اسلام آباد : الیکشن کمیشن نے این اے 83 اور 85 میں انتخابات ملتوی کرنے کا نوٹیفکیشن منسوخ کردیے، جس کے بعد دونوں حلقوں میں انتخابات ہوں گے۔
تفصیلات کے مطابق الیکشن کمیشن نے این اے 83 اور 85 میں انتخابات ملتوی کرنےکےآراوکےنوٹیفکیشن منسوخ کردیے۔
چیف الیکشن کمشنر نے ہدایت کی ہے کہ دونوں حلقوں میں انتخابات ہوں گے، انتخابی عمل جاری رکھا جائے۔
چیف الیکشن کمشنر کی سربراہی میں پانچ رکنی بینچ نے سماعت کی، لیگی امیدوار نے موقف اپنایا کہ آراو کا ایک نوٹس ملا کہ آپ کے حلقے میں آزاد امیدوار فوت ہو گیا ، وفات پانے والے امیدوار کا ڈیتھ سرٹیفکیٹ 15 جنوری کا ہے۔
ن لیگی امیدوار کا کہنا تھا کہ تحقیقات پر پتا چلا صادق علی کی وفات 2 جنوری کو ہوئی، 3 جنوری کو نماز جنازہ ہوئی، اس معاملے میں جعل سازی ہوئی، 2حلقوں میں انتخابات ملتوی کروانے کیلئے سازش کی گئی۔
ڈی آر و نے کہا کہ انکوائری میں ثابت ہو گیا ہے کہ صادق علی کی وفات دو جنوری کو ہوئی، انکوائری میں صادق علی کی والدہ، بیٹی، امام مسجد کے بیان ریکارڈ کیے گئے۔
سیکریٹری یوسی نے بتایا کہ ہم نے نمبردار کی تصدیق اور بیٹے کی درخواست پر ڈیتھ سرٹیفکیٹ جاری کیا، جس پرنمبردار کا کہنا تھا کہ میرے جعلی دستخط کئے گئے۔
جس پر چیف الیکشن کمشنر نے سیکرٹری یوسی کے خلاف ڈی سی سرگودھا کو کارروائی کی ہدایت کی اور ریمارکس دیئے کہ سیکریٹری یوسی کو نوکری سے برخواست کرنا چاہیے۔
