر دیا ہے۔
لاہور : لاہور ہائیکورٹ نے قومی اسمبلی کے حلقہ این اے 120 میں 29 ہزار جعلی ووٹوں کےخلاف درخواست پر وفاقی حکومت، الیکشن کمیشن اور کلثوم نواز کے وکیل کو جواب داخل کرنے کا آخری موقع دے دیا۔
تفصیلات کے مطابق لاہور ہائیکورٹ کے جسٹس امین الدین خان نے تحریک انصاف کی رہنما ڈاکٹر یاسمین راشد کی درخواست پر سماعت کی، سماعت کے دوران کلثوم نواز، الیکشن، نادرا سمیت دیگر فریقین نے جواب داخل کرانے کیلئے مزید مہلت مانگی۔
جس پر عدالت نے فریقین کو جواب داخل کرانے کیلئے آخری موقع دے دیا۔
درخواست گزار کے وکیل نے بتایا مسلم لیگ ن کی امیدوار کلثوم نواز کا تعلق حکمران جماعت سے تھا وہ سابق وزیراعظم میاں نواز شریف کی اہلیہ ہیں، کلثوم نواز کو کامیاب کرنے کیلئے 29 ہزار جعلی ووٹ بنوائے گے اور ان ووٹوں کا اندراج بھی نہیں کیا گیا۔
درخواست کے مطابق الیکشن کمیشن نے عدالت کے روبرو ان جعلی ووٹوں کو تسلم کیا لیکن انکو منسوخ نہیں کیا گیا، اگر 29 ہزار جعلی ووٹوں کو منسوخ کر دیا جاتا تو انتخابی نتائج مختلف ہوتے۔
ڈاکٹر یاسمین کی جانب سے استدعا کی گئی کہ جعلی ووٹوں کو منسوخ کیا جائے۔
کلثوم نواز کے کے وکیل نے جواب داخل کرانے کیلئے مہلت کی استدعا کی، جسے عدالت نے منظور کرتے ہوئے مزید کارروائی 15 مارچ تک ملتوی کر دی۔
یاد رہے کہ سپریم کورٹ کی جانب سے پاناما کیس میں نوازشریف کو نااہل قرار دیے جانے کے بعد حلقہ این اے 120 کی نشست خالی ہوئی تھی جس پر 17 ستمبر 2017 کو ضمنی انتخابات منعقد کیے گئے تھے۔
تحریک انصاف نے ضمنی انتخابات میں حصہ لیتے ہوئے ڈاکٹر یاسمین راشد کو مسلم لیگ ن کی امیدوار کلثوم نواز کی مخالفت میں کھڑا کیا تھا، دونوں امیدواروں کے درمیان کانٹے دار مقابلے کے بعد مسلم لیگ ن کی امیدوار نے 13268 ووٹ کی برتری سے فتح اپنے نام کی تھی۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
اسلام آباد: پاکستان تحریک انصاف کے چیئرمین عمران خان نے کہا ہے کہ این اے 120 میں ہم نے انتخابی مہم تاخیر سے شروع کی، ایک ہفتہ اور مل جاتا تو ن لیگ کا ووٹ بینک مزید کم کردیتے یا جیت جاتے، خوشی ہوئی نثار نے مریم نواز کے خلاف زبان کھولی، میں نااہل نہیں ہوسکتا میں اپنا حلال پیسہ باہر سے یہاں لایا ہوں۔
یہ باتیں انہوں ںے اے آر وائی نیوز کے پروگرام آف دی ریکارڈ میں میزبان کاشف عباسی کو انٹرویو دیتے ہوئے کیں۔
عمران خان نے کہا کہ این اے 120 سال 85ء سے ان کا گڑھ تھا، یہاں کے لیے مجھے کیوں نکالا کی مہم پوری ہوئی، سرکاری وسائل کا استعمال ہوا، وفاق اور صوبائی حکومت کے تمام فنڈز اس حلقے لگائے گئے، پورا زور لگایا جب بھی مزید 30 فیصد ووٹ کم ہوگئے۔
انہوں نے کہا کہ الیکشن شیڈول جاری ہونے کے بعد آپ متعلقہ حلقے میں کوئی تعمیراتی کام نہیں کراسکتے لیکن سڑکیں بنیں، وزرا نے دورے کیے، فنڈز خرچ کیے گئے لیکن پھر بھی ووٹ بینک کم ہوا تو یہ ن لیگ کے لیے بہت بڑا دھچکا ہے۔
کے پی کے حکومت پر کرپشن کے سوال پر انہوں نے کہا کہ یہ محض الزامات ہیں شواہد کوئی نہیں، انہوں نے کہا کہ حدیبیہ پیپرز ملز کا کیس اگر کھل جائے تو سارے بینک آکاؤنٹس کی تفصیلات اس میں سامنے آجائیں گی، ہم پر جو الزامات لگائے جارہے ہیں اس ضمن میں کوئی ثبوت تو دکھایا جائے۔
ایک سوال پر انہوں نے کہا کہ ضیا اللہ آفریدی سے دو بار ملا تھا اور اسے کہا کہ تم پر کرپشن کے الزامات آرہے ہیں مجھے وضاحت دو، اس نے مجھے کچھ نہیں، ڈ ی جی احتساب جنرل حامد نے مجھے کہا کہ ضیا اللہ غیر قانونی مائننگ کرارہا ہے اور پیسے بنارہا ہے، میرے رہنماؤں میں سے اگر کوئی کرپشن کررہا ہے آپ مجھے ایک کاغذ بھی اس ضمن میں دے دیں میں کارروائی کروں گا۔
کاشف عباسی کے ایک سوال پر انہوں نے کہا کہ کامیابی کے لیے مشاہدہ ضروری ہے، رات سونے سے قبل مشاہدہ کرلیا تھا کہ جیت بھی سکتے تھے یا ہارنے کا مارجن مزید کم کرسکتے تھے لیکن ہم نے کمپین شروع کرنے میں تاخیر کردی تھی ، ہم نے جب تک پیسہ اکٹھا کیا ایڈورٹائزنگ کا وقت نکل چکا تھا ہمارے ایم این ایز کو روک دیا گیا جب کہ دوسری جانب مریم نواز خود اور ان کے وزرا بھی انتخابی مہم چلا رہے تھے جو الیکشن کمیشن کو نظر نہیں آئی۔
آٹھ ستمبر کے جلسے میں کرسیاں خالی تھیں اس سوال پر انہوں نے کہا کہ چھوٹے شہر میں دو دن کے نوٹس پر جلسہ ہوجاتا ہے جیسا کہ خوشاب میں لوگوں کا ہجوم تھا لیکن اندازہ ہوا کہ بڑے شہر میں جلسہ کرنے کے لیے پبلسٹی ضروری ہے، اس جلسے میں ٹھیک طرح سے لوگوں کو بتایا ہی نہیں کہ جلسہ ہورہا ہے۔
انہوں نے پھر کہا کہ ہماری انتخابی مہم دیر سے شروع ہوئی کیوں کہ ہم نے فنڈریزنگ میں دیر کردی جب مہم چلنا شروع ہوئی تو الیکشن سر پر آگیا، ہمیں ایک ہفتے اور مل جاتا تو ن لیگ کا ووٹ بینک مزید کم کردیتے۔
انہوں نے کہا کہ مجھے خوشی ہوئی کہ چوہدری نثار نے مریم نواز کے خلاف زبان کھولی کیوں کہ مریم نواز کی کیا قابلیت ہے؟نثار سے کوئی رابطہ نہیں ان پر شدید غصہ ہے، انہوں نے اس رات ہم پر جو شیلنگ کرائی اس کی اب تک تکلیف ہے، ان سے 40 سال کا تعلق ہے لیکن اس شیلنگ پر بہت تکلیف ہے۔
انہوں نے کہا کہ ایک خاتون جس کا کوئی لینا دینا نہیں وہ شہزادی بن کر رہ رہی ہے، چوہدری نثار کی تعریف کرتا ہوں کہ کسی نے تو کوئی بات کہی۔
آرٹیکل 62 اے کے سوال پر انہوں نے کہا کہ یہ شق غلط کام کرنے پر لگتی ہے ملک کا پیسہ چوری کرنے پر لگتا ہے، میں نے حلال طریقے سے باہر سے پیسہ کمایا اور پاکستان لے آیا کیسے مجھے کوئی نااہل کرسکتا ہے؟ اگر یہ رقم کینیڈا لے جاتا تو وہاں کی شہریت مل جاتی اور اسے خوش آمدید کہتے لیکن میں پیسہ یہاں لایا۔
لاہور : وفاقی وزیر ریلوے خواجہ سعد رفیق نے کہا ہے کہ لاہوریوں نے ایک بار پھر دھرنے اور انتشارکی سیاست کو مسترد کیا ہے، شہباز شریف کا کہنا ہے کہ عوام کے دل ن لیگ کے ساتھ دھڑکتے ہیں۔
ان خیالات کا اظہار انہوں نے این اے 120 کے ضمنی انتخاب میں کلثوم نواز کی فتح کے بعد اپنے علیحدہ علیحدہ بیان میں کیا۔
خواجہ سعد رفیق نے کہا کہ آج کادن ایک تاریخ سازدن ہے،عوام نے پاکستان کوترقی کی شاہراہ پرڈالنےوالوں پراعتماد کیا، اہل لاہور اوراین اے 120 کےعوام کاشکریہ ادا کرتے ہیں، نوازشریف اورن لیگ کےخلاف چار سال سےمہم چلائی جارہی ہے۔
نواز شریف کی ترقی کا وژن جیت گیا ہے، وہ عوام کے دلوں میں بستے ہیں،خواجہ سعد رفیق کا مزید کہنا تھا کہ سی پیک اور ملکی اقتصادی حالت بہترکرنا نوازشریف کا جرم ہے، ان کاجرم یہ ہے کہ وہ بلوچستان میں امن لائے۔
خواجہ سعدرفیق نے کہا کہ ہمارےچند کارکنان ابھی تک لاپتہ ہیں، ہمارے ہزاروں ووٹ کاسٹ نہیں کرنے دیئےگئے۔
علاوہ ازیں وزیر اعلی پنجاب میاں شہباز شریف نے کلثوم نواز کی جیت پر عوام کو مبارکباد دیتے ہوئے کہا ہے کہ کلثوم نواز کی جیت ن لیگ کی قیادت اور اس کی کارکردگی پراعتماد کا اظہار ہے، ضمنی الیکشن نے ثابت کردیا کہ عوام کے دل ن لیگ کے ساتھ دھڑکتے ہیں۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔
لاہور: این اے 120 میں امن و امان برقرار رکھنے اور شفافیت کو یقینی بنانے کے لیے پاک فوج کے دستے پہنچ گئے۔
اے آر وائی نیوز کے نمائندے الفت مغل کے مطابق حلقہ این اے 120 اپنی سیاسی شناخت کے باعث انتہائی اہمیت کا حامل ہے، یہاں انتخاب کے لیے پاک فوج کے دستے پہنچ گئے ہیں اور انہوں نے حلقے کے مختلف علاقوں کا دورہ کیا ہے۔
انہوں نے بتایا کہ فوجی دستوں کا قیام این اے 120 کا انتخاب ہونے اور نتائج آنے تک رہے گا اور ان کی کوشش ہوگی کہ حلقے میں سیاسی جماعتوں کے دوران کسی بھی قسم کا تصادم نہ ہونے پائے، امن و امان اور شفافیت کے ساتھ این اے 120 کا انتخابی عمل پورا ہوجائے۔
لاہور : چیئرمین پاکستان تحریک انصاف کا کہنا ہے کہ نوازشریف کی کوشش تھی کسی طرح نیب سے مانیٹرنگ جج ہٹ جائے۔
تفصیلات کے مطابق لاہور میں میڈیا سے گفتگو کرتے ہوئے پاکستان تحریک انصاف کے سربراہ عمران خان نے کہا کہ نظرثانی اپیلیں سازش تھیں عدالت نےناکام بنا دیا۔
عمران خان کا کہنا تھا کہ مانیٹرنگ جج کوہٹانےکی سازش ناکام ہوگئی ہے ان کی کوشش تھی مانیٹرنگ جج ہٹ جائےادارے تو کنٹرول میں ہیں۔
پاکستان تحریک انصاف کے سربراہ کا کہنا تھا کہ یہ چاہتےتھےمانیٹرنگ جج ہٹ جائےتو کیس 15،20سال چلاتے رہیں گے،عمران خان کا کہنا تھا کہ قوم کی طرف سے سپریم کورٹ کا شکریہ ادا کرتا ہوں۔
این اے 120 سے متعلق چیئرمین پی ٹی آئی عمران خان کا کہنا تھا کہ امید ہےاین اے120میں ملک دشمنوں کی شکست ہوگی۔
چیئرمین پاکستان تحریک انصاف کا کہنا تھا کہ الیکشن کمیشن سے پوچھتا ہوں کیا آپ نے پہلےکبھی توہین پرکسی کوبلایا، انہوں نے کہا کہ الیکشن کمیشن آصف زرداری اورنوازشریف کی تعینات کردہ ہے۔
عمران خان کا کہنا تھا کہ مسلم لیگ ن کا وطیرہ رہا اداروں کے ذریعےلوگوں کوبلیک میل کرتےہیں، یہ جمہوریت نہیں بدترین بادشاہت کی کوشش کی جارہی ہے۔
پاکستان تحریک انصاف کے سربراہ کا کہنا تھا کہ خط میں الیکشن کمیشن کوبتایا میں نےکوئی غلط کام نہیں کیا اورنہ معافی مانگی، انہوں نے کہا کہ یہ سب کچھ نوازشریف کی ایما پرہو رہا ہے۔
واضح رہے کہ چیئرمین پاکستان تحریک انصاف عمران خان کا کہنا تھا کہ چوہدری نثاردرست کہتےہیں یہ بچےاورغیرسیاسی ہیں۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔
لاہور: پیپلز پارٹی پنجاب کے صدر قمر زمان کائرہ نے کہا ہے کہ اختیارات ہونے کے باوجود الیکشن کمشن ضابطہ اخلاق کی خلاف ورزی پر کارروائی نہیں کر رہا۔
تفصیلات کے مطابق پیپلز پارٹی پنجاب کے صدر قمر زمان کائرہ نے لاہور میں پریس کانفرنس میں حلقہ این اے 120 میں الیکشن کمیشن کی کارکردگی پر مایوسی کا اظہار کرتے ہوئے آئین پر عملدر آمد کا مطالبہ کردیا۔
پیپلز پارٹی پنجاب کے جنرل سیکریٹری ندیم افضل چن نے کہا کہ مریم نواز سرکاری وسائل استعمال کر رہی ہیں۔
انہوں نے کہا کہ عمران خان کی درخواست پر عدلیہ نے فیصلہ دیا ہے، حکمران جماعت کا احتساب نہیں ہو رہا۔ ٹیکس ریکارڈ کے بعد خطرہ ہے کہ پاناما لیکس کا ریکارڈ بھی نہ جل جائے۔
پیپلز پارٹی کے رہنماؤں نے 20 ستمبر کو ساہیوال اور جمعرات کے روز مزنگ میں جلسے کا بھی اعلان کیا۔
لاہور: الیکشن کمیشن آف پاکستان نے این اے 120 میں انتخابی ضابطہ اخلاق کی خلاف ورزی پرڈپٹی میئر لاہور کو نوٹس جاری کردیا۔
تفصیلات کے مطابق الیکشن کمیشن نے این اے 120 میں انتخابی ضابطہ اخلاق کی خلاف ورزی پر ڈپٹی میئر لاہورمیاں طارق کو نوٹس جاری کرتے ہوئے انتخابی مہم سے روک دیا۔
ریٹرننگ آفیسر نے ڈپٹی میئرلاہور میاں طارق کو 3 دن میں جواب جمع کرانے کا حکم دیا ہے، آراو میاں محمد شاہد نے پی ٹی آئی امیدوار یاسمین راشد کی درخواست پرنوٹس جاری کیا۔
پاکستان تحریک انصاف کی امیدوار یاسمین راشد کا کہنا ہے کہ ڈپٹی میئرلاہورکلثوم نواز کےانتخابی جلسوں میں شرکت کررہے ہیں جبکہ انہوں نے الیکشن کمیشن سے استدعا کی کہ میاں طارق کو این اے 120 کے لیےانتخابی مہم میں شرکت سےروکا جائے۔
یاد رہے کہ دو روز قبل الیکشن کمیشن نے این اے 120 میں انتخابی ضابطہ اخلاق کی خلاف ورزی پر مسلم لیگ ن کے 2 ارکان اسمبلی کو نوٹس جاری کیے تھے۔
الیکشن کمیشن آف پاکستان کی جانب سے جاری نوٹس میں دونوں رکن صوبائی اسمبلی سے کہا گیا تھا کہ وہ 3 دن میں وضاحت پیش کریں ورنہ قانون کے مطابق کارروائی ہوگی۔
واضح رہے کہ گزشتہ دنوں الیکشن کمیشن نے این اے 120 میں انتخابی ضابطہ اخلاق کی خلاف ورزی پر وفاقی وزیر برائے کامرس وٹیکسٹائل پرویز ملک کو نوٹس جاری کیا تھا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
لاہور: لاہور ہائیکورٹ نے این اے 120 کے لیے کلثوم نواز کے کاغذات نامزدگی کے خلاف دائر درخواستیں سماعت کے لیے منظور کرلیں۔ عدالت نے نوٹس جاری کرتے ہوئے کلثوم نواز سمیت فریقین سے جواب طلب کر لیا۔
تفصیلات کے مطابق جسٹس امین الدین، جسٹس عباد الرحمٰن لودھی اور جسٹس شاہد جمیل پر مشتمل 3رکنی بنچ نے درخواستوں کی سماعت کی۔
عدالت نے پیپلز پارٹی کے فیصل میر، عوامی تحریک کے اشتیاق چوہدری سمیت 4 درخواستوں کو سماعت کے لیے منظور کرتے ہوئے 13 ستمبر کو سابق وزیر اعظم نواز شریف کی اہلیہ کلثوم نواز، فیڈریشن اور الیکشن کمیشن سے جواب طلب کر لیا۔
درخواست گزاروں کی جانب سے مؤقف اختیار کیا گیا ہے کہ کلثوم نواز نے اپنے کاغذات نامزدگی میں اقامہ کے متعلق تفصیلات فراہم نہیں کیں۔ انہوں نے کاغذات نامزدگی میں اقامہ کا ذکر کیا مگر اس سے حاصل ہونے والی آمدن اور اکاؤنٹس کی تفصیلات فراہم نہیں کیں۔
درخواست گزاروں کے مطابق کلثوم نواز کے خلاف سندھ میں بغاوت کا مقدمہ بھی درج ہے مگر انہوں نے کاغذات نامزدگی میں اسے جان بوجھ کر ظاہر نہیں کیا۔ کلثوم نواز نے حقائق چھپائے اور جھوٹ بولا لہٰذا وہ الیکشن لڑنے کی اہل نہیں۔
دائر شدہ درخواستوں میں مزید کہا گیا کہ ریٹرننگ افسر کو ٹھوس شواہد دییے مگر انہوں نے کاغذات نامزدگی منظور کر لیے لہٰذا عدالت ریٹرننگ افسر کا فیصلہ کالعدم قرار دے اور کلثوم نواز کو الیکشن میں حصہ لینے سے روکے۔
یاد رہے کہ اس سے قبل بھی ہائیکورٹ نے مذکورہ درخواستوں کی سماعت کے لیے 2 بار فل بنچ تشکیل دیا تاہم دونوں بنچ تحلیل کردیے گئے اور سماعت نہ ہو سکی جس کے بعد اب یہ تیسرا بنچ تشکیلدیا گیا ہے۔
لاہور : الیکشن کمیشن نے این اے 120 میں انتخابی ضابطہ اخلاق کی خلاف ورزی پر مسلم لیگ ن کے 2 ارکان اسمبلی کو نوٹس جاری کر دیے۔
تفصیلات کے مطابق الیکشن کمیشن آف پاکستان نے انتخابی ضابطہ اخلاق کی خلاف ورزی پر پنجاب کے وزیر خوراک بلال یاسین اور رکن صوبائی اسمبلی سیف الملوک کھوکھر کو نوٹس جاری کردیے۔
الیکشن کمیشن کے مطابق دونوں ارکان اسمبلی نے این اے 120 سے مسلم لیگ کی امیدوار کلثوم نواز کی بیٹی مریم نواز کی انتخابی ریلیوں میں شرکت کی۔
الیکشن کمیشن آف پاکستان کی جانب سے جاری نوٹس میں دونوں رکن صوبائی اسمبلی سے کہا گیا ہے کہ وہ 3 دن میں وضاحت پیش کریں ورنہ قانون کے مطابق کارروائی ہوگی۔
یاد رہے کہ اس سے قبل بھی الیکشن کمیشن نے صوبائی وزیرخوراک سے انتخابی ضابطہ اخلاق کی خلاف ورزی پر جواب کرتے ہوئے کہا تھا کہ اگر بلال یاسین انتخابی ضابطہ کی خلاف ورزی کے مرتکب پائے تو ان کی نااہلی کا نوٹس جاری کردیا جائے گا۔
واضح رہے کہ گزشتہ دنوں الیکشن کمیشن نے این اے 120 میں انتخابی ضابطہ اخلاق کی خلاف ورزی پر وفاقی وزیر برائے کامرس وٹیکسٹائل پرویز ملک کو نوٹس جاری کیا تھا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
